2 कुरिन्थी 13 - Surgujia Bible

आखरी चेतावनी

¹ मंए तीसर दाएर तुमन ठे आवत हों। परमेस्वर कर किताब में लिखल हवे, “दुई चाहे तीन झन कर गवाही ले, हर एक कर आरोप हर साबित होए जाए।”

² जब मंए दूसर दाएर तुमन ठे आए रहें, त तुमन में ले पाप करोईया मन ला दंड देहे कर चेतावनी देहे रहें, अब मंए तुमन कर मंझार में नई हवों, त मंए ओ बात ला फेर कहथों, जब मंए आहूं, त जेमन पहिले पाप करे रहीन अऊ आने सब कोई जेमन पाप करत हवें, ओ सब झन ला जरूर दंड देहूं।

³ तुमन एकर सबूत चाहथा कि मसीह हर मोर द्वारा गोठियाथे? तुमन कर सामना करे बर मसीह हर निरबल नईए, बकिन ओहर तुमन कर मझार में अपन सामर्थ ला देखाथे।

⁴ ए बात हर तो सच हवे कि जब मसीह ला कुरूस उपरे चघाल गईस, त ओहर कमजोर दिखत रहीस, बकिन ओहर परमेस्वर कर सामर्थ ले जीयत हवे, ओईसनेच हमूच मन मसीह कर सेवा करे घनी कईयो दाएर कमजोर दिखथी, बकिन परमेस्वर कर सामर्थ ले हमरे ओकर संगे जीयत रथी, ताकि हमरे तुमन कर सेवा करी।

⁵ तुमन अपन आप ला परखा अऊ देखा कि तुमन बिस्वास कर अनुसार चलत हवा कि नहीं। तुमन अपन आप ला जांएच के देखा। का तुमन नई जाना कि मसीह ईसू तुमन में हवे? अगर नईए, त फेर तुमन जांच में निकमा होए गए हवा।

⁶ बकिन मोके आसा हवे कि तुमन जाएन जईहा कि हमरे, ए जांच में निकमा नई हवन।

⁷ अब हमरे परमेस्वर जग पराथना करथी कि तुमन कोनो गलत काम झईन करा, एकरले नहीं कि हमरे खरा साबित होई, बलकि एकर बर हमरे पराथना करी कि तुमन सही काम ला करा, भले ही हमरे निकमा ठहरी।

⁸ काबरकि हमरे सच कर बिरोध में कुछ नई कएर सकन, बकिन हमरे सिरीप सच बर ही कएर सकथन।

⁹ जब हमरे निरबल हवन अऊ तुमन मजबूत हवा, त हमरे खुस होथन। हमरे ए पराथना भी करथी कि तुमन सही काम करे बर पूरा तरह ले ओकर लाएक बएन जावा।

¹⁰ एकरे कारन जब मंए तुमन कर संगे नई हवों, त ए बात मन ला लिखत हों, ताकि जब मंए तुमन ठन आहूं, त मोके अपन अधिकार कर उपयोग करे बर कठोर झईन होए बर परे, काबरकि परभू हर मोके ए अधिकार ला, तुमन कर आत्मिक बढोतरी बर देहीस हवे, तुमन कर बिनास बर नहीं।

आखरी जोहार

¹¹ ए भाई-बहिन मन खुस रहा; अऊ सिद्ध बनते जावा; धीरज धरा, एक मत होए के रहा अऊ सांती बनाए राखा। तब मया अऊ सांती देवईया परमेस्वर हर तुमन कर संगे रही।

¹² पबितर चूमा कर संगे एक दूसर ला जोहार करा।

¹³ परमेस्वर कर सबो मईनसे मन तुमन ला जोहार करत हवें।

¹⁴ परभू ईसू मसीह कर किरपा, परमेस्वर कर मया, अऊ पबितर आतमा कर संगती तुमन सबो झन कर संगे होवत रहे।