2 थिस्सलुनी 3 - Surgujia Bible

पराथना करे कर बिनती

¹ आखिर में ए भाई-बहिन मन, मंए कहथों कि हमर बर पराथना करा कि परभू ईसू कर बचन हर हालू बगेर जाए अऊ ओहर माएन-मरजाद पाए, जेकस कि तुमन कर मझार में होईस हे।

² अऊ पराथना करा कि परमेस्वर हर हमन ला कसरीहा अऊ दुस्ट मईनसे मन ले बचाए, काबरकि सब मईनसे मन हमर खभेर में बिस्वास नई करें।

³ बकिन परभू हर भरोसा कर लाएक हवे अऊ ओहर तुमन ला बिस्वास में बजर करही अऊ ओ दुस्ट सैतान ले बचाही।

⁴ हमके परभू हर तुमन ऊपरे भरोसा देथे कि जे बात कर अगियां हमरे तुमन के देथन, ओ अगियां मन ला तुमन मानत हवा अऊ हमेसा मानत रईहा।

⁵ परभू हर तुमन कर हिरदय ला, परमेस्वर कर मया में अऊ जे धीरज तुमन के मसीह देथे, ओमे अगुवाई करे।

कोड़िहा मन कर बिरोध में चेतावनी

⁶ ए भाई-बहिन मन, हमर परभू ईसू मसीह कर नांव में तुमन के ए अगियां देहथन कि जे बिस्वासी मन कोड़िहा हवें अऊ जे सिक्छा ला हमर जग ले पाईन हवें, ओकर अनुसार नई चलें, ओमन जग ले अलगे रईहा।

⁷ तुमन खुद जानत हवा कि तुमन ला कईसे हमर कस चाल चले बर चाही, जब हमरे तुमन कर संग रहेन, त अलढेरीहा बएन के नई रहेन।

⁸ अऊ फोकट में हमरे ककरो इहां खाना नई खाएन, बलकि हमरे मेहनत अऊ लगन कर संगे राएत दिन काम-बूता करत रहेन, तेमेकि तुमन में ले ककरो ऊपरे हमन बोझा झईन बनी।

⁹ एकस नईए कि तुमन जग ले हमके मदेत मांगे कर हक नईए, बकिन एकर बर कि हमरे खुद तुमन कर आगू में एगोट नमूना देखाएन कि तुंहू मन हमर कस चाल चला।

¹⁰ जब हमरे तुमन जग रहेन, त तुमन ला एकस कहत रहेन, “अगर कोनो मईनसे हर काम करे में कोड़िहा हवे, त ओहर खाएयो बर झईन पाए।”

¹¹ हमरे एकस सुने हन कि तुमन कर मझारे थोरोक झेमन अलढेरीहा हवें, ओमन कांहीच काम-बूता नई करें, बलकि दूसर कर काम में अड़ंगा डालथें।

¹² अईसना मईनसे मन ला हमरे परभू ईसू मसीह में चेतावथी अऊ समझाथी कि कले-कस अपन काम-बूता कएर के, अपनेच कमाई कर रोटी खईहा।

¹³ त ए भाई-बहिन मन, तुमन भलाई कर काम करे में कभों झईन बिदईहा।

¹⁴ अगर कोनो हर हमर ए चिट्ठी कर बतावल बात ला नई माने, त ओके देखत रईहा अऊ ओकर संगे रहन-बसन झईन करीहा, तेमेकि ओ लजाए जाए।

¹⁵ तबोले ओके बैरी-दूस्मन झईन समझीहा, बकिन भाई-बहिन जाएन के चेतईहा।

ए चिट्ठी कर आखरी जोहार

¹⁶ अब परभू ईसू जेहर सांती देवईया हवे, ओहर खुद तुमन ला सब घनी अऊ सब कती ले सांती देहत रहे। परभू तुमन सब झन कर संगे रहे।

¹⁷ मंए पौलुस, अपन हाथ ले जोहार लिखत हों, मोर सब चिट्ठी में एही चिन्हारी हवे।

¹⁸ हमर परभू ईसू मसीह कर किरपा, तुमन सब झन कर ऊपर होवत रहे।