2 तीमुथियुस 3 - Surgujia Bible

आखरी दिन कर पाप कर खतरा

¹ ए बात ला जाएन ले कि संसार कर आखरी दिन मन में कठिन समय आही।

² ओ दिन में मईनसे मन अपनेच-आप ले मतलब रखोईया अऊ पईसा कर लोभिया, बड़खा-बड़खा गोएठ गोठवईया, घमंडी, निंदा करोईया, दाई-दाऊ कर कहल नई मनोईया, नोन निंदवा अऊ अपबितर होहीं।

³ ओमन बिगर मया कर, छमा नई करोईया, लाई-चुगली करोईया, उथुल पेटीया, कठोर अऊ कसरीहा होहीं

⁴ ओमन ठगलबरा, ढींट, घमंड ले भरल होहीं। ओमन परमेस्वर में नहीं, बलकि संसार कर रिज-रंग में मन लगोईया होहीं।

⁵ ओमन परमेस्वर कर भक्ति कर भेस तो बनाहीं, बकिन ओकर सक्ति ला नई मानहीं, एकस मईनसे मन ले डोलहा रईहा।

⁶ एमन घर में कले-कले घुसेर जाथें अऊ जे भभराहीन सवांगीन मन, पाप में ठेलाए गईन हवें अऊ सब मधे कर रिज-रंग में फंसीन हवें, ओमन ला अपन कबजा में कएर लेथें।

⁷ ए सवांगीन मन हमेसा सिखत तो रथें, बकिन सत ला कभों चिन्हे नई सकें।

⁸ जेकस यनेस अऊ यमबरेस हरे मूसा कर बिरोध करे रहीन, ओही कस ए मईनसे मन सत कर बिरोध करथें, एमन अईसना मईनसे हवें, जेमन कर बुद्धी हर भुलाए गईस हवे अऊ एमन कर बिस्वास हर अनभनिया हवे।

⁹ बकिन एमन ढेर दिन बर बहकाए नई सकहीं, काबरकि मूसा कर बिरोधी यनेस अऊ यमबरेस कस, एहू मन केतेक मान मुरुख हवें, ओला सब मईनसे मन जाएन गईन हवें।

तीमुथियुस ला पौलुस हर समझाईस

¹⁰ बकिन तंए मोर सब सिक्छा, मोर चाल-सहूर, मोर जिनगी कर उदेस, ला जानथस अऊ तंए मोर बिस्वास, मोर सहनसीलता, मोर मया, मोर धीरज ला जानथस अऊ तंए मोर सताए जवई अऊ मोर दुख भोगाई ला जानथस।

¹¹ तंए जानथस कि अंताकिया, इकुनियुम अऊ लूस्तरा सहर मन में केतेक सताव ला मंए सहे रहें, बकिन परभू हर मोके ओ सबले छोंड़ाईस।

¹² फूरोंच में जेतना झन मन ईसू मसीह ला फुरमा करोईया जिनगी जीए बर चाहथें, ओ सब झेमन ला सताव सहे बर परही।

¹³ बकिन कसरीहा मईनसे अऊ बहकोईया मन, धोखा देहत अऊ खुद धोखा खात नास होवत जाहीं।

¹⁴ बकिन तीमुथियुस, जे बात मन ला तंए सीखे अऊ बिस्वास करे हवस, ओही में बजर होवत जा, काबरकि तंए जानथस कि तंए ए बात मन ला भरोसा करे लाएक, सिखोईया मन जग ले सीखे हवस।

¹⁵ अऊ नानबड़ ले तंए पबितर किताब ला जानथस। ओहर तोके उद्धार पाए कर गियान दे सकत हे, जेहर ईसू मसीह में बिस्वास करे ले मिलथे।

¹⁶ सबेच पबितर किताब हर, परमेस्वर जेकस कहीसे, ओही कस लिखल गईस हे अऊ एहर सिखाए बर, समझाए बर, सुधारे बर अऊ परमेस्वर ला फुरमा करे कर जिनगी जीए कर सिक्छा देहे बर काम आवत हे।

¹⁷ तेमेकि परमेस्वर कर मईनसे मन सिद्ध बएन जाएं अऊ सब मधे कर बढ़िहां काम करे कर लाएक होए जाएं।