2 कुरिन्थी 5 - Surgujia Bible

हमरे सरग कर घर बर ईछा करथन

¹ हमरे जानथी कि हमर देंह, जेहर धरती कर डेरा कस हवे। अगर ओहर नास होए जाही, त हमके ला दूसर एगोट आत्मिक देह सरग में मिलही, जेहर हमेसा रहेदार एगोट घर कस हवे। ओहर मईनसे मन कर हाथ ले बनावल नईए, बलकि परमेस्वर द्वारा बनावल हवे।

² अब ए डेरा में तो हमरे कलपत रथन, अऊ एकर संगे अपन सरग कर घर, मनेकि आत्मिक देंह ला पाए कर ढेरेच ईछा करथन।

³ ताकि एकर पहिरे ले हमरे लंगरा नई पाए जाबो।

⁴ ए डेरा सहींक देंह में रहत ले हमरे अपन सारिरीक देंह कर छुटकारा पाए बर नई कलपथी, बलकि हमरे अपन सरग कर देंह ला नावा ओढ़ना कस पहिरे बर, बोझ ले दबल कलपत रथी, ताकि नासमान देंह हर, अमर जिनगी कर देंह में बदेल जाए।

⁵ परमेस्वर हर खुद ए उदेस बर हमके ला तियार करीसे, अऊ ओही परमेस्वर हर हमके ला बयाना कर रूप में पबितर आत्मा भी देहिसे।

⁶ एकरे बर हमरे हमेसा हिमेत कर संगे रथन। हमरे एला जानथन कि जब तक हमरे ए देंह में रथन, तब तक हमरे परभू ले दुरीहां रथन।

⁷ काबरकि हमरे आंखी कर देखल बात मन ले नहीं, बकिन बिस्वास कर द्वारा चलथन।

⁸ हमके ला तो हिमेत हवे अऊ हमरे ए देंह ले अलग होए के, परभू कर संगे रहे बर अऊ ढेर पसंद करथन

⁹ तेकर ले, चाहे हमरे ए देंह में रही, चाहे ए देंह ले अलग रही, हमर एकेच ठन ईछा ए हवे कि हमरे परभू ला खुस करते रही।

¹⁰ काबरकि हमन सबो झन ला मसीह कर नियाओ कर सिहासन कर आगू में हाजीर करल जाही, ताकि हर एक मईनसे देंह में रईह के जे काम करीसे, चाहे भलाई कर काम होए, चाहे बुराई कर, ओला ओकर परतिफल मिले।

मसीह कर जरिए परमेस्वर कर संगे मेल-मिलाप

¹¹ एकरे बर, हमरे परभू कर भय मानथी अऊ हमरे मईनसे मन ला समझाए कर कोसिस करथी। हमर सब दसा ला परमेस्वर हर पूरा तरह ले जानथे अऊ मोके आसा हवे कि तुमन कर बिवेक हर भी हमके ला पूरा तरह ले जानथे।

¹² हमरे तुमन कर आगू में फेर अपन-आप कर बड़ाई करे कर कोसिस नई करथन, बकिन हमरे तुमन ला हमर बारे में आदर करे कर ए मोका देहत हन, ताकि जेमन कर बात हर हिरदय कर बात मन कर उपरे नहीं, बकिन मईनसे मन कर दिखावटी बात में घमंड करथें, तुमन ओमन ला जबाब दे सका।

¹³ अगर तुमन कर नजर में हमर उपरे सुईध-बुईध नईए, त एहर परमेस्वर बर हवे अऊ अगर हमरे सुईध-बुईध में हवन, त एहर तुमन कर भलाई बर हवे।

¹⁴ ए दुनों में मसीह कर मया हर हमके ला मजबूर करथे। हमरे तो एला समझ गए हवन कि जब एक झन मसीह हर सब झन बर मरीस, तेकर ले सब झन मएर गईन।

¹⁵ अऊ मसीह हर सबो झन बर मरीस, ताकि जेमन जियथें, ओमन अब अपन बर नहीं, बकिन मसीह बर जियें, जेहर ओमन बर मरीस अऊ फेर जी उठीस।

¹⁶ तेकर ले अब हमरे संसारिक नजर ले कोनो के नई समझी। हओ, एक समय रहीस जब हमरे संसार कर नजर ले समझत रहेन कि मसीह सिरीप एगोट मईनसे रहीस, बकिन अब हमरे मसीह ला अईसना नई समझी।

¹⁷ तेकर ले अगर कोनो मईनसे हर मसीह कर अपन बएन गईसे, त ओहर नावा मईनसे होए गईसे, पुराना बात मन सब बीत गईन, देखा सब बात मन नांवा होए गईन।

¹⁸ ए सब बात हर परमेस्वर कर द्वारा होईस, जेहर मसीह कर जरिए अपन संगे हमर मेल-मिलाप कराईस अऊ ओही हर मेल-मिलाप कर सेवा बर हमके ठहराईस।

¹⁹ एकर मतलब ए हवे कि परमेस्वर हर मईनसे मन कर अपराध कर दोस, ओमन ऊपरे नई लगाईस, अऊ ओहर मसीह कर जरिए अपन संगे संसार कर मेल-मिलाप कएर लेहीस, अऊ ए मेल-मिलाप कर खभेर कर परचार ला हमके सोंएप देहीस।

²⁰ तेकर ले हमके मसीह कर बारे में बताए बर, परमेस्वर हर अपन राजदूत कर रूप में ठहराईस अऊ परमेस्वर हर हमर जरिए, तुमन जग बिनती करत हवे, हमरे मसीह कती ले तुमन जग बिनती करत हवन कि तुमन परमेस्वर कर संगे मेल-मिलाप कएर लेआ।

²¹ मसीह जेहर कोनो पाप नई करे रहीस, ओके ला परमेस्वर हर हमर बर पापबली ठहराईस, ताकि मसीह कर जरिए, परमेस्वर कर नजेर में हमरे बेकसूर बएन जाई।