1 थिस्सलुनी 3 - Surgujia Bible

तीमुथियुस ला भेजीन

¹ आखरी में हमरे अऊ सहे बर नई सकेन, तेकर ले हमरे एथेंस सहर में अकेला रहे बर सोंचेन,

² त हमर भाई तीमुथियुस ला तुमन जग भेजेन। ओहर परमेस्वर कर सेवक लागे, जेहर हमर संगे मसीह कर सुघर खभेर कर परचार करत हवे। ओहर आए के तुमन कर बिस्वास ला बजर करही अऊ उत्साहित करही।

³ तेमेकि तुमन में ले कोनो मन, ए सताव कर चलते अपन बिस्वास ले झईन फिरें। तुमन खुदेच जानथा कि ए सताव ला सहे बर तुमन ला ठहराल गईस हे।

⁴ जब हमरे तुमन जग रहेन, त तुमन ला आगूवेच ले कहत रहेन कि हमके मन ला सताव सहे बर परही अऊ अझेर तुमन जानथा कि एहीच कस होईस।

⁵ जब मोके अऊ नई सहाईस, त तुमन कर बिस्वास कर बारे में पूछे बर, तीमुथियुस ला तुमन जग भेजें। काबरकि मंए डराए गए रहें कि कहों सैतान हर तुमन कर परीछा करीस होही अऊ हमर मेहनत हर बेकार होए गईस होही।

⁶ बकिन अझेर तीमुथियुस हर, उहां ले हमर जग आईस हे अऊ तुमन कर बिस्वास अऊ मया कर बढ़िहां बात ला बताईस अऊ एहू कस कहीस कि तुमन सबेच घनी मया कर संगे, हमर सुरता करथा अऊ हमके ला देखे बर घोखथा, जेकस कि हमू मन तुमन ला देखे बर घोंखत हन।

⁷ एकरे ले ए भाई-बहिन मन, हमरे ढेरेच दुख अऊ सताव में हवन। तबो ले परभू कर ऊपरे तुमन कर बिस्वास हर माढ़ीस हवे। ओला देख के हमर चोला हर हरीयर होए गईस।

⁸ तुमन परभू कर बिस्वास में बजर हवा, एला जाएन के फूरोंच में हमर जीव में जीव आईस।

⁹ तुमन कर चलते, हमरे परमेस्वर कर आगू में ढेरेच फुरमा होथन अऊ हमरे तुमन बर एतना खुस हवन कि परमेस्वर ला कोन कस धनबाद करी?

¹⁰ तुमन के देखे बर अऊ तुमन कर बिस्वास में जे कमी हवे, ओला पूरा करे बर हमरे राएत दिन जीव-जहान लगाए के पराथना करत रथी।

¹¹ हमर दाऊ परमेस्वर खुद अऊ हमर परभू ईसू मसीह, हमके ला तुमन जग फेरेच आए बर उपाए करे।

¹² अऊ परभू एकस करे कि जेकस हमरे तुमन जग मया करथी, ओही कस तुमन कर मया हर, एक दूसर बर अऊ सबेच मईनसे मन बर बड़हे अऊ बईड़ के उछले।

¹³ तेमेकि ओहर तुमन कर हिरदय ला बजर करे कि जब हमर परभू ईसू हर, अपन सबेच पबितर मईनसे मन कर संगे आही, त तुमन कर मन ला हमर परमेस्वर दाऊ कर आगू में, पबितर अऊ बिगर कसूर कर पाए।