John 4 - Ho i’wi y os’do̱s hăħ neh cha ga̱’o̱ hee dus gee ih’ ni ga’ya do̱s’hă gee 1872

¹ Neħˑhuh dih niˑyòòˑweħ' noˑnă̱h' Na'yaħ'daˑgwĕnˑniˑyòħ' waaˑyă̱nˑdeeħ' hoˑdiˑwa'o̱o̱ˑgă̱ħ' ne Phaˑriˑsees, heh oħˑto̱'wa̱ˑgă̱ă̱ˑniħ' ne John heh gotˑgaħˑdeħ, naeh', ne Jeˑsus waˑo̱ˑwa̱ˑiˑwaˑgwĕnˑni'yòs neħ' kuh ne weeˑsòħ' ne bapˑtism wa'go̱ˑye'ăħˑdah'gwă̱ħ;

² (Neħ gwaa naeh ne Jeˑsus' naˑgwas' haˑo̱hˑhwa̱ħ, tă̱ħˑă̱h' naeh deˑa'go̱ˑye'ăħˑdah'gwaˑnih ne bapˑtism, neħ' gwaa' naeh naˑgo̱'iˑo̱ˑnyaˑnih,)

³ Neħ nòò'tăˑdaˑdo̱h' ne Juˑdea, neħˑhuh' aeħ' shotˑgo̱n'dahˑgo̱h ne Gaˑliˑlee.

⁴ Da neħ' dih noħˑga'iˑwaˑyă̱n'daħtˑheħ ne' neħˑhuh ă̱ˑa̱'at ne Saˑmaˑria.

⁵ Oˑnă̱h' neħˑhuh' hoˑyo̱s'o̱h heˑga'no̱nˑdaˑyă̱ħ, he'dyo̱ˑă̱nˑjaˑdeħ' ne Saˑmaˑria, neħ' ne Syˑchar gaˑyaaˑso̱h, dosˑgă̱'o̱h heˑniˑyo̱ˑă̱nˑjaaˑdeħ' ne Jaˑcob hoˑwii noˑaaˑwak' Joˑseph.

⁶ Da neħ ne Jaˑcob haˑjă̱h'dahˑgwak' ne neħˑhuh dyò'yaaˑdeħ. Da neħ dih ne Jeˑsus oˑnă̱h deˑos'geˑeˑyo̱o̱h, heh hatˑha'iˑneħ, neħˑhuh heˑyeˑjă̱h'dahˑgwaħ' wa'aˑdyă̱ă̱ħ; neħˑhuh' no̱o̱ oˑnă̱h' ne yeeˑiħ chiˑyò'isˑdaaħˑeeh chiˑga'wiħs.

⁷ Da neħ', ne' neħˑhuh goˑyo̱s'o̱h ne' yaˑgo̱o̱ˑgweh Saˑmaˑria na̱ħˑaˑga'ă̱ˑjoħˑdă̱ħ yeˑjă̱'eħ; Shaˑgaˑwă̱ˑo̱h'seeh ne Jeˑsus, Neh' ne daaˑgo̱h' nă̱kˑne'geˑăħ.

⁸ (Neħ să̱ħˑă̱h' naeh naˑgo̱'iˑo̱ˑnyaˑnih', neħˑhuh' heˑoˑneeˑno̱o̱h he'tgaˑno̱nˑdaˑyă̱ħ, hoˑdii'niˑno̱'no̱o̱h niˑyees.)

⁹ Oˑnă̱h' deˑdya'gosˑnyeħ'o̱h, ne' yaˑgo̱o̱ˑgweh', ho̱ˑwă̱'o̱hˑseeh, Aˑniˑyòħˑdă̱ă̱ niis' nă̱ˑgă̱ă̱, Jew no̱ħˑsyaħ'doħˑdă̱ħ, sgaˑdo̱ˑeˑsyo̱h'gwaˑnih naa'go̱ˑneˑgaˑno̱nt iiħ nă̱ˑgă̱ă̱ go̱'gweh Saˑmaˑria no̱ˑgo̱'ă̱ˑjoħ'dă̱ă̱ħ, neħ să̱ħˑă̱h ne Jews tă̱ħˑă̱h deˑoˑno̱nˑdi''waˑdeħ ne Saˑmarˑiˑtans.

