2 कुरिन्थी 9 - Surgujia Bible

यरुसलेम कर गरीब भाई-बहिन मन बर दान देआ

¹ परमेस्वर कर मईनसे मन ला, दान देहे कर सेवकाई कर बारे में, मोके तुमन ला लिखे कर कोई जरूरत नईए ना।

² काबरकि मंए तुमन कर दान देहे कर तियारी कर बारे में जानथों, जेकर चलते मंए तुमन कर बारे में, मकिदुनिया कर रहोईया मन कर आगू में बड़ाई करथों कि आखया कर मईनसे मन एक साल ले तियार हवें, अऊ तुमन कर उत्साह हर कईयो झेमन ला भी उभारीस हवे।

³ बकिन मंए ए भाई मन ला एकर बर भेजत हवों कि हमरे जे बड़ाई तुमन कर बारे में करथी, ओहर बेकार झईन होए, बकिन जईसना मंए ओमन ला कहे हवों, वईसनेच तुमन तियार रईहा।

⁴ अईसना झईन होए कि मकिदुनिया कर रहोईया में ले, कोई मोर संगे आए के देखहीं कि तुमन तियार नई हवा, त तुमन कर उपरे एतना भरोसा करे कर पाछू भी हमर बेजती होही। तुमन के ओकर ले कोई फरक नई पड़ही?

⁵ तेकर ले मंए भाई मन ला एकस बिनती करे बर जरूरी समझें कि ओहर आगू ले तुमन जग जाए, अऊ ओ दान जेकर बारे में तुमन आगू ले जबान देहे रहा, तियारी कएर के राखा अगर एकस करीहा, त सब कोई समझ जाहीं कि एहर दबाओ ले देहल दान नहीं, बलकि हरक दिल ले देहल दान हवे।

हरक दिल ले दान देईहा

⁶ ए बात ला सुरता राखा; जेहर थोरहें बुनथे ओहर थोरहें काटही अऊ जेहर ढेर बुनथे, ओहर ढेर काटही।

⁷ हर एक झन जेकस मन में ठाने, वईसनेच दान करे, न कि कुड़कुड़ाए के अऊ न दबाओ ले, काबरकि परमेस्वर हर ढेरेच खुसी ले देवईया मन ले मया करथे।

⁸ परमेस्वर हर तुमन ला सब मधे कर आसीस, भरपूरी ले देहे में सामर्थी हवे, तेकर ले तुमन ला कभों कोनो चीज कर कमी नई होही अऊ सब सुघर काम बर तुमन जग भरपूरी ले रही।

⁹ जेकस पबितर किताब में लिखल हवे, “ओहर अपन हरक दिल ले कंगाल मन ला दान देहीस, ओकर दया हर हमेसा बने रही।”

¹⁰ जे परमेस्वर हर बुनईया ला बिहन अऊ खाए बर रोटी देथे, ओहर तुमन ला बुने बर बिहन देही अऊ ओला फरुवाही; अऊ तुमन कर धरमीपन कर फसल ला बढ़ाही।

¹¹ एही कस तुमन हर मधे ले धनी होए के हरक दिल ले दे सखिहा, जेकर चलते हमर द्वारा परमेस्वर कर धनबाद होए।

¹² काबरकि ए सेवा ला पूरा करे ले, परमेस्वर कर मईनसे मन कर कमी घटी हर पूरा होही, ओकर संगे-संगे मईनसे मन कती ले परमेस्वर कर भी ढेरेच धनबाद होही।

¹³ तुमन मसीह कर सुघर खभेर ला माएन के, ओकर अनुसार चलत हवा अऊ हरक दिल ले तुमन ओमन ला अऊ दूसर सबो झन ला दान देहत हवा, ए सेवा कर द्वारा तुमन अपन आप ला साबित कएर चुके हवा, तेकर ले मईनसे मन परमेस्वर कर महिमा करहीं।

¹⁴ तुमन कर उपरे परमेस्वर कर ढेरेच बगरा किरपा होईस हवे। ओला हमन में ले कोई नापे नई सकें, तेकर ले ओमन तुमन जग भेंटाए बर, बड़ा ईछा ले पराथना करथें।

¹⁵ परमेस्वर कर धनबाद होए ओकर ओ दान बरीक, जेकर बयानकरे बर नई सकाय।