2 कुरिन्थी 4 - Surgujia Bible

माटी कर भाड़ा में राखल धन

¹ परमेस्वर कर दया ले हमके ला ए सेवा कर काम हर सोंपल हवे, त हमरे हिमेत नई हारी।

² बकिन हमरे लाज लगाऊ गुप्त काम मन ला छोएड़ देहे हन, हमरे नई ठगी अऊ परमेस्वर कर बचन में मिलावट नई करी, बकिन सचाई ला परगट करथी। ए बात ला हर एक मईनसे ला अपन बिवेक में अपनाए बर हवे, एकर चलते अपन-आप ला परमेस्वर कर आगू में सोंपथी।

³ अगर हमर सुघर खभेर में परदा परीसे, मनेकि ककरो बर एहर लुकावल हवे, त एहर नास होवईया मन बर ही लुकावल हवे।

⁴ सैतान जेहर ए संसार कर ईसवर लागे, ओहर ओ नास होवईया मईनसे मन कर मन ला अंधार कएर देहीस हवे, एकरले मसीह जेहर परमेस्वर कर ओही रूप लागे, ओकर तेजोमय सुघर खभेर कर इंजोर हर ओमन कर ऊपरे नई चमकही।

⁵ काबरकि हमन अपन बारे नहीं, बकिन मसीह ईसू कर बारे में परचार करथी कि ओहर परभू लागे, अऊ अपन बारे में एकस कहथी, कि हमन ईसू कर चलते तुमन कर सेवक लागी।

⁶ तेकर ले परमेस्वर हर खुद अगियां देहिसे, “अंधार में ले इंजोर चमके,” अऊ ओही परमेस्वर हर हमर हिरदय ला अपन इंजोर ले चमकाए देहीस, जेकर चलते हमरे परमेस्वर कर ओ महिमा ला जाएन जाई, जेहर ईसू मसीह कर चेहरा उपरे चमकथे।

⁷ बकिन हमर जग ए किमती खजाना हवे, जेहर माटी कर भाड़ा मन में राखल हवे, जेकर चलते ए परगट होए जाही कि ए सबले बड़खा सामर्थ हर हमर अपन ना लागे, बलकि परमेस्वर कर लागे।

⁸ हमरे चाएरो कती ले ढेरेच दुख तो भोगथी, बकिन नई टुटथी, हमरे ढेरेच परेसान होथी, तबो ले निरास नई होई।

⁹ हमरे सताल तो जाथी बकिन छोड़ल नई जाई, गिराल तो जाथी बकिन नास नई होई।

¹⁰ हमरे ईसू कर मिरतु ला अपन देंह में सब घरी लेके चलथी, ताकि ईसू कर जीवन हर भी हमर देंह में दिखे।

¹¹ हमरे जीते-जीयत हमेसा ईसू कर चलते, मिरतु कर हाथ में सोंपल जाथी, ताकि ओकर जीवन हर भी हमर नास होवईया देंह में दिखे।

¹² एही कस देंह कर मिरतु हर तो, हमर ऊपरे काम करथे अऊ अमर जीवन हर तुमन उपरे काम करथे।

¹³ परमेस्वर कर किताब में लिखल हवे, “मंए बिस्वास करें, तेकर ले मंए गोठियाएं।” हमरोच में ओही कस बिस्वास हवे, तेकर ले हमरे गोठियाथी।

¹⁴ काबरकि हमरे जानथी, ओ परमेस्वर जेहर परभू ईसू ला मरल में ले जियाईस, ओहर हमू मन ला ईसू कर संगे जियाही अऊ तुमन कर संगे हमके ला अपन आगू में हाजीर करही।

¹⁵ हमर ए दुख भोगाई हर तुमन कर फएदा बर हवे, ताकि जेकस परमेस्वर कर किरपा हर ढेरेच झन मईनसे में फईलते जाथे, ओही कस परमेस्वर कर महिमा बर, धनबाद करोईया मन कर गिनती हर बढ़ते जाए।

जेहर नई दिखत हवे ओकरेच ऊपरे धियान लगावा

¹⁶ तेकर ले हमरे हिमेत नई हारी। हमर बाहरी मईनसे कर इस्थिति हर भले ही नास होवत जाथे, तबो ले हमर भीतरी मईनसे कर इस्थिति हर रोज-रोज नावा होवत जाथे।

¹⁷ काबरकि हमर ए दुख हर तनिक जुआर बर हवे, एकरले एहर छोटे हवे अऊ एहर हमेसा कर महिमा बर हमके ला तियार करथे, जेकर तुलना नई कएर सकी;

¹⁸ तेकर ले हमरे जेहर दिखत हवे, ओकर ऊपरे नहीं, बलकि जेहर नई दिखत हवे ओकरेच ऊपरे धियान लगाथन; काबरकि जेहर दिखथे, ओहर तनिक जुआर बर रथे, बकिन जेहर नई दिखे ओहर हमेसा बने रथे।