1 कुरिन्थी 6 - Surgujia Bible

बिस्वासी मन कर मझार में झगरा कर निपटारा

¹ अगर तुमन में ले ककरो आपस में झगरा हवे, त ओला परमेस्वर कर मईनसे मन ले, ए झगरा कर निपटारा करुवाए बर चाही, एकर बदले ओहर अबिस्वासी मन जग जाए कर हिमेत काबर करथे?

² का तुमन नई जाना कि परमेस्वर कर मईनसे मन संसार कर नियाओ करहीं? अऊ अगर तुमन ला संसार कर नियाओ करे बर हवे, त का तुमन छोटे-छोटे झगरा कर निपटारा नई कएर सका?

³ का तुमन नई जाना कि हमरे सरगदूत मन कर नियाओ करबो? त ए जिनगी कर छोटे-छोटे झगरा मन ला, तुमन के आसानी से निपटाए बर चाही।

⁴ अगर तुमन कर मझार में संसारिक मामला मन कर बारे में झगरा हवे, त का तुमन नियाओ करे बर अईसन मईनसे मन ला पंच बईठाथा, जेकर कलीसिया में कोनो आदर नईए?

⁵ का तुमन ला तनिको लाज नई लागे। का तुमन कर मझार में एकोठे समझदार मईनसे नईएं, जेहर बिस्वासी मन कर झगरा कर निपटारा कएर सके?

⁶ एगोट बिस्वासी दूसर बिस्वासी कर बिरोध में अदालत जाथे, अऊ इहां तक कि अबिस्वासी मन कर आगू में एकर नियाओ होथे।

⁷ अगर फुरोंच में तुमन कर मझार में झगरा होथे, त एहर तुमन कर कमजोरी लागे। तुमन खुद अनियाए काबर नई सएह लेआ? अऊ तुमन अपन बर नुकसान काबर नई उठावा?

⁸ एकर बदले कि तुमन खुद अनियाए करथा अऊ धोखा देथा, अऊ ओहूच में अपन बिस्वासी मन कर संगे अईसना करथा।

⁹ का तुमन नई जाना कि अनियाए करोईया मन, परमेस्वर कर राएज कर हकदार नई होए सकें? धोखा में झईन रहा; छिनारी करोईया, मूरती पूजा करोईया, दूसर कर सवांगीन संगे बेभिचार करोईया, लूचा, पुरुसगामी,

¹⁰ चोर, लोभिया, मतवार, बदनाम करोईया अऊ धोखा देवईया मन, परमेस्वर कर राएज कर हकदार नई होहीं।

¹¹ तुमन में ले तनिक झेमन अईसने जिनगी जीयत रहीन, बकिन अब तुमन परभू ईसू मसीह कर नांव ले, अऊ हमर परमेस्वर कर आत्मा कर द्वारा धोवल गए हवा, तुमन पाप ले सुद्ध करल गए हवा, अऊ तुमन परमेस्वर कर नजर में बेकसूर ठहराल गए हवा।

अपन देंह ला परमेस्वर कर महिमा बर लगावा

¹² मोके सब चीज करे कर छूट हवे, बकिन सब चीज हर फयदा कर नईए, मोर बर सब चीज कर छूट हवे, बकिन मंए कोनो चीज कर गुलाम नई बनहूं।

¹³ भोजन हर पेट बरीक अऊ पेट हर भोजन बरीक हवे, बकिन परमेस्वर हर ए दुनों ला नास करही। देंह हर बेभिचार करे बर ना हवे, बकिन परभू बर हवे अऊ परभू हर देंह कर खियाल राखथे।

¹⁴ परमेस्वर हर अपन सामर्थ ले परभू ला मरल में ले जियाईस, अऊ ओहर हमू मन अपन सामर्थ ले जियाही।

¹⁵ का तुमन नई जाना कि तुमन कर देंह हर मसीह कर अंग लागे? त का मंए मसीह कर अंग ला लेके बेस्या कर अंग बनाए देवों? अईसना कभों नई होए।

¹⁶ का तुमन नई जाना कि जेकर मिलन एगोट बेस्या कर संगे होए जाथे, ओहर ओकर संगे एक तन होए जाथे? काबरकि परमेस्वर कर किताब में लिखल हवे, “ओ दुनों एक तन होए जाहीं।”

¹⁷ बकिन जेकर मिलन परभू कर संगे होए जाथे, ओहर ओकर संगे एक आत्मा होए जाथे।

¹⁸ तेकर ले छिनारी ले दुरिहां भाएग जा। आने सब पाप जेला मईनसे हर करथे, ओहर ओकर देंह कर बाहरी होथे, बकिन जेहर छिनारी करथे, ओहर अपन देंह कर बिरोध में पाप करथे।

¹⁹ का तुमन नई जाना कि तुमन कर देंह हर पबितर आत्मा कर मंदिर लागे, जेहर तुमन में बसीस हवे, अऊ जेहर परमेस्वर कती ले तुमन के मिलीस हवे अऊ तुमन अपन ना हवा?

²⁰ काबरकि दाम देके तुमन ला बेसाए लेहीस हवे, तेकर ले अपन देंह कर द्वारा, परमेस्वर कर महिमा करा।