2 कुरिन्थी 8 - Surgujia Bible

हरक दिल ले दान देहे बर हवे

¹ ए भाई-बहिन मन, हमरे चाहथी कि तुमन ओ किरपा कर बारे में जाएन लेआ, जेला परमेस्वर हर मकिदुनिया कर कलीसिया मन ला देहीस हवे।

² दुख कर भारी परीछा में अऊ ढेरेच गरीबी में रहत घनी भी ओमन बड़ा आनंद कर संगे, हरक दिल ले दान देहे में कमी नई करीन।

³ ओमन कर बारे में मोर ए गवाही हवे कि ओमन जेतना दे सकत रहीन, ओतना देहीन एतनेच नहीं, बलकि अपन अवसान ले भी बगरा अपन पूरा ईछा ले देहीन।

⁴ ओमन परमेस्वर कर मईनसे मन कर मदेत करे में अपन भागीदार होए बर, हमर जग बड़े ईछा ले बिनती करीन।

⁵ ओमन हरक दिल ले दान देहे में हमर आसा ले ढेर बगरा देहीन, ओमन पहिले अपन आप ला परभू ला सोंएप देहींन, तेकर परमेस्वर कर ईछा कर अनुसार अपन-आप ला हमूच के सोंएप देहीन।

⁶ एकर बर हमरे तीतुस ले बिनती करेन कि ओहर पहिले तुमन कर मंझार में, जे दान लेहे कर काम ला सुरू करे रहीस, ओला पूरा भी कएर ले।

⁷ जेकस तुमन हर बात में मनेकि बिस्वास में, बचन परचार करे में, गियान में अऊ सब मधे कर उत्साह में अऊ ओ मया में जेला हमर जग राखथा, आगू बएढ़ गए हवा, ओईसनेच ए दान देहे कर काम में भी तुमन ला आगू बढ़ जाए बर चाही।

⁸ मंए तुमन ला कोई अगियां नहीं देहथों, बकिन दूसर कर उत्साह ले तुमन के, ए साबित करे बर कहथों कि तुमन सच में मया करथा कि नहीं।

⁹ तुमन हमर परभू ईसू मसीह कर किरपा ला जानत हवा कि ओ धनी होए के भी तुमन बर कंगाल बएन गईस, ताकि ओकर कंगाल होए ले तुमन धनी होए जावा।

¹⁰ ए बात में मोर सलाव एही हवे कि तुमन बितल बछर में जे काम ला सुरू करे बर चाहत रहा अऊ सुरू भी करे रहा, अब ओला पूरा करे में ही तुमन कर फयदा हवे।

¹¹ एकरले तुमन अब ए काम ला, जे उतसुकता कर संगे पूरा करे कर ईछा करे रहा, ओही उतसुकता कर संगे एला पूरा भी करा। अपन-अपन अवसान कर अनुसार दान देके एला पूरा करे में तुमन बर बढिहां हवे।

¹² काबरकि अगर तुमन के अपन अवसान कर अनुसार दान देहे कर ईछा हवे, त जे कुछ भी देईहा, ओला परमेस्वर अपनाही। परमेस्वर हर ककरो ठन, ए आसा नई करे कि ओहर अपन अवसान ले बगरा दान दे।

¹³ हमरे ए नई चाहथन कि तुमन ऊपर बोझ पड़े अऊ दूसर झेमन ला सुख मिले, बकिन हमरे चाहथन कि सब झन ला बरोबर मिले बर चाही।

¹⁴ अब तुमन कर बढ़ती हर ओमन कर घटी में काम आए, ताकि पाछू ओमन कर बढ़तियोच हर तुमन कर घटी में काम आए अऊ एही कस बराबरी होए जाए।

¹⁵ जेकस पबितर किताब में लिखल हवे, “जेहर ढेरेच बटोरीस, ओकर जग बगरा नई निकलीस अऊ जेहर थोरहें बटोरीस ओके तनिको कमी नई होईस।”

दान लेहे बर तीतुस ला भेजथें

¹⁶ परमेस्वर कर धनबाद होए, जेहर तुमन बर तीतुस कर हिरदय में ओहीच उत्साह ला डाल देहिस, जेहर मोर में हवे।

¹⁷ तीतुस हर हमर बिनती ला सुईन लेहीस अऊ अब ओहर अपन पूरा ईछा ले, ढेरेच उत्साह कर संगे तुमन जग आवत हवे।

¹⁸ हमरे तीतुस कर संगे दूसर एगोट भाई ला भी भेजे हन। ओ भाई हर सुघर खभेर कर परचार बढिहां ले करथे, तेकर ले सब कलीसिया कर मईनसे मन ओकर बड़ाई करथें।

¹⁹ एतना ही नहीं, बकिन कलीसिया मन कर द्वारा ओ भाई हर ठहराल गईस हवे, ताकि ए दान कर सेवा बर हमर संगे जाए। ए सेवा कर काम हर हमर द्वारा खुद परभू कर महिमा बर अऊ हमर मन कर तियारी ला परगट करे बर करल जाथे।

²⁰ हमरे ए बात में सचेत रहथी कि उदारता कर दान कर जे सेवा हमरे करथी, ओकर बारे में कोनो हमर ऊपरे दोस झईन लगाए पाए।

²¹ काबरकि सिरीप परभू कर नजेर में नहीं, बकिन मईनसे मन कर नजेर में भी हमरे सुघर बेवहार करे कर धियान रखथी।

²² ए दुनो झन कर संगे हमरे अपन एगोट अऊ भाई ला भेजत हन, जेके ला हमरे बार-बार परख के, ढेरेच बात में उतसुक पाएन; अब तुमन कर उपरे ओके ढेरेच भरोसा हवे, एकर चलते ओहर अऊ ढेरेच उत्सुक हवे।

²³ अगर कोई तीतुस कर बारे में पूछथे, त बतावा कि ओहर मोर संगी अऊ तुमन कर मझार में मोर संगे सेवा करोईया लागे; अऊ अगर हमर भाई मन कर बारे में पूछथें, त ओमन कलीसिया मन कती ले भेजल मईनसे मन अऊ मसीह कर महिमा लागें।

²⁴ तेकर ले अपन मया अऊ तुमन कर बारे में हमर जे बड़ाई हवे, ओला ए मईनसे मन कर आगू में साबित करा, ताकि कलीसिया मन एला देख सकें।