2 कुरिन्थी 2 - Surgujia Bible

¹ एकरले मंए अपन मन में ठान लेहे हों, कि मंए फेर तुमन ला दुख देहे बर तुमन जग नई आओं।

² काबरकि मंए तुमन ला दुखी करहूं, त फेर मोके खुसी देवईया कोन होही? सिरीप तुहीच मन मोके खुसी देवईया लागा, जेमन ला मंए दुखी करें।

³ मंए ए गोएठ ला तुमन के एकर बर लिखें कि मोर आए ले, जेमन ले मोके खुसी मिले बर चाही, ओमन मोके दुखी झईन बनाएं, काबरकि मोके तुमन सब झन कर ऊपरे, एही बात कर भरोसा हवे, कि तुमन सब झन कर आनंद हर मोरोच आनंद लागे।

⁴ मंए तुमन ला ढेरे दुख अऊ टुटल मन ले अऊ ढेरेच आंसू बहाए के लिखे रहें, मंए तुमन ला दुखी करे बर नई लिखे रहें, बलकि एकर बर लिखें कि तुमन जाएन लेआ कि मंए तुमन ठे केतना मान मया करथों।

पापी मईनसे ला छमा करा

⁵ अगर तुमन में ले कोनो हर दुख देहीसे, त ओहर मोके नहीं, बलकि एक मधे ले तुमन सबो झन ला दुख देहीसे। (मंए एकर बारे में एकरले बगरा अऊ कांही कहे बर नई चाहथों।)

⁶ एकस मईनसे ला जे सजा तुमन में ले ढेरेच झेमन देहीन हवें, ओहर ओकर बर काफी हवे।

⁷ अब तुहींच मन ओकर पाप ला छमा करा अऊ दिलासा देआ, कहों अईसना झईन होए कि ओ मईनसे हर, ढेरेच दुख में डूईब जाए।

⁸ एकरे बर मंए तुमन जग बिनती करत हवों, कि ओकर जग अपन मया ला देखाए देआ।

⁹ काबरकि मंए एकरेच बर लिखे रहें, कि तुमन ला परख लेओं कि तुमन मोर सब बात मन ला, माने बर तियार हवा कि नहीं।

¹⁰ अगर तुमन कोनो ला छमा करथा, त महूंच ओला छमा करथों अऊ जे कुछ ला मंए छमा करे हवों, मंए मसीह कर सेवक कर रुप में, तुमन कर चलते छमा करे हवों,

¹¹ ताकि सैतान कर कोनो चाल हर हमर ऊपरे सफल झईन होए, काबरकि हमरे ओकर चाल मन ला बढ़िहां ले जानथी।

¹² जब मंए मसीह कर सुघर खभेर ला सुनाए बर, तरोआस सहर में पहुंचे, त उहां परभू हर सेवा बर एगोट दुरा ला खोएल के राखे रहीस।

¹³ तबो ले मोर मन में सांती नई मिलीस, काबरकि मंए अपन भाई तीतुस ला ऊहां नई पाएं, एकरे ले मंए ओमन ले बिदा होए के, मकिदुनिया इलाका में चएल देहें।

मसीह में जय कर तिहार

¹⁴ बकिन परमेस्वर कर धनबाद होए, जेहर मसीह में हमेसा हमन ला जय कर तिहार में लेके जाथे, अऊ अपन गियान कर खुसबू ला हमर जरिए सब जगहा बगराथे।

¹⁵ काबरकि उद्धार पवईया अऊ नास होवईया दुनो कर मझार में, हमरे परमेस्वर कर ठांवे पहूंचोईया मसीह कर खुसबू लागी।

¹⁶ नास होवईया मन बर हमरे मिरतु ले मिरतु कती ले जवईया गंध लागन, बकिन उद्धार पवईया मन बर हमरे अमर जिनगी देवईया सुगंध लागन। कोन हर अईसना काम करे कर लाएक हवे?

¹⁷ काबरकि हमरे ओ ढेरेच झन कस नई हवन, जेमन परमेस्वर कर बचन ला अपन फएदा बर लेन-देन करथें, बकिन एकर बदले परमेस्वर ले भेजल मईनसे कस, हमरे मसीह कती ले मिलल अधिकार ले इमानदारी कर संगे, परमेस्वर ला हाजीर जाएन के, मईनसे मन कर आगू में परमेस्वर कर बचन कर परचार करथी।