2 कुरिन्थी 6 - Surgujia Bible

¹ हमरे परमेस्वर कर संगे काम करोईया कर रूप में, तुमन जग बिनती करथन कि परमेस्वर जग ले मिलल किरपा ला, बेकार झईन जाए देआ।

² “मोर मदेत करे कर सही समय में, मंए तोर बिनती ला सुईन लेहें अऊ उद्धार कर दिन मंए तोर मदेत करें।” अईसना परमेस्वर हर कहीसे, देखा, अझेर परमेस्वर कर मदेत करे कर सही समय हवे; देखा, अझेर ओ उद्धार कर दिन हवे।

³ हमरे ककरो बात में ठेस पहुंचाए कर, कोई भी मोका नई देथी कि हमर सेवा में कोई बईदनामी झईन आए।

⁴ बकिन सब बात में हमरे परमेस्वर कर सेवक मन कस, अपन सुघर गुन ला परगट करते रथी; हमरे दुख, गरीबी अऊ संकट ला बड़े धीरज कर संगे सहेन,

⁵ हमके कोड़ा में मारीन, जेहल में डालीन, हमर ऊपरे भीड़ हर हंगामा मचाईस। हमरे ढेरेच मेहनत करेन, हमरे राएत-राएत भेर जागे रहेन अऊ भूखे-पियासे रहेन।

⁶ पबितर आत्मा कर मदेत ले हमरे सब कुछ करेन, हमरे पबितर बने रहेन, हमरे बचन कर गियान ला इमानदारी कर संगे सिखाएन, हमरे ढेरेच कुछ सहेन, हमरे दया अऊ सचा मया ला देखाएन।

⁷ परमेस्वर कर सामर्थ ले हमरे सत बचन कर बिरोधी मन कर सामना करेन, अईसना कएर के हमरे अपन आप ला परमेस्वर कर लाएक सेवक साबित करेन अऊ ओकर नजेर में सुघर जिनगी जीए कर हथियार मन ला, जवनी अऊ डेरी हाथ में लेके तियार रहेन।

⁸ आदर अऊ अनादर, बड़ाई अऊ बईदनामी, ए सब जाएत हर हमके मिलीसे। हमरे सही गोठियाथी, तबो ले हमर संगे झूठा मन कस बरताव करथें;

⁹ हमके सब कोई जानथें, तबो ले हमरे अनजान मन कस हवन, हमरे मरल कस हवन, तबो ले देखा, हमरे जीयत हवन, मार खवईया मन कस हवन, बकिन हमरे मारल नई जान।

¹⁰ हमन दुखी तो हवन, तबो ले हमेसा खुस रथन। हमन गरीब मन कस तो हवन, तबो ले ढेरे झेमन ला धनवान बनाए देथन; हमर जग कांहीच नईए तबो ले हमरे सब जाएत राखथन।

¹¹ ए कुरिन्थ कर भाई-बहिन मन, हमन तुमन जग खुईल के गोठियाए हन अऊ हमर हिरदय ला तुमन बर खोएल के राएख देहे हन।

¹² तुमन बर हमर मया हर कम नई होईसे, बकिन तुमन हमर जग मया करे बर कम कएर देहे हवा।

¹³ बकिन अपन लईका जाएन के, मंए तुमन जग कहथों कि एकर बदले में तहूंच मन हमर बर, अपन हिरदय ला खोल के बात करता, तेहर ठीक रहतीस ना।

अबिस्वासी मन कर संगे गहरा नाता झईन राखा

¹⁴ अबिस्वासी मन कर संगे गहरा नाता झईन राखा, काबरकि सही काम अऊ दुस्ट काम कर का मेल-जोल? चाहे इंजोर अऊ अंधार कर का संगती?

¹⁵ मसीह अऊ बलियाल कर सोंच विचार में का मेल हवे? चाहे बिस्वासी कर अबिस्वासी कर संगे का नाता?

¹⁶ परमेस्वर कर मंदिर अऊ मूरती मन कर संगे का नाता? काबरकि हमरे तो जीयत परमेस्वर कर मंदिर लागन, जेकस परमेस्वर हर कहीस हवे, “मंए ओमन में बसहूं अऊ ओमन में रेंगहूं बुलहूं, अऊ मंए ओमन कर परमेस्वर होहुं अऊ ओमन मोर मईनसे होहीं।”

¹⁷ तेकर ले परभू हर कथे, “ओमन कर मझार में ले निकला अऊ अलग रहा। अऊ असुध चीज ला छुबो झईन करा, तब मंए तुमन ला अपनाहूं।

¹⁸ अऊ मंए तुमन कर दाऊ होहुं अऊ तुमन मोर बेटा अऊ बेटी होईहा, एहर सबले सक्तिदार परभू कर बचन लागे।”