2 तीमुथियुस 4 - Surgujia Bible

तीमुथियुस ला पौलुस हर समझाईस

¹ राजा बएन के अवईया अऊ जीयत अऊ मरल मन कर नियाओ करोईया ईसू मसीह अऊ परमेस्वर ला हाजीर जाएन के मंए तोके ए आदेस देहथों,

² कि तंए सुघर खभेर कर परचार कर, बढ़िहां घनी अऊ रोकावट कर घरीयोच में तियार रह, मईनसे मन ला समझा, डांट अऊ उत्साहित कर। ए सब जाएत ला तंए बड़खा धीरज कर संगे सिखाओ।

³ मंए एला एकरले बताथों कि अईसना समय आही, जब मईनसे मन खर-खर सिक्छा ला सुने बर नई चाहीं, बलकि अपन इछा कर अनुसार, बात बतोईया गुरू मन ला खोएज लेहीं अऊ ओमन ओही जाएत ला सिखाहीं, जेला ओमन सुने बर चाहीं।

⁴ ओमन सहीच गोएठ ला सुने बर नई करहीं, बलकि झूठ-मूठ कर कहनी-किसा में अपन मन ला लगाहीं।

⁵ बकिन तंए ए सब बात में सवाचेती रह अऊ दुख ला सहत रह अऊ सुघर खभेर कर परचार कर अऊ अपन सेवा कर सबेच जिमेदारी ला पूरा कर।

⁶ मंए अपन-आप ला परभू बरीक, एगोट बली कस चघाल जाथों अऊ मोर मरे कर घनी हर आए पहुंचीसे।

⁷ मंए परभू बरीक बढ़िहां लड़ाई लएड़ दारे हों, मंए अपन दऊड़ ला पूरा कएर दारे हों अऊ मंए अपन बिस्वास ला समहाएर के राखे हों।

⁸ परभू कर देख में बढ़िहां जिनगी जीए कर मुकुट ला, परभू हर मोर बरीक राखीस हवे। सही नियाओ करोईया परभू हर मोके नियाओ कर दिन में, ओ मुकुट ला देही अऊ सिरीप मोके ला नई देही, बकिन ओ सब झन ला देही, जेमन ओकर डगर देखे बर घोंखत रथें।

पौलुस कर आखरी उपदेस

⁹ मोर जग हालू आए कर कोसिस कर।

¹⁰ काबरकि देमास हर, संसार कर मया में फंएस के मोके छोंएड़ देहीस हे अऊ थिस्सलुनीके सहर में चएल देहीस हे, करेसकेंस हर गलातिया जिला में अऊ तीतुस हर, दलमतिया इलाका में चएल देहीस हे।

¹¹ सिरीप लूका हर मोर संगे हवे। मरकुस ला लेके मोर जग आए जा, काबरकि ओहर परभू कर सेवा में मोर ढेरेच मदेत करथे।

¹² तुखिकुस ला मंए इफिसूस सहर में भेजे हों।

¹³ आए घनी पिछोरी ला लेते लानबे, जेला मंए तरोआस सहर में करपूस कर घरे छोंएड़ के आए हों। मोर किताब मन ला खास कएर के चाम कर बनल किताब मन ला लेते लानबे।

¹⁴ सिकंदर ठठेर हर मोर ढेरेच बुराई करीस हे, परभू ओकर करम कर पलटा ओके देही।

¹⁵ तंहूच ओकर जग ले सवाचेती रहबे, काबरकि ओहर हमर सिक्छा कर ढेरेच बिरोध करीस हे।

¹⁶ मोर पहिलो पेसी कर घनी में कोनो हर मोर संग नई देहीस, बकिन सब झेमन मोके ला छोंएड़ देहींन, बढ़िहां होतीस कि ओमन के एकर लेखा देहे बर झईन परतीस।

¹⁷ बकिन परभू हर मोर संगे रहीस अऊ मोके बल देहीस, तेमेकि मोर जरिये सुघर खभेर कर पूरा परचार हर होए जाए अऊ सब गैर यहूदी मन एला सुईन लें। जेकस बघवा कर मूंह ले कोनो मईनसे ला छोंड़ाथें, वईसनेच परभू हर मोके छोंड़ाईस हे।

¹⁸ ओही परभू हर मोके सब बुरा काम ले बचाही अऊ अपन सरग राएज में मोके बढ़िहां समहाएर के पहुंचाही। ओकर बड़ाई जुग-जुग होवत रहे। आमीन।

आखरी जोहार

¹⁹ पिरीसका बहिन अऊ अकविला भाई अऊ उनेसिफुरुस कर घरो भेर कर मईनसे मन ला मोर जोहार।

²⁰ इरास्तुस हर कुरिंथुस सहर में रुईक गईस हे अऊ मंए तुरफिमुस ला मिलेतुस सहर में छोंएड़ देहे हों, काबरकि ओहर बेमार रहीस।

²¹ जड़हा महीना ले आगू तंए इहां आए कर कोसिस करबे, युबूलुस, पूदेंस, लीनुस, कलौदिया अऊ सब भाई अऊ बहिन मन तोके जोहार कथें।

²² परभू तोर आत्मा कर संगे रहे। तोर ऊपर परमेस्वर कर किरपा होवत रहे।