1 कुरिन्थी 10 - Surgujia Bible

इसराएल कर इतिहास ले चेतावनी

¹ ए भाई-बहिन मन, मंए तुमन ला सुरता देवाए बर चाहत हों, कि हमर पूरखा मन, बदरी कर छाएं में रहत रहीन अऊ सबो झन समुंदर कर मझार ले झुरा जमीन में चएल देहींन,

² जब ओमन बदरी कर खालहे अऊ समुंदर में बतिस्मा लेहीन, तब परमेस्वर हर ओ सबो झन ला, मूसा कर अधिकार में रखे रहीस,

³ अऊ सबो झन एकेच ठन आत्मिक भोजन ला खाईन,

⁴ अऊ सबो झन एकेच ठन आत्मिक पानी ला पीन, काबरकि ओमन ओ आत्मिक चटाएन ले पीयत रहीन, जेहर ओमन कर संगे-संगे चलत रहीस, अऊ ओ चटाएन हर मसीह रहीस।

⁵ बकिन परमेस्वर हर ओमन में ले, ढेरेच मईनसे मन ले खुस नई रहीस, तेकर ले ओमन जंगल में मएर गईन।

⁶ ए बात मन हमर बर चेतावनी कर रूप में हवें, ताकि हमरे बुरा चीज मन कर लालच झईन करी जेकस ओमन करीन,

⁷ अऊ मूरती पूजा झईन करा, जेकस कि ओमन में ले तनिक झेमन करीन। जेकस पबितर किताब में लिखल हवे, “मईनसे मन खाए पीए बर बईठीन, अऊ नाचे बर उठीन।”

⁸ अऊ हमरे छिनारी झईन करी, जेकस कि ओमन में ले तनिक झेमन करीन अऊ एकेच दिन में, तेईस हजार मईनसे मन मएर गईन।

⁹ अऊ हमरे मसीह ला झईन परखी, जेकस कि ओमन में ले तनिक मईनसे मन करीन, अऊ सांप मन कर चाबे ले मएर गईन।

¹⁰ अऊ तुमन झईन कुड़कुड़ावा, जेकस कि ओमन में ले तनिक मईनसे मन कुड़कुड़ाईन अऊ नास करोईया दूत कर द्वारा मारल गईन।

¹¹ बकिन जे बात मन ओमन कर ऊपरे होईस, ओहर उदाहरन कर रूप में रहीस, अऊ ए बात मन, हमर सिखापन बर लिखल गईस, काबरकि हमरे ओ जुग में रहत हन, जेकर अंत होवईया हवे।

¹² तेकर ले जेहर ए समझथे कि मंए बिस्वास में बजर हों, त ओहर सवाचेती रहे, ताकि पाप में झईन गिरे।

¹³ तुमन कोनो अईसना परीछा में नई पड़े हवा, जेहर मईनसे कर जिनगी में नई आए। परमेस्वर हर बिस्वास कर लाएक हवे, अऊ ओहर तुमन ला सहे ले बाहर, परीछा में पड़े नई देही। बकिन जब तुमन परीछा में पएड़ जईहा, त ओहर तुमन ला परीछा ले निकले कर उपाए बताही, कि तुमन ओला सएह सका।

¹⁴ तेकर ले ए मोर मयारू भाई-बहिन मन, तुमन मूरती पूजा ले दुरिहां भागा।

¹⁵ मंए तुमन ला बूईधमान मईनसे जाएन के कहत हों, जे बात मंए कहत हों, ओला तुमन परखा।

¹⁶ ओ आसीस कर कटोरा, जेकर ऊपरे हमरे आसीस मांगथी, का एहर मसीह कर लहू में भागीदार नईए? ओ रोटी जेला हमरे टोरथन, का ओहर मसीह कर देंह कर भागीदार नईए?

¹⁷ रोटी तो एकेच ठन हवे, अऊ हमरे ढेरेच झन हवन, तबोले हमरे सब झन ओ एकेच ठे रोटी में, भागी होए कर चलते एगोट देंह होए जाथन।

¹⁸ ओ इसराएली मईनसे मन कर बारे में सोंचा, जेमन बलिदान में चघाल चीज मन ला खाथें, का ओमन ओ बेदी कर भागीदार नई होएं?

¹⁹ तब मोर कहे कर का मतलब हवे? का मूरती ला चघाल बलिदान आखिर, मूरती में कोई खास बात हवे?

²⁰ बिलकूल नहीं! मंए कहथों, कि मूरती पूजा करोईया मन, जे बलिदान चघाथें, ओमन परमेस्वर बर नहीं, बकिन भूत मन बर चघाथें, अऊ मंए नई चाहों कि तुमन भूत आत्मा मन कर संगे भागीदार होवा।

²¹ तुमन परभू कर कटोरा अऊ भूत मन कर कटोरा, दुनों में ले नई पी सका। तुमन परभू कर मेज अऊ भूत मन कर मेज, दुनों में सामिल नई होए सका।

²² का हमरे परभू ला गुसा देवाथन? का हमरे ओकर ले ढेर बलवान हवन?

परभू कर महिमा बरीक जीयत रहा

²³ “मोके सब जाएत करे कर छुट हवे,” बकिन सब जाएत हर फयदा कर ना लागे, “मोके सब जाएत करे कर छुट हवे,” बकिन सब जाएत ले दूसर झेमन कर आत्मिक बढ़ती नई होए।

²⁴ हमके सिरीप अपनेच भलाई नहीं, बकिन दुसरो झेमन कर भलाई कर, खियाल राखे बर चाही।

²⁵ बजार में जे मांस हर बेंचाथे, ओला अपन मन कर सांती बरीक बिगर सवाल करे खावा।

²⁶ काबरकि पबितर किताब हर कथे, “धरती अऊ ओमें जे जाएत हवे, ओ सब हर परभू कर लागे।”

²⁷ अगर अबिस्वासी में ले कोई तुमन ला खाए बर बलाथे, अऊ तुमन जाए बर चाहथा, त जे जाएत तुमन कर आगू में परोसल जाथे, ओला अपन मन कर सांती बरीक बिगर सवाल करे खावा।

²⁸ बकिन अगर कोनो तुमन ला बताए देथे, कि एहर मूरती मन ला चघाल चीज लागे, त ओ बतोईया कर चलते अऊ अपन मन कर सांती बरीक ओ खाना ला झईन खईहा।

²⁹ मंए तुमन कर बारे नहीं, बकिन दूसर मईनसे कर मन कर बारे में बतात हों। काबरकि मोर आजादी हर, दूसर कर बिचार ले काबर परखल जाए?

³⁰ अगर मंए परमेस्वर कर धनबाद कएर के ओ खाना में सामिल होथों, त मंए जे खाना बर धनबाद करथों, ओकर कारन मोर ऊपरे दोस काबर लगाल जाथे?

³¹ तेकर ले तुमन चाहे खावा, चाहे पीया, चाहे जे जाएत करा, सब ला परमेस्वर कर महिमा बर करा।

³² तुमन ककरो बर रुकावट झईन बना, चाहे ओहर यहूदी होए, चाहे गैर यहूदी होए, चाहे परमेस्वर कर कलीसिया होए।

³³ जे जाएत मंए करथों ओकर द्वारा, मंए सब मईनसे मन ला खुस राखे कर कोसिस करथों, अऊ मंए अपन भलाई नहीं, बकिन ढेरेच झेमन कर भलाई ला खोजथों, कि ओमन उद्धार पाएं।