2 कुरिन्थी 7 - Surgujia Bible

¹ ए दुलरवा भाई-बहिन मन, जब ए बात-जबान हर हमके परमेस्वर जग ले मिलीस हवे, त आवा हमरे अपन देंह अऊ आत्मा ला असुध करोईया सब चीज ले अपन आप ला सुध करी अऊ परमेस्वर कर भय मानत अपन जिनगी ला पूरा पबितरता कर संगे बिताई।

पौलुस कर आनंद

² हमके ला तुमन अपन हिरदय में जघा देआ। हमरे न तो ककरो संगे अनियाए करे हन, न ककरो कांही बिगाड़े हन अऊ कोनो के ठगलो नई हन।

³ मंए तुमन ला दोसी ठहराए बर एकस नई कहथों। काबरकि मंए आगुवे ले कह चुके हों कि तुमन हमर हिरदय में अईसना, बएस गए हवा कि हमरे तुमन कर संगे जीए मरे बर भी तियार हवन।

⁴ मंए तुमन जग ढेरेच भरोसा कर संगे गोठियात हवों, मोके तुमन ऊपरे बड़ा घमंड हवे; मोके एमें भरपूर दिलासा मिलथे। तुमन ला सुरता करे घनी मंए अपन सब संकट में भी आनंद ले ढेरेच भरपूर रथों।

⁵ काबरकि हमरे जब मकिदुनिया में आएन, तबो ले हमर देंह ला कोनो आराम नई मिलीस, बकिन हमन चाएरो कती ले दुख पात रहेन; बाहरी तो लड़ाई होवत रहीस अऊ हमर भीतरी में डर बने रहीस।

⁶ तबो ले उदास मईनसे मन ला दिलासा देवईया परमेस्वर हर, तीतुस कर आए कर द्वारा हमन ला दिलासा देहीस।

⁷ हमन ए दिलासा ला सिरीप तीतुस कर आए ले नहीं, बलकि ओकर ओ दिलासा ले भी मिलीस, जेहर ओके तुमन कती ले मिलीस हवे। मोर जग मिले कर तुमन कर ढेरेच ईछा अऊ तुमन कर बड़ा दुख अऊ मोर बर तुमन कर धुन कर खभेर ला, तीतुस हर हमके सुनाईस अऊ एला सुईन के मंए ढेरेच खुस होएं।

⁸ काबरकि मोर चिट्ठी कर द्वारा तुमन ला दुख पहुंचीस, बकिन मंए ओकर बर नई पछतावत हवों, पहिले मंए जरूर पछतावत रहें, काबरकि अब मंए देखथों कि ओ चिट्ठी ले तुमन के दुख तो पहुंचीस, बकिन ओहर तनिक जुआर बर रहीस अब मंए ढेरेच खुस हवों;

⁹ एकर बर नहीं कि तुमन के दुख पहुंचीस, बकिन एकर बर कि तुमन ओ दुख कर चलते मन फिराया, काबरकि तुमन कर दुख हर, परमेस्वर कर ईछा कर अनुसार रहीस कि हमर चलते तुमन के कोनो बात में नुकसान झईन पहुंचे।

¹⁰ काबरकि परमेस्वर कर इछा कर अनुसार दुख सहे ले पछतावा होथे, जेहर हमके उद्धार कती ले जाथे अऊ फेर पछताए बर नई परे। बकिन संसार हर जे दुख देथे ओहर हमके मिरतु कती ले जाथे।

¹¹ एकरले देखा, परमेस्वर कर ईछा अनुसार मिलल ए दुख हर तुमन के केतना उतसुकता अऊ अपन-आप ला निरदोस साबित करे बर बड़ा चाहत अऊ अनियाए कर कारन अईसना रीस अऊ संकट कर चलते अईसना सवाचेती अऊ बड़ा ईछा अऊ मोर जग भेंट करे बर अईसना तेज लालसा अऊ सही नियाओ चुकाए कर ईछा पैदा करीस हवे? ए सब चीज मन ले तुमन अपन-आप ला निरदोस साबित करे हवा।

¹² मंए तुमन ला ओ चिट्ठी एकर बर नई लिखे रहें कि मोके अनियाए करोईया, चाहे अनियाए सहोईया कर चिंता रहीस, बकिन एकर बर लिखे हों कि परमेस्वर कर आगू में तुमन एला बढियां ले जान लेआ कि हमर बर तुमन कर केतना लगाव हवे।

¹³ एकरले हमके दिलासा मिलीस। हमर ए दिलासा कर अलावा तीतुस कर आनंद ला देख के, हमरे अऊरेच आनंदित होए गएन, काबरकि तुमन सब झन कर चलते, ओकर चोला हर हरियर होए गईस।

¹⁴ काबरकि मंए तीतुस कर आगू में तुमन कर बड़ाई करे रहें, अऊ एकर बारे में मोके लजाए बर नई परीस, बकिन जेकस हमरे तुमन जग हमेसा सही गोठियात हन, ओईसने तुमन कर बारे में हमर बड़ाई हर, तीतुस कर आगू में सही साबित होईसे।

¹⁵ तुमन सबो झन ओकर उपदेस ला मानत रहा अऊ कईसना माएन-मरजाद कर संगे ओकर पहुनाई करा; ए सब जाएत ला सुरता करके, ओकर मया हर तुमन बर अऊरेच बढ़ जाथे।

¹⁶ मंए ढेरेच खुस हवों, काबरकि सब बात में तुमन ऊपरे मोके पूरा भरोसा हवे।