¹⁰ Detˑhòs'nyeħˑo̱h ne Jeˑsus', shaˑgaˑwă̱ˑo̱h'seeh, Neħ' giħˑshă̱h ne' teħˑsyă̱nˑdeeˑih heˑno̱ħˑdooˑyaħ'doˑweeh'do̱h Naˑwĕnˑniˑyòħ', neħ kuh ne teeh'so̱ˑgweħ'daˑyă̱nˑdeeˑih' ne yă̱ˑo̱h'seh dakˑneˑgaˑno̱nt; neħ'' na'eˑsaˑgweeˑnyo̱o̱h'' naˑeˑsaˑdo̱'eˑsyo̱h'go̱h haaˑyaħ'daˑdeħ, neħ' na'oˑgwe'nyo̱sˑo̱h neħ' a'aˑyaˑwiih no'neˑgaˑnòs' ne' yo̱hˑheħ'o̱ˑweh.

¹¹ Neħ ne sho̱ˑwă̱'o̱hˑseeh ne yaˑgo̱o̱ˑgweh', Syaħ'daˑgwĕnˑniˑyòħ, tă̱ħˑă̱h' waeh deħˑsaaˑyă̱ħ' naah'seˑjă̱h'dak; neħ gwaħˑhuh' noˑyaaˑdees' heˑyeˑjă̱h'dahˑgwaħ; ga'ă̱ˑo̱ˑweeh' di ne gă̱ă̱ħ' dasˑha'wihˑdak' ne yo̱hˑheħ'o̱ˑweh no'neˑgaˑnòs?

¹² Neħ' gă̱h, neh si''gwaa heˑniˑsa'yaħˑda'năˑăˑgwat, naeh heˑniˑò'yaħˑdaˑnăă'gwahˑdo̱'no̱ħ ne Shaˑgwaħ'nih Jaˑcob, nă̱ˑgă̱ă̱ ne' sho̱ˑgwaˑwiih' heˑyeˑjă̱h'dahˑgwaħ, neħˑhuh' kuh haaˑneˑgeˑăħ'dahˑgwak' ne'aˑo̱ˑhwa̱ħ, kuh nookˑsaħ'daħˑsho̱ħ, kuh noosˑhe'nă̱ħˑsho̱ħ?

¹³ Detˑhòs'nyeħˑo̱h ne Jeˑsus, Shaˑga'wă̱ˑo̱h'seeh, So̱n'diħˑgwa'naħˑot ă̱ˑye'neˑgeˑăħ nă̱ˑgă̱ă̱ o'neˑgaˑnòs', ă̱ˑje'aħˑdaatˑhă̱h neˑhuh naeh;

¹⁴ Neħ gwaa' neh, so̱n'diħˑgwa'naħˑot ă̱ˑye'neˑge'ăħ no'neˑgaˑnòs niiħ nă̱'eeˑno̱nt', tă̱ħˑă̱h' deˑwă̱nˑdo̱h' to̱ˑsa'aħˑdaatˑhă̱h; neħ gwaa' no'neˑgaˑnòs' niiħ nă̱'eˑno̱nt, dyòtˑgo̱nt' naeh naˑyaħ'daˑgo̱o̱ ă̱ˑdyo'nyaˑă̱h'seek neˑwaħˑo'iˑwaˑdaˑdyeħ'gĕh yo̱hˑheħ'o̱ˑweh.

¹⁵ Neħ ne sho̱ˑwă̱ˑo̱hˑseeh ne yaˑgo̱o̱ˑgweh', Syaħ'daˑgwĕnˑniˑyòħ, dakˑno̱nt nă̱ˑgă̱ă̱' o'neˑgaˑnòs', neħ' dih neh, to̱o̱'sakˑhaħ'datˑhă̱h; tă̱ħˑă̱h' kuh' taħˑdo̱o̱ˑdaˑgeet' ne do̱nˑdaˑge'jă̱ˑeħ.

¹⁶ Shaˑga'wă̱ˑo̱h'seeh ne Jeˑsus, Sah'dă̱nˑdih, hwaˑe'jiˑno̱o̱k ne' deˑjaˑdii', da gaˑòħ' kuh no̱ħˑdă̱ă̱ˑcheeħ.

¹⁷ Deˑdyaˑgòsˑnyeħ'o̱h ne yaˑgo̱o̱ˑgweh, gaˑwă̱ă̱', tă̱ħˑă̱h niiħ' deħˑaˑgeˑnyaˑgo̱h. Neħ noħ'shaˑgaˑwă̱ă̱'o̱s' ne Jeˑsus, Neħ ne' dahˑsyeˑis' he'neˑsa'wă̱ˑno̱ˑwă̱h, Tă̱ħˑă̱h niiħ' deħˑa'geˑnyaˑgo̱h.

