1 कुरिन्थी 4 - Surgujia Bible

मसीह कर परेरीत मन कर सेवकाई

¹ एकरले मईनसे मन, हमके ला मसीह कर सेवक अऊ परमेस्वर कर भेद मन कर रखवार जानें।

² जेमन ला जिमेदारी सोंपल गईस हवे ओमन ला बिस्वास लाएक होए बर जरूरी हवे।

³ बकिन मोके ए बात कर तनिको चिंता नईए, कि तुमन चाहे कोनो अदालत हर, मोर नियाओ करे। फूरोंच में मंए खुद अपन आप कर नियाओ नई करों।

⁴ मोर मन हर मोके कोई बात में दोसी नई पाए, बकिन एकर मतलब ए नईए कि मंए बेकसूर हों, काबरकि मोर नियाओ करोईया तो परभू लागे।

⁵ तेकर ले ठहरावल समय ले पहिले कोनो बात कर नियाओ झईन करा, परभू कर आवत ले अगुरत रहा, ओहर अंधार में लुकावल बात मन ला इंजोर में लानही, अऊ मईनसे मन कर हिरदय कर उदेस ला परगट करही। ओ घरी परमेस्वर कती ले, हर एक झन कर बड़ाई होही।

⁶ ए भाई-बहिन मन, मंए तुमन बर ए बात मन में अपन अऊ अपुलोस कर चरचा, उदाहरन कर रूप में करे हों, ताकि तुमन हमर जग ले एकर मतलब ला समझा, “परमेस्वर कर किताब में लिखल बात मन ले आगू झईन बढ़ीहा।” अऊ तुमन एक झन कर छेराव लूईट के, दूसर झन कर बिरोध में घमंड झईन करीहा।

⁷ तुमन काबर अपन आप ला बड़े समेझ के, दूसर झन ला दोसी ठहराथा, तुमन जग जे जाएत हवे, का ओला नई जाना, ओहर परमेस्वर कर द्वारा देहल गईस हवे। अऊ तुमन ला सब चीज दान में मिलीस हवे, त तुमन अईसना घमंड काबर करथा, जेकस कि तुमन मानथा कि नई पाए हवन।

⁸ तुमन तो अघाए गए हवा ना, तुमन तो पहिले ले धनी बएन गए हवा ना, तुमन तो हमर मदेत कर बिना राजा बएन गए हवा ना, एहर केतना बढ़िहां होतीस कि तुमन फुरोंच में राजा बएन जाता, ताकि हमू मन तुमन कर संगे राएज करतेन।

⁹ मोके अईसना लागथे कि, परमेस्वर हर हमके परेरीत मन ला, सबले आखरी में ओमन सहींक ठहराईस हवे, जेमन ला मिरतु दंड कर सजा सुनाल गईसे, काबरकि हमरे पूरा संसार, सरगदूत अऊ मईनसे मन कर आगू में तमासा बएन गए हवन।

¹⁰ हमरे मसीह बरीक मुरुख हवन, बकिन तुमन तो मसीह में ढेरेच बूईधमान हवा, हमरे कमजोर हवन, बकिन तुमन तो बलवान हवा। तुमन तो आदर पाथा, बकिन हमर अपमान होथे।

¹¹ हमरे एहुच घरी तक भूखे अऊ पियासे हन, अऊ चिरहा फटहा कपड़ा पहिरे हवन, हमरे मार खाथन, हमर जग रहे बर घरो हर नईये।

¹² हमरे अपन हाथ ले ढेरेच काम-बूता कएर के मेहनत करथी, जब मईनसे मन हमर बिरोध में गोठियाथें, त हमरे ओमन ला आसीस देथी, जब ओमन हमके सताथें, त हमरे सहते रथी।

¹³ जब ओमन हमर बईदनामी करथें, त हमरे ओमन जग सुघर गोएठ गोठियाथी। अझरो ले हमरे धरती कर कूड़ा-कचरा अऊ संसार कर बेकार चीज लागी।

¹⁴ मंए तुमन ला लजूवाए बर ए बात ला नई लिखत हों, बकिन दुलरुवा लईका जाएन के, तुमन ला समझात हों।

¹⁵ काबरकि मसीह में तुमन कर सिखोईया हजारों मईनसे होए सकथें, बकिन सब झन तुमन कर दाऊ नई होए सकथें, मंए सुघर खभेर कर परचार करे कर चलते, मसीह ईसू में तुमन कर दाऊ बएन गए हों।

¹⁶ तेकर ले मंए तुमन जग चाहथों कि तुमन मोर सहींक चाल चला।

¹⁷ एकरे बर मंए अपन मयारू बेटा, तीमुथियुस ला तुमन जग भेजे हों। ओहर परभू में बिस्वास कर लाएक हवे, ओहर तुमन ला मसीह ईसू में, मोर चाल-चलन कर सुरता करवाही, अऊ जेकस कि मंए हर जगह कर, हर एक कलीसिया में सिखाथों।

¹⁸ तुमन में ले तनीक झेमन अईसना घमंडी होए गईन हवें, ओमन सोंचथें कि अब मंए तुमन जग आबेच नई करहुं।

¹⁹ बकिन अगर परभू कर ईछा होही, त मंए तुमन जग ढेरेच हालू आहूं, तब मंए ओ घमंडी मईनसे मन ला परखहूं, कि ओमन परमेस्वर कर सामर्थ ले काम करथें, आखिर सिरीप बेकार गोएठ गोठियातेच रथें।

²⁰ काबरकि परमेस्वर कर राएज सिरीप बात मन में नईए, बकिन सामर्थ में हवे।

²¹ तुमन का चाहत हवा? कि मंए तुमन जग लाठी लेके सुधारे बर आओं, चाहे मंए तुमन जग मया अऊ दयालू आत्मा कर संगे आओं।