1 कुरिन्थी 3 - Surgujia Bible

कलीसिया में गुटबंदी कर बिरोध में डांट

¹ ए भाई-बहिन मन, मंए तुमन ठन वईसना बात नई कएर सकों, जईसना मंए आत्मिक मईनसे मन ठन करथों। मोके तुमन ठन वईसनेच बात करे बर परीस, जेकस कि देंह कर ईछा कर अनुसार चलोईया मन ठन करथों; चाहे जेमन मसीह बिस्वास में लईका हवें, ओमन ले बात करल जाथे।

² मंए तुमन ला दूध पियाएं, बजर खाना नई खवाएं, काबरकि तुमन ओला नई खाए सकत रहा, फुरोंच में तुमन ओला अझरोच ले पचाए बर भी नई सका।

³ तुमन तो अझरो ले, देंह कर ईछा कर अनुसार चलथा। जब तुमन एक दूसर ले जलन राखता, अऊ तुमन एक दूसर ले झगरा करथा, त का तुमन देंह कर ईछा कर अनुसार चलोईया ना लागा? अऊ का तुमन परमेस्वर कर बिरोधी मन कस बेवहार नई करा?

⁴ काबरकि जब एक झन हर कथे, “मंए पौलुस कर चेला लागों,” अऊ दूसर झन हर कथे, “मंए अपुलोस कर चेला लागों,” त का तुमन परमेस्वर कर बिरोधी मन कस बेवहार नई करा?

⁵ अपुलोस कोन लागे? अऊ पौलुस कोन लागे? हमरे तो सिरीप परमेस्वर कर सेवक लागी, जेकर द्वारा तुमन बिस्वासी बने हवा, जेकस कि हमर में ले हर एक झन ओही काम ला करे हवन, जेला परभू हर हमके सोंपीस हवे।

⁶ मंए बिहन बुनें, अपुलोस हर एमें पानी डालीस, बकिन परमेस्वर हर एला बढ़ाईस।

⁷ तेकर ले न तो बुनोईया बड़खा हवे, अऊ न पानी डलोईया, बकिन सबले बड़खा तो परमेस्वर हवे, जेहर पौधा ला बढ़ाथे।

⁸ जेहर बुनथे अऊ जेहर पानी डालथे, ए दुनों कर एकेच उदेस हवे, बकिन परमेस्वर हर सब झन ला, ओकर काम कर अनुसार मजदूरी देही।

⁹ काबरकि हमरे परमेस्वर कर संगे सेवा करोईया लागी, तुमन परमेस्वर कर खेत अऊ ओकर भवन लागा।

¹⁰ परमेस्वर हर मोके किरपा देहिसे अऊ ओ किरपा कर अनुसार मंए एगोट बढ़िहां राएज मिसतिरी कस नेंव डालें हों, अऊ दूसर झेमन ओकर ऊपरे घर बनात हवें। बकिन हर एक झन ला सवाचेती रहे बर चाही, कि ओहर कईसना घर बनात हवे।

¹¹ काबरकि पहिले ले एगोट नींव डालल गईसे, जेहर ईसू मसीह लागे अऊ ए नेंव कर छोंएड़ कोनो दूसर नेंव नई डाले सके।

¹² अगर कोनो मईनसे हर, ए नेंव कर ऊपरे सोना, चांदी, किमती पखना, कठवा, घांस चाहे बूसा डाएल के घर बनाथे,

¹³ त ओकर काम हर परभू कर दिन में दिख जाही, अऊ एहर आगी कर द्वारा परगट होही अऊ आगी हर परखही कि हर एक मईनसे मन, कईसना काम करीन हवें।

¹⁴ ए जांच परख में जे मईनसे कर काम हर बनल रही, त ओहर इनाम पाही।

¹⁵ बकिन कहों ओकर काम हर जएर जाही, त ओके नुकसान होही, ओहर खुद तो बांएच जाही बकिन अईसना बांचही, जेकस कोनो हर आगी में जरत-जरत बांचथे।

¹⁶ का तुमन नई जाना कि तुमन खुद परमेस्वर कर मंदिर लागा, अऊ परमेस्वर कर आत्मा तुमन में रथे?

¹⁷ अगर कोनो हर परमेस्वर कर मंदिर ला नास करथे, त परमेस्वर हर ओके नास करही, काबरकि परमेस्वर कर मंदिर पबितर हवे अऊ तुमन ओकर मंदिर लागा।

¹⁸ अपन-आप ला धोखा झईन देआ, अगर तुमन में ले कोनो ए संसार कर सोंच कर अनुसार अपन आप ला बूईधमान समझथे, त ओके खुद मुरुख बने बर चाही, ताकि ओहर सहीच में बूईधमान बएन जाए।

¹⁹ काबरकि ए संसार कर बुद्धी हर, परमेस्वर कर नजेर में मुरखता लागे। जेकस पबितर किताब में लिखल हवे, “परमेस्वर हर बूईधमान मन ला, ओमने कर चतुराई में फंसाए देथे,”

²⁰ अऊ एहु कस लिखल हवे, “परभू हर जानथे कि बूईधमान मन कर बिचार मन बेकार हवें।”

²¹ तेकर ले नास होवईया अगुवा मन कर ऊपरे कोई घमंड झईन करे, काबरकि सब जाएत हर तुमन कर लागे।

²² चाहे ओहर पौलुस होए, चाहे अपुलोस, चाहे काइफा (पतरस), चाहे ए संसार, चाहे जीवन, चाहे मिरतु, चाहे आएज कर बात, चाहे अवईया दिन कर बात, ए सब जाएत हर तुमन कर लागे;

²³ अऊ तुमन मसीह कर लागा अऊ मसीह परमेस्वर कर लागे।