1 थिस्सलुनी 2 - Surgujia Bible

थिस्सलुनीके सहर में पौलुस कर सेवा

¹ ए भाई-बहिन मन, तुमन खुद जानत हवा कि हमरे तुमन जग आएन तेहर अनभनिया नई होईस।

² तुमन के सुरता होही कि तुमन जग भेंटाए कर आगू, हमरे फिलिप्पी सहर में दुख उठाएन अऊ मार-पीट ला सहेन, तबो ले हमर परमेस्वर हर हमके ला एकस हिमेत देहीस कि ढेरेच बिरोध होवत रहीस, तेहूच घनी हमरे परमेस्वर कर सुघर खभेर ला तुमन के सुनाएन।

³ काबरकि हमर उपदेस हर धोखा अऊ असुध सोंच ले नईए अऊ हमरे तुमन ला छले कर कोसिस नई करेन।

⁴ बलकि परमेस्वर हर हमके सुघर खभेर ला सोंपीस हवे, एकरले हमरे मईनसे मन ला फुरमा करे बर नहीं, बकिन जेहर हमर हिरदय ला तजबीजथे, ते परमेस्वर ला फुरमा करे बर परचार करथी।

⁵ तुमन जानत हवा कि हमरे कभों झूठ-मूठ कर बड़ाई नई करेन अऊ हमरे पईसा कर लालच बर कोनो बहाना नई करेन, परमेस्वर हर हमर गवाह हवे।

⁶ हमरे ईसू मसीह कर परेरीत होए कर चलते, तुमन ऊपरे अपन अधिकार चलाए सकत रहेन, तबो ले हमरे एकस नई करेन, काबरकि हमरे तुमन जग अऊ आने झन मन जग माएन-मरजाद नई चाहेन।

⁷ बकिन जेकस दाई हर अपन लईका मन ला पालथे-पोसथे, ओही कस हमू मन तुमन कर मझारे लूईर के रहेन।

⁸ अऊ हमरे तुमन जग एतना मया करेन कि हमरे सिरीप परमेस्वर कर सुघर खभेर ला तुमन के नई सुनाएन, बकिन हमन अपन परानोच ला तुमन के देहे बर तियार रहेन, काबरकि तुमन हमर दुलरुवा बएन गए रहा।

⁹ ए भाई बहिन मन, तुमन हमर मेहनत अऊ जीयाएन कर सुरता करथा; हमरे राएत दिन काम-बूता कएर के, तुमन कर मझारे परमेस्वर कर सुघर खभेर ला परचार करेन, तेमेकि हमरे ककरो ऊपरे बोझ नई बनेन।

¹⁰ तुहींच मन हमर गवाह हवा अऊ परमेस्वर हर भी गवाह हवे कि बिस्वास करोईया तुमन कर मझारे, हमर चाल-सहूर हर केतेक पबितर अऊ परमेस्वर कर देख में सुघर जिनगी जीवईया अऊ निरदोस रहीस।

¹¹ तुमन जानत हवा कि जेकस दाऊ हर अपन लईका-छऊआ मन जग बेवहार करथे, ओही कस हमू मन तुमन कर संगे करेन।

¹² हमन तुमन कर हिमेत ला बड़हात रहेन अऊ समझात रहेन अऊ बिनती करत रहेन कि तुमन कर चाल-सहूर हर परमेस्वर कर फभऊ लाएक होए जाए। परमेस्वर हर तुमन के अपन राएज अऊ महिमा में मेराए बर बलाथे।

¹³ त हमू मन परमेस्वर कर हमेसा धनबाद देथी कि जब तुमन हमर जग ले परमेस्वर कर खभेर ला सुना, त तुमन एला सिरीप मईनसे कर बचन नहीं, बकिन एला परमेस्वर कर बचन समझ के अपनाया अऊ जेमन ओमे बिस्वास करथें, ओमन कर ऊपर ए बचन हर काम करत हवे।

¹⁴ ए भाई-बहिन मन, तुमन ला अपन जाएत-सागा मन जग ले ढेरेच दुख मिलीस, तेकर ले तुमन एहूदिया इलाका कर कलीसिया मन कर बिस्वासी, जेमन मसीह ईसू में हवें, ओमने कस बएन गए हवा; जेकस ओमन अपन जाएत-सागा यहूदी मन जग ले दुख पाए रहीन, ओही कस तुंहूच मन पाए हवा।

¹⁵ ए यहूदी मन, परभू ईसू अऊ अगमजानी मन ला माएर मरुवाईन अऊ हमूच के सताईन। ओमन परमेस्वर ला नराज करथें, अऊ सबेच मईनसे मन कर बिरोध करथें,

¹⁶ काबरकि ओमन गैर यहूदी मन ला, पाप ले उद्धार पाए कर सुघर खभेर ला बताए ले हमके रोकथें अऊ ओमन एकस कएर के अपन पाप कर गघरी ला भरत रथें, बकिन ओमन कर ऊपरे परमेस्वर कर डरडरावन गुसा हर आए पहुंचीस हवे।

परेरीत पौलुस थिस्सलुनीके मन जग भेंटाए बर करथे

¹⁷ ए भाई-बहिन मन, हमरे तनीक दिन बर तुमन ले दुरीहां रहेन, बकिन हमेसा तुमन कर सुरता करत रहेन अऊ तुमन ला ढेरेच घोंखत रहेन, तेकर चलते हमरे तुमन जग भेंटाए कर ढेरेच कोसिस करेन।

¹⁸ हमरे तुमन जग आए बर चाहत रहेन। मंए पौलुस खुद, कईयो दाएर आए कर कोसिस करें, बकिन सैतान हर हमके रोकीस।

¹⁹ जे घनी हमर परभू ईसू मसीह आही, त हमर आसा अऊ आनंद अऊ बड़ाई कर मुकुट कोन होही? का तुहींच मन नई होईहा?

²⁰ फूरोंच में हमर बड़ाई अऊ आनंद तुहींच मन हवा।