¹⁸ Neħ să̱ħ'ă̱h waeh, ne wĭs' niˑsa'nyakˑheħˑo̱h; da neħ' nă̱ˑgă̱ă̱ ne'waħ deˑjaˑdii', tă̱ħˑă̱h' deħˑneeħ' deħ'jiˑnyaˑgo̱h; gaˑi'waˑgwĕnˑniˑyòħ' dih ne' neħ noħ'siħ.

¹⁹ Neħ ne yaˑgo̱o̱ˑgweh' ho̱ˑwă̱'o̱hˑseeh, Syaħ'daˑgwĕnˑniˑyòħ, neħ ne geˑgaħ'ă̱ˑyo̱'o̱h, Saˑdo'gă̱sˑdaaˑnih' ă̱ă̱ħ'no̱o̱.

²⁰ Neħ nakˑhiħ'nisˑho̱ħ'gă̱ˑa̱a̱ħ neħˑhuh' hă̱ˑno̱n'dă̱ˑno̱ˑyă̱nˑdah'gwak nă̱ˑgă̱ă̱' o'no̱nˑdaˑdeħ; neħ' dih niis' ne swaˑdo̱h', Jeˑruˑsaˑlem neˑgă̱ħ' he'o̱ˑweh gaˑiˑwaˑyă̱n'dahˑgo̱h aˑă̱'no̱nˑdă̱ˑno̱ˑyă̱n'dahˑgwaak no̱ˑgweh.

²¹ Shaˑgaˑwă̱ˑo̱h'seeh ne Jeˑsus, Si'o̱h, daˑgi'waˑgwĕnˑniˑyòs', neħ' ne daaˑweħ' heˑniˑga'isˑdaaħˑes, noˑnă̱h' neħ' nă̱ˑgă̱'a̱a̱k deħˑjiˑswaˑgweeˑnyo̱o̱', ha'eħˑgwah nă̱ˑgă̱ă̱ oˑno̱n'daˑdeħ', tă̱ħˑă̱h' kuh ha'eħˑgwah ne Jeˑruˑsaˑlem, ne do̱'sasˑheˑswaˑă̱h'să̱ˑo̱ˑnyo̱o̱ħ' Nooħ'nih.

²² Neħ' swaˑdă̱ˑno̱ˑyă̱ˑniħ', ne tă̱ħ'ă̱h deħˑòs'to̱o̱h deħ'swaˑyă̱nˑdeeˑih; neħ' niiħ' naˑgwa'yă̱ˑdeeˑih' naˑgwa'iˑwaˑyă̱ă̱ˑnih, neħ să̱ħ'ă̱h haaˑdi'yaħˑdaaˑdeħ' ne Jews' ne'huh dyaˑweh'dahˑgo̱h ne jaˑgo̱ˑyaħˑda'gwatˑhaħ.

²³ Neħ gwaa' heˑniˑga'isˑdaaħˑes' daaˑweħ, neħ kuh nă̱ˑgă̱ă̱ neˑwaħ oˑnă̱h', noˑnă̱h ne gaˑi'waˑgwĕnˑniˑyòħ' iˑgă̱ă̱ he'o̱ˑweh niˑye'iˑwaˑyă̱ˑnih, tgaˑgo̱nt' neħ notˑhwa'isˑhă̱ˑgo̱o̱ kuh ne gaˑi'waˑgwĕnˑniˑyòħ ă̱ˑya'goˑdye'ăħˑdah'go̱ˑo̱o̱k' heh ă̱'o̱ˑwa̱'iˑwaˑyă̱'niˑaak Nooħ'nih; neħ să̱ħ'ă̱h hihˑsaas Nooħ'nih ne' neħˑhuh iˑgă̱ă̱ niˑyòħ'dă̱ă̱h neh, ă̱'o̱ˑwa̱'iˑwaˑyă̱'niˑaak.

²⁴ Neħ ne'huh not'hwaaˑiħ' haaˑyaħ'daˑdeħ' Naˑwĕnˑniˑyòħ'; da neħ' dih kuh haaˑdi'yaħˑdaaˑdeħ no̱ˑwa̱'iˑwaˑyă̱ˑnih, tgaˑgo̱nt' neħ ne gaˑiˑwaˑgwĕnˑniˑyòħ, otˑhwa'isˑhăˑgo̱o̱' gwaħˑhuh nă̱nˑtoˑdiˑa'wihˑdah'go̱ˑo̱o̱k' heh ă̱ˑo̱ˑwa̱'iˑwaˑyă̱'niˑaak.

