1 कुरिन्थी 5 - Surgujia Bible

कलीसिया में गलत काम कर बिरोध में डांट

¹ ए बात सुने रहेन कि तुमन कर मझार में छिनारी होवथे, अऊ ओहूच में अईसना छिनारी, जेहर अबिस्वासी मन में भी नई होए कि एगोट मईनसे हर, अपन दाऊ कर दूसर परानी, मनेकि अपन मोसी दाई ला राएख लेथे।

² एकर बर तो तुमन के दुखी होए बर रहीस, अऊ जे मईनसे हर अईसना काम करीसे, ओके ला अपन संगती ले निकाले बर रहीस, बकिन एकर बदले तुमन तो घमंड करथा।

³ मंए तो सारीरिक रूप में तुमन कर संगे नई हवों, बकिन मन में तुमन कर संगे हाजीर हवों, अऊ माएन लेआ कि मंए उहां हाजीर होए के, ए बुरा काम करोईया ला, परभू ईसू कर नांव में अपन फईसला सुनाए चुके हवों।

⁴ जब तुमन हमर परभू ईसू कर नांव में जुटथा अऊ मंए मन में तुमन कर संगे हवों, अऊ परभू ईसू कर सामर्थ हमर संगे हवे।

⁵ अईसना गलत काम करोईया मईनसे ला अपन संगती ले निकाएल देआ, ताकि ओकर पापी सुभाव हर नास होए जाए, अऊ परभू कर दिन में ओकर आत्मा कर उद्धार होए जाए।

⁶ तुमन कर ए घमंड कराई ठीक नईये, का तुमन नई जाना कि थोरहें अकन खमीर हर, जमेच सानल पिसान ला अमटूवाए देथे?

⁷ जुनहा खमीर सहींक पाप ला निकाएल देआ, ताकि तुमन बिगर खमीर कर नांवा सानल पिसान सहींक बएन जावा, जेकस कि तुमन हवा। काबरकि हमर फसह तिहार कर भेंड़ी छउआ जेहर मसीह लागे, ओहर बलिदान होईस हे।

⁸ तेकर ले आवा, हमरे तिहार ला ए जूनहा खमीर कर संगे नई मनाई, काबरकि ए जूनहा खमीर हर पाप अऊ दुस्टता ला देखाथे। बकिन आवा हमरे बिगर खमीर कर रोटी संगे तिहार ला मनाई, काबरकि बिगर खमीर कर रोटी हर इमानदारी अऊ सचाई ला देखाथे।

⁹ मंए अपन चिट्ठी में तुमन ला लिखे हवों, कि छिनारी करोईया मईनसे मन कर संगे, संगती कभों झईन करीहा।

¹⁰ मोर कहे कर मतलब ए नई रहीस, कि तुमन ए संसार कर, छिनारी करोईया, लोभिया, ठगलबरा, आखिर मूरती पूजा करोईया मन कर संगती झईन करीहा; काबरकि अईसना दसा में तो तुमन के ए संसार ला ही छोंएड़ देहे बर परही।

¹¹ मोर कहे कर मतलब ए हवे कि तुमन अईसना मईनसे कर संगती झईन करीहा, जेहर अपन आप ला बिस्वासी कथे, बकिन ओहर छिनार आखिर लोभिया, मूरती पूजा करोईया, आखिर बईदनामी करोईया, दरुहा आखिर धोखा देवईया हवे, त अईसना मईनसे कर संगे खाना भी झईन खईहा।

¹² कलीसिया कर बाहरी कर मईनसे मन कर बारे में नियाओ कराई मोर काम ना लागे। बकिन कलीसिया कर मईनसे मन कर नियाओ कराई तुमन कर काम लागे।

¹³ बकिन कलीसिया कर बाहरी कर मईनसे मन कर, नियाओ परमेस्वर करही। पबितर किताब में लिखल हवे, “कुकरमी मईनसे ला अपन मझार में ले निकाएल देआ।”