1 थिस्सलुनी 4 - Surgujia Bible

परमेस्वर ला फुरमा करे कर जिनगी

¹ ए भाई-बहिन मन, तुमन परमेस्वर ला फुरमा करे बर हमर जग ले सीखे हवा, अझरो ले तुमन ओहीच कस जिनगी जीयत हवा। हमरे तुमन जग बिनती करत हवन अऊ परभू ईसू में समझात हवन कि जेकस तुमन ओमे चलथा, ओहीच में अऊ बड़ते जावा।

² हमरे परभू ईसू मसीह कर अधिकार ले तुमन ला का-का अगियां देहे हवन, ओला तुमन जानत हवा।

³ परमेस्वर ए चाहथे कि तुमन पबितर बना, मनेकि बेभिचार ले दुरीहां रहा,

⁴ अऊ तुमन में ले सबेच मईनसे मन अपन देंह ला बस में कएर के अऊ पबितर बएन के, आदर कर संगे अपन परानी जग रहे बर सीखें,

⁵ अऊ ओ गैर यहूदी मन कस भोग-बिलास झईन करा, जेमन परमेस्वर ला नई जाने।

⁶ तुमन में ले कोनो हर अईसना घिनक काम कएर के अपन भाई ला झईन ठगे अऊ ओकर नुकसान झईन करे। हमरे आगूवेच ले तुमन ला बताए हवन अऊ सवाचेती करे हवन कि परभू हर एकस करोईया मन ला दंड देही।

⁷ काबरकि परमेस्वर हर हमके ला असुध होए बर नहीं, बकिन पबितर जिनगी जीए बर बलाईस हवे।

⁸ एकरले जेमन ए सिक्छा ला नई माने ओमन मईनसे ला नहीं, बकिन परमेस्वर ला दोछथें, जेहर तुमन ला अपन पबितर आत्मा देथे।

⁹ संगी बिस्वासी मन जग मया करे कर बारे में, तुमन ला कांहीच लिखे कर जरूरत नईए, काबरकि परमेस्वर हर तुमन ला, एक दूसर जग मया करे बर सिखाईस हवे।

¹⁰ अऊ मकिदुनिया सहर कर सबेच भाई बहिन मन कर संगे, तुमन अझरो ले मया करत हवा। तबोले ए भाई बहिन मन, हमरे तुमन ला उत्साहित करथी कि तुमन अऊ बगरा मया करत रईहा।

¹¹ तुमन सांती ले जिनगी जीयत रईहा, मनेकि दूसर कर काम में अड़ंगा झईन डालीहा, अपन-अपन हाथ ले कमाए कर कोसिस करीहा, जेकस हमरे तुमन ला उपदेस देहे हवन।

¹² तुमन एकस जिनगी जीयत रईहा, त कलीसिया कर बाहरी कर मईनसे मन तुमन कर माएन-मरजाद करहीं अऊ तुमन ककरो ऊपरे बोझ झईन बनीहा।

ईसू कर दुबारा अवाई

¹³ ए भाई-बहिन मन, हमरे चाहथी कि जे बिस्वासी मन मएर गईन हवें, ओमन कर बारे में जाएन लेआ कि ओमन कर का होही। तेमेकि आने मन कस तुमन ला दुखी होए बर झईन परे, काबरकि ओमन ला मएर के फेर जीये कर असरा नईए।

¹⁴ काबरकि हमरे बिस्वास करथी कि ईसू हर मएर गईस अऊ फेर जी उठीस, अईसनेच जेमन ईसू में बिस्वास कएर के मएर गईन हवें, ओमन ला परमेस्वर हर फेर जीयाही अऊ ईसू कर संगे ले आनही।

¹⁵ परमेस्वर कर बचन कर अनुसार, तुमन जग कहथी कि परभू कर आए घनी, मरल मन आगू सरग जाहीं। तेकर पाछू हमन में ले जे बिस्वासी मन जीयत अऊ बांचे रहबो तेमन सरग जाबो।

¹⁶ काबरकि परभू हर, अपन अगियां ला चिकेर के अऊ सरग कर मुख सरगदूत कर अवाज अऊ परमेस्वर कर तुरही कर अवाज कर संगे, सरग ले उतरही अऊ जेमन मसीह में बिस्वास कएर के मएर गईन हवें, ओमन आगू जी उठहीं।

¹⁷ तेकर हमरे जेमन जीयत अऊ बांचे रहबो, ओमन कर संगे हमूके उठाए के बदरी में ले जाही कि अगास में परभू कर संगे भेंटाई अऊ एही कस हमरे हमेसा परभू कर संगे रहबो।

¹⁸ एकरले, एहीच बचन मन ला गोठियाके एक दूसर झन ला उत्साहित करत रईहा।