2 तीमुथियुस 2 - Surgujia Bible

दुख तकलीफ कर जुआरो में परभू कर सेवा करे बर उकसाथे

¹ एकरले ए मोर बेटा तीमुथियुस, तंए ईसू मसीह कर किरपा कर जरिए बजर होए जा।

² तंए बगरा गवाह मन कर आगू में मोर जग ले सिक्छा पाए हस, ओला भरोसा लाएक आदमी मन ला सोंएप दे, जेमन खुद दूसर झेमन ला बढ़िहां ले सिखाए सकें।

³ ईसू मसीह कर बढ़िहां सैनिक कस, तंए मोर संगे दुख उठा।

⁴ कोनो सैनिक हर, अपन अधिकारी ला फुरमा करे बर, अपन-आप ला दूसर काम में नई लगाए।

⁵ ओही कस अखरा में खेलोईया कोनो खेलाड़ी हर, नियम ला माएन के नई खेलही, त ओहर मुकुट नई पाही।

⁶ कठिन मेहनत करोईया किसान ला, फसल कर बांटा सबले आगू मिले बर चाही।

⁷ तंए मोर बात में बढ़िहां ले धियान दे, काबरकि परभू सब गोएठ बात ला समझे में तोर मदेत करही।

⁸ ईसू मसीह ला सुरता कर, जेहर दाऊद राजा कर बंस कर रहीस अऊ मरल में ले जी उठीस, एहर मोर सुघर खभेर लागे, जेकर मंए परचार करत हों।

⁹ एही सुघर खभेर बर मंए दुख उठावत हों अऊ अपराधी कस जेहल में हुरकाए हों, बकिन परमेस्वर कर बचन हर बंधन में नईए।

¹⁰ एकरले मंए चुनल मईनसे मन बर सब जाएत ला सहत हों कि ओहूच मन अमर जिनगी कर महिमा कर संगे, ओ उद्धार ला पाएं, जेहर ईसू मसीह कर जरिये मिलथे।

¹¹ ए गोएठ हर बिस्वास कर लाएक हवे कि, अगर हमरे ओकर संगे मएर गए हवन, त ओकर संगे जीबो करब।

¹² अगर हमरे धीरज कर संगे दुख सहथी, त हमरे ओकर संगे राएज करबो, अगर हमरे ओकर इनकार करथी, त ओहू हर हमर इनकार करही।

¹³ अगर हमन बिस्वास कर लाएक नई हवन, तबोले ओहर बिस्वास कर लाएक बने रथे, काबरकि ओहर अपन सुभाव ला कभों बदल नई सके।

परमेस्वर ला फुरमा करे लाएक सेवक

¹⁴ बिस्वासी मन ला, ए गोएठ मन कर सुरता करुवात रह अऊ परमेस्वर ला हाजीर जाएन के, ओमन के चेताए दे कि कोनो बात ला लेके बंहसा-बंहसी झईन करें, एकस करे ले कोनो फयदा नई मिले, बलकि सुनोईया मन बिगेड़ जाथें।

¹⁵ तंए सत कर बचन ला सही ढंग ले काम में लानबे, त परमेस्वर ला फुरमा करोईया बएन जाबे। एही कस करबे, त तोके लजाए बर नई परही।

¹⁶ जे बक-बक ले परमेस्वर हर फुरमा नई होए, ओमे ले तंए दुरीहां रह काबरकि जेमन अईसना गोएठ-बात में रथें, ओमन परमेस्वर ले अऊ दुरीहां होवत जाथें।

¹⁷ ओमन कर सिक्छा हर, सरहा घाव कस बगरत जाथे। हूमिनयूस अऊ फिलेतुस, एही कस गोएठ बात करोईया में ले हवें।

¹⁸ ओमन सत ले भटेक गईन हवें अऊ ओमन एकस कथें कि मरल मन कर तो जी उठाई होए गईस हवे अऊ ओमन एही कस सिखाए के तनीक झन कर बिस्वास ला, इते-ऊते कएर देथें।

¹⁹ तबोले परमेस्वर कर सत बचन हर, एगोट पका नेंव कस बजर बने रथे अऊ ओ नेंव में ए बचन हर लिखाईस हवे, “परभू अपन मईनसे मन ला जानथे अऊ जेमन परभू कर नांव लेथें, ओमन ला बुराई ले दुरीहां रहे बर चाही।”

²⁰ एगोट बड़खा घर में, सिरीप सोना अऊ चांदी कर भांड़ा नई रहे, बलकि उहां कठवा अऊ माटीयोच कर भांड़ा रथे, कोनो भांड़ा मन खास काम बर रथें अऊ कोनो भांड़ा मन सहज काम बर रथें।

²¹ कहों कोनो हर अपन-आप ला, ए सब बुराई ले दुरीहां राखही, त ओहर खास भांड़ा कस होही। ओहर पबितर होए के, अपन गोंसिया बर काम आही अऊ सब मधे कर बढ़िहां काम बर तियार रही।

²² जवानी परिया में जे बुरा इछा होथे, ओमे ले तंए दुरीहां भाग। जेमन सफा हिरदय ले परभू कर नांव लेथें, ओमन कर संगे तंए परमेस्वर कर आगू में बढ़िहां काम कएर के, बिस्वास अऊ मया में जिनगी जीयत रहबे अऊ सब झन कर संगे मेल-मिलाप से रहबे।

²³ बकिन मुरुख अऊ बिगर मतलब कर बात ले दुरीहां रह, काबरकि तंए जानथस कि एकर चलते झगरा उभरथे।

²⁴ परभू कर सेवक ला झगराहा नई होएक चाही, बलकि ओके सब झन कर उपरे दया करोईया अऊ सिखाए में होसियार अऊ सहनसील होए बर चाही।

²⁵ ओहर सचा उपदेस कर बिरोध करोईया मन ला नरम होए के समझाए। कोन जाने परमेस्वर हर ओहू मन ला, मन फिराए कर मोका दे दे कि ओहू मन सत ला जाएन जाएं।

²⁶ अऊ ओमन सत ला जाएन के सैतान कर फंदा ले छुईट जाहीं, जेहर अपन इछा पूरा करे बर ओमन ला धरीस हवे।