1 पतरस 5 - Surgujia Bible

अगुवा अऊ जवान मईनसे मन ला उपदेस देथे

¹ मंए एगोट संगी अगुवा लागों अऊ मसीह कर दुख ऊठाए कर एगोट गवाह लागों अऊ परगट होवईया ईसू कर महिमा में सामिल हवों। अब तुमन में ले, जेमन कलीसिया कर अगुवा हवा, तुमन ला मंए बिनती करत हों,

² परमेस्वर कर ओ झूंड, कर पहरा करा जेहर तुमन कर मंझार में हवे अऊ सेवक कर रूप में सेवा करा। ए सेवा ला दबाव ले नहीं, बलकि परमेस्वर कर ईछा कर अनुसार आनंद ले करा, पईसा कर लालच में नहीं, बकिन मन लगाए के सेवा करा।

³ जे मईनसे मन तुमन कर देख-रेख बर सोंपल गईन हवें, ओमन ऊपरे हुकूम झईन चलावा, बकिन झूंड बर एगोट नमूना बना।

⁴ अऊ जब मुख रखवाला परगट होही, त तुमन ला महिमा कर मुकुट देहल जाही, जेहर कभों नई असलाए।

⁵ एहीच नियर ए जवान मन, तुंहूच मन अपन अगुवा मन कर अधीन में रहा। एक दूसर कर संगे नरम सुभाव ले रहा, काबरकि “परमेस्वर हर घमंडी मईनसे मन कर बिरोध करथे, बकिन नरम मईनसे मन कर ऊपर किरपा करथे।”

⁶ परमेस्वर हर सही समय में तुमन कर मान बढ़ाही, तेकर बर ओकर सामर्थी हाथ कर तरी अपन-आप ला नरम करा,

⁷ अऊ अपन सबेच चिंता ला परमेस्वर कर ऊपरे छोंएड़ देआ, काबरकि ओहर तुमन कर खियाल राखथे।

⁸ सवाचेती रहा अऊ जागत रहा, काबरकि तुमन कर बैरी सैतान हर एगोट गरजत सिंह कस, इते-ऊते किंदरथे अऊ ए खोज में रथे कि काके ला चीर खावों।

⁹ बिस्वास में बजर होए के ओकर सामना करा, काबरकि तुमन जानथा कि तुमन कर भाई-बहिन जेमन संसार में हवें, एही कस दुख भोगत हवें।

¹⁰ बकिन सबेच किरपा कर परमेस्वर हर, तुमन ला मसीह कर द्वारा अमर जुग कर महिमा बर बलाईस हवे। तेकर ले तनिक जुआर बर दुख भोगे कर पाछू, ओहर खुद तुमन ला भरपूर करही, बजर करही अऊ ताकत देही।

¹¹ ओकर सामर्थ जुग-जुग ले बनल रहे। आमीन।

आखरी जोहार

¹² मंए सिलवानुस कर मदेत ले, तुमन ला ए दम अकन बात लिखत हवों। ए सिलवानुस हर एगोट बिस्वास कर लाएक भाई हवे। मंए तुमन ला उत्सुक करे बर अऊ अपन गवाही देहे बर चाहत हों कि परमेस्वर कर सचा किरपा, एही हर लागे एही में माढ़े रहा।

¹³ बेबीलोन सहर कर कलीसिया, जेहर तुमन कस परमेस्वर कर द्वारा चुनल हवे, तुमन के अपन जोहार कहत हवे अऊ एही कस मरकुसोच हर जेहर मोर बेटा कस हवे, तुमन ला जोहार कहथे।

¹⁴ मसीह कर मया में एक दूसर के चुम-चुम के जोहार करा; तुमन सब झन ला जेमन मसीह कर अपन हवा, तुमन के सांती मिलत रहे।