1 थिस्सलुनी 5 - Surgujia Bible

परभू कर दुबारा अवाई बर तियार रईहा

¹ ए भाई बहिन मन, कब ओ जुआर अऊ दिन हर आही, ओकर बारे में लिखे कर जरूरत नईए।

² काबरकि तुमन बढ़िहां ले जानथा कि जेकस चोर हर राती आथे, ओही कस परभू कर दिन हर आही।

³ जे घनी मईनसे मन कहत होहीं, “सांती हवे अऊ सब नगदे-नगद हवें” ओही घनी ओमन कर ऊपरे अचाकन बिनास आए जाही, जेकस आसापती सवांगीन कर उपरे अचाकन दुख आथे अऊ ओमन बिनास ले नई बांचहीं।

⁴ बकिन ए भाई बहिन मन, तुमन तो अंधार में नई हवा कि परभू कर दिन हर, तुमन कर जिनगी में चोर कस आए जाही अऊ तुमन अचमहों झईन होईहा।

⁵ काबरकि तुमन तो सब झन इंजोर कर लईका अऊ दिन कर लईका हवा, हमरे राती कर लईका अऊ अंधार कर लईका ना लागी।

⁶ एकरे ले हमरे आने झन कस सूतत नई रही, बकिन जागत अऊ सवाचेती रही।

⁷ काबरकि जेमन सूतथें, ओमन रातीए सूतथें अऊ जेमन मतवार होथें, ओमन रातीए पीके मतवार होथें।

⁸ बकिन हमरे तो दिन कर हवन, एकरले हमरे सवाचेती रहबो। हमरे छाती कर कवच कर रूप में बिस्वास अऊ मया ला पहिर लेबो अऊ टोपी कर रूप में उद्धार कर असरा ला पहिर लेबो।

⁹ काबरकि परमेस्वर हर हमके दंड भोगे बर नई चुनीसे, बलकि हमर परभू ईसू मसीह कर जरिये उद्धार ला पाए बर हमके चुनीस हे।

¹⁰ ईसू हर हमर बरीक मरीस हवे तेमेकि हमरे चाहे जीयत रही, चाहे मरत रही जब ओ आही, त हमरे ओकर संगे हमेसा रहबो।

¹¹ एकरले एक दूसर झन ला उत्साहित करा अऊ एक दूसर ला आगू बड़हे में मदेत करा, जेकस कि तुमन अझेर करत हवा।

ए चिट्ठी कर आखरी उपदेस

¹² ए भाई बहिन मन, जेमन परभू बरीक मेहनत करथें अऊ परभू में कईसे जिनगी जीये बर हवे, ओला तुमन के सिखाथें, ओमन कर माएन-मरजाद करा।

¹³ ओमन बढ़िहां काम करथें, एकरले मया कर संगे ओमन कर ढेरेच आदर करा अऊ आपस में मिल-जुईल के रहा।

¹⁴ ए भाई-बहिन मन, हमरे तुमन के समझाथी कि कोड़िहा मन ला चेतावा, डरपोकवा मन ला हिमेत देआ, लोरभोसवा मन कर मदेत करा, सब झन बर सहनसीलता देखावा।

¹⁵ ए बात कर धियान देआ कि कोनो बुराई कर पलटा बुराई झईन करे, बकिन हमेसा एक दूसर बर अऊ सब मईनसे मन बर, भलाई करे कर कोसिस करें।

¹⁶ हमेसा खुस रहा।

¹⁷ हमेसा पराथना करतेच रहा।

¹⁸ सबेच हालत में परमेस्वर कर धनबाद करा, काबरकि जेमन परभू ईसू मसीह कर अपन हवें, ओमन बर परमेस्वर कर एही इछा हवे।

¹⁹ पबितर आत्मा ला हमर जिनगी में काम करे ले झईन रोका।

²⁰ अगमबानी मन ला अनभनिया झईन समझा।

²¹ बकिन सबेच बात मन ला तजबीज लेआ अऊ जेहर बढ़िहां हवे, ओला धएर लेआ।

²² सबेच मधे कर बुराई ले बांचे रहा।

ए चिट्ठी कर आखरी जोहार

²³ अब सांती देवईया परमेस्वर हर, खुद तुमन ला समुचा पबितर करे अऊ तुमन कर देंह, परान अऊ आत्मा हर, हमर परभू ईसू मसीह कर आए जुआर ले, बिगर कसूर कर रहे बर हमर मदेत करे।

²⁴ परमेस्वर हर तुमन के बलाईस हवे, ओहर भरोसा कर लाएक हवे अऊ ओहर एहीच कस करही।

²⁵ ए बिस्वासी भाई-बहिन मन, हमरो बर पराथना करीहा।

²⁶ सबेच भाई बहिन मन ला पबितर चुमा ले जोहार करा।

²⁷ जे अधिकार परभू मोके देहीसे, ओमे ले मंए तुमन ला बताथों कि ए चिट्ठी ला सबेच भाई-बहिन मन ला पएढ़ के सूनईहा।

²⁸ हमर परभू ईसू मसीह कर किरपा तुमन कर संगे होवत रहे।