2 कुरिन्थी 3 - Surgujia Bible

नावा करार कर सेवक मन

¹ का हमरे फेर अपन बड़ाई करे बर सुरू कएर देहेन? आखिर तनिक आने मईनसे मन कस, हमके ला तुमन जग सिफारिस कर चिट्ठी लाने बर आखिर तुमन जग ले, ले जाए कर जरूरत हवे का?

² हमर चिट्ठी तो तुहींच मन लागा, जेहर हमर हिरदय में लिखाईस हवे अऊ ओला सब मईनसे मन जानथें अऊ पढ़थें।

³ तुमन फुरोंच में मसीह कर ओ चिट्ठी लागा, जेमन हमर सेवा कर फल लागा, ओ चिट्ठी ला सियाही ले नहीं, बकिन जियत परमेस्वर कर आत्मा ले लिखल हवे, एहर पखना कर पटिया मन में नहीं, बकिन मईनसे कर हिरदय कर पटिया मन में लिखल हवे।

⁴ ए बात कर बारे में मसीह कर जरिए, परमेस्वर कर ऊपरे हमर बढिहां भरोसा हवे।

⁵ सब जाएत हर अपन कती ले होअत हवे, अईसन दावा करे कर लाएक हमरे नई हवन, बकिन हमके ला लाएक बनोईया परमेस्वर ही हवे,

⁶ ओहर हमके ला एगोट नांवा करार कर सेवक होए कर लाएक बनाईसे, अऊ ए नांवा करार हर आकछर मन में लिखल कानहूंन कर आधार में नईए, बकिन एहर पबितर आत्मा कर आधार में हवे, काबरकि लिखल कानहूंन हर मिरतु लानथे, बकिन पबितर आतमा हर जीवन देथे।

⁷ ओ करार कर सेवकाई जेहर मिरतु ला लानथे, आकछर मन ला पखना कर पटिया उपरे कोएड़ के लिखल गए रहीस, अऊ ओकर देहे जाए घरी परमेस्वर कर महिमा हर परगट होईस। इहां तक कि मूसा कर चेहरा कर तेज हर, जेहर कम होवत जात रहीस, तबो ले ओहर एतना तेज रहीस, कि इसराएल कर मईनसे मन ओके ला एक ढीठ देखे नई सकत रहीन। अगर ओ करार कर सेवकाई, जेहर मिरतु ला लानथे, अईसन महिमा कर सगे आथे,

⁸ त पबितर आत्मा कर करार कर सेवकाई हर ओकर ले ढेर महिमा ले भरल काबर नई होही?

⁹ काबरकि परमेस्वर कर देख में दोसी ठहरोईया करार कर सेवकाई हर एतना महिमा ले भरल रहीस, त ओकर नजेर में बेकसूर ठहरोईया करार कर सेवकाई हर अऊ ढेरेच महिमा ले भरल काबर नई होही?

¹⁰ अझे कर करार कर महिमा कर तेज कर आगू में, ओ पहिले कर करार कर महिमा हर अझे बिना तेज कर होए गईसे।

¹¹ अगर ओ करार हर जेहर तनिक जुआर बर देहल गईस, ओहर एतना महिमा ले भरल रहीस, त जेहर हमेसा ईसथिर रही, ओहर केतना बगरा महिमा ले भरल होही?

¹² हमके ला एही भरोसा हवे, एकर चलते हमरे हिमेत कर संगे सेवकाई करथी।

¹³ इसराएली मन मूसा कर चेहरा कर तेज ला झईन देख सकें, जेहर आखरी में कम होवत जात रहीस, एकरले मूसा हर अपन चेहरा में परदा डाले रहीस, हमरे ओ मूसा कस नई हवन।

¹⁴ बकिन इसराएली मन कर मन हर बजर होए गए रहीस, काबरकि आजियो ले जब ओमन ओ जूनहा करार ला पएढ़ के सुनाथें, त ओमन कर मन में ओही परदा हर पड़े रथे। ओ परदा हर हटीस नईये काबरकि ओ परदा ला मसीह हर ही हटाए सकथे।

¹⁵ आजियो ले जब मूसा कर किताब ला पढ़ल जाथे, त ओमन कर मन में परदा पड़े रथे।

¹⁶ बकिन जब कोनो हर, पाप ला छोंएड़ के परभू जग फिर आथे, त ओ परदा ला हटाए देहल जाथे।

¹⁷ परभू तो आत्मा लागे, अऊ जिहां परभू कर आत्मा हवे, उहां आजादी हवे।

¹⁸ अब हमर चेहरा ले परदा ला हटाए देहल गईसे अऊ परभू कर महिमा हर अएना कस हमर द्वारा चमकथे, ओ महिमा कर संगे जेहर हमेसा बढ़ते जाथे, हमरे परभू कर रूप में बदलते जाथी अऊ ए महिमा हर परभू कती ले आथे, जेहर आत्मा लागे।