2 पतरस 3 - Surgujia Bible

ईसू फेर आही

¹ ए मयारू संगता मन, एहर दूसर चिट्ठी लागे, जेला मंए तुमन के लिखत हों। मंए ए दुनों चिट्ठी में ओ बात मन ला सुरता करुवाए के, तुमन कर पबितर हिरदय ला उत्साह करे बर जतन करे हवों।

² मंए चाहथों कि तुमन ओ बचन मन ला सूरता करा, जेहर ढेरेच आगू पबितर अगमजानी मन कर द्वारा कहल गए रहीस, अऊ हमर परभू अऊ उद्धार करोईया कर अगियां ला सूरता करा, जेहर तुमन ला परेरीत मन कर जरिये देहल गए रहीस।

³ सबले आगू, तुमन ए जरूर जाएन लेआ कि आखरी दिन में हंसी मजाक करोईया मन आहीं, जेमन हंसी मजाक कएर के अपन खुद कर खराब ईछा ला पूरा करहीं,

⁴ अऊ ओमन ए कहीं, “ओहर आए कर जबान करे रहीस, बकिन ओकर अवाई कर का होईस? हमर पूरखा मन कर मरे कर समय ले सब चीज हर ओहीच कस हवे, जेकस कि ए संसार कर सुरू ले रहीस।”

⁵ बकिन ओमन जाएन बुईझ के ए गोएठ ला भुलाए जाथें कि तईहा जुग ले परमेस्वर कर बचन कर जरिये, अगास हर बनाल गईस अऊ धरतीयोच हर पानी में ले बनीस अऊ पानी में माढ़ल हवे,

⁶ अऊ ए पानी कर चलते, ओ जुग कर संसार में ढेरेच बड़खा पानी कर बांढ़ आईस अऊ पानी में बूएढ़ के नास होए गईस।

⁷ बकिन ओही बचन कर द्वारा परमेस्वर हर, ए समय कर अगास अऊ धरती ला नियाओ कर दिन तक रहे कर अगियां देहिस हे। ओ दिन अगास अऊ धरती ला आगी में लेसल जाही अऊ भक्ति नई करोईया मईनसे मन ला नास करल जाही।

⁸ ए मयारू संगता मन, ए बात ला झईन भुलईहा, परभू कर नजेर में एक दिन हर एक हजार बछर कर बरोबर हवे अऊ एक हजार बछर हर एक दिन कर बरोबर हवे।

⁹ परभू हर अपन जबान ला पूरा करे में अबेर नई करे, जेकस कि तनीक झन मईनसे मन समझथें; बकिन ओहर तुमन कर बारे में कयास करथे, काबरकि ओहर नई चाहे कि कोनो मईनसे हर नास होए, बलकि ओहर चाहथे कि सबेच झेला मन फिराए कर मोका मिले।

¹⁰ बकिन परभू कर दिन हर चोर कस अचाकन आए जाही। ओही दिन अगास हर एगोट बड़खा गरज कर संगे गायब होए जाही। अऊ जे जाएत अगास में हवे ओहर आगी कर जरिये टघेल जाही। धरती अऊ ओमे कर सब जाएत हर जएर जाही।

¹¹ जब ए सब जाएत हर, एही नियर नास करल जाही, त सोंचा, तुमन के कोन कस बने बर चाही? तुमन के चाही कि पबितर अऊ भक्ति कर संगे जिनगी जीया।

¹² परमेस्वर कर ओ नियाओ कर दिन ला, तुमन के अगुरत रहे बर चाही अऊ ओकर हालू आए बर कोसिस करे बर चाही, ओ दिन अगास हर आगी में जएर के नास होए जाही अऊ अगास कर सब जाएत मन, गरम कर मारे टघेल जाहीं।

¹³ बकिन परमेस्वर कर बात-जबान कर अनुसार हमरे एगोट नांवा अगास अऊ नांवा धरती कर डगर देखत हन, जिहां सिरीप धरमीपन डेरा करही।

जागत रहा अऊ तियार रहा

¹⁴ एकरे बर ए मयारू संगता मन, जब तुमन ए बात मन कर डगर देखथा, त तुमन पूरा कोसिस करा कि परभू कर आगू में बिगर दोस अऊ बिना गलती कर पाए जावा अऊ तुमन के ओकर संगे सांती मिले।

¹⁵ अऊ अपन मन में ए समेझ लेआ कि हमर परभू हर एकर बर धीरज धरथे कि सब मईनसे मन कर उद्धार होए जाए। एही गोएठ ला हमर मयारू भाई, पौलुस हर भी परमेस्वर कर द्वारा देहल बुद्धी कर अनुसार तुमन के लिखीस हवे।

¹⁶ पौलुस हर अपन सबेच चिट्ठी मन में, ए गोएठ मन ला बताईस हवे। बकिन ओकर चिट्ठी मन में तनीक अईसना बात मन हवें, जेला समझे बर कठिन हवे, अनपढ़ अऊ चंचल मईनसे मन एकर गलत मतलब निकालथें, ओमन परमेस्वर कर किताब कर आने बचन कर संगे भी अईसनेच करथें, अऊ एही कस ओमन अपन नास होए कर कारन बनथें।

¹⁷ एकरे बर ए मयारू संगता मन, जब तुमन ए गोएठ मन ला आगू ले जानथा, तेकर ले सवाचेती रहा। तुमन खराब मईनसे मन कर बहकावा में आए के अपन माढ़ल बिस्वास ला झईन गंवाए देईहा।

¹⁸ बलकि हमर परभू अऊ उद्धार करोईया ईसू मसीह कर किरपा अऊ गियान में बढ़त जावा, ओकर महिमा अझरोच ले अऊ जुग-जुग तक होवत रहे। आमीन।