²⁵ Neħ ne sho̱ˑwă̱'o̱hˑseeh ne yaˑgo̱o̱ˑgweh', aˑgă̱'no̱hˑdo̱ħ' naeh he' daˑeħ ne Mesˑsiah, ne Christ' ho̱ˑwa̱ˑyaas; da neħ' noˑnă̱h' ă̱'o̱ˑyo̱ħ', oˑi'waˑgweˑgo̱h' neħ ă̱sˑho̱'gwaˑoˑwih.

²⁶ Neħ ne shaˑgaˑwă̱ˑo̱hˑseeh ne Jeˑsus, Iiħ' waeh ne'huh nă̱ˑgă̱ă̱ ne go̱sˑnyeħ'seh.

²⁷ Da neħˑhuh niˑyòˑweħ' oˑnă̱h' hoˑdi'yo̱sˑo̱h naˑgo̱'iˑo̱ˑnyaˑnih, neħ ne waˑoˑdi'waˑnăă'gòħ heh ye'o̱h ne deˑo'ditˑhaaħ; tă̱ħˑă̱h gwa deħˑsha'yaħˑdaatˑah no̱'gweh deˑaˑwă̱ă̱ħ', Aˑnaħˑot' siħˑsaas'? neħ' giħˑshă̱h na'ă̱ħ, A'naeh goˑwaa' neħ' deˑjiitˑhaah?

²⁸ Neħ ne'huh sho̱ waħˑo̱o̱tˑgaħ ne' yeˑneˑgăăh'gwaħ ne yaˑgo̱o̱ˑgweh, goħˑdă̱n'dyo̱sˑo̱h gaˑno̱nˑdaˑgo̱o̱' he'jaˑgaˑweˑno̱o̱, neħ no̱ˑwă̱'nă̱ˑo̱h'seeh nă̱ă̱'no̱ˑgweh',

²⁹ Daˑjah'dă̱nˑdih, sheˑswaˑgă̱h no̱''gweh, neˑyò'iˑwaˑgweeˑgo̱h' waak'hyóˑwiħ' he'niˑwa'gaˑdye'ă̱h; Tă̱ħˑă̱h gă̱h' deħˑneeħ' nă̱ˑgă̱ă̱ ne' Christ?

³⁰ Oˑnă̱h' hoˑdiˑyaˑgă̱ħ'o̱h heˑgaˑno̱nˑdaˑyă̱ħ, neħˑhuh' hoˑdi'yo̱sˑo̱h haaˑyaħ'daˑdeħ.

³¹ Da neħ' dih, ne deˑyò'gă̱hˑgĕh nă̱ˑgă̱ă̱, ho̱'wa̱ˑdo̱ˑe'syo̱hˑgwaˑniih' naˑgo̱'iˑo̱ˑnyaˑnih, hoˑnă̱ă̱' Saˑdi'o̱ˑnyaˑnih, saˑdek'ho̱ˑnih.

³² Neħ gwaa' naˑgo̱ˑyă̱ˑo̱h'seeh, neħ naˑgyă̱ħ' niiħ niˑgees', ne tă̱ħ'ă̱h niis' deħˑswaˑyă̱nˑdeˑih.

³³ Neħ daˑyò'iˑwaħ'heħt de'oˑno̱nˑda'dă̱ˑo̱h'seˑno̱ˑniih' naˑgo̱'iˑo̱ˑnyaˑnih', so̱ˑgaaħ' gă̱ neˑgă̱ħ' no̱o̱'gweh ho̱ˑwa̱'eeˑwiih' naˑaak'?

³⁴ Neħ naˑgo̱ˑyă̱ˑo̱h'seeh ne Jeˑsus, Neħ' niiħ aˑgeek'hwaħ', ne' neħˑhuh nă̱nˑdwa̱ˑgye'a̱nˑdyeħ' he'nitˑhoħ'niˑgooħ'dă̱ă̱h ne taˑgeh'haħˑo̱h, neħ kuh nă̱ˑgaˑdyă̱'nòħkˑdă̱ħ noˑi'oħˑdas'hăħ.

³⁵ Tă̱ħ'ă̱h gă̱h' deħˑswaaˑdo̱h', Neħ nahˑso̱h geeˑih' niˑwă̱'niħˑdaaˑgee, oˑnă̱h' hă̱ˑga'eeħ heˑnă̱ˑye'yă̱ntˑtwaˑgwaˑo̱o̱ħ? Jatˑga'ă̱ˑo̱h, neħ noħˑgwă̱'o̱s, deˑswah'gwaħt ne swaˑgaaħ'sho̱ħ, neħˑhuh' swatˑgaatˑhòh' heˑgaˑyă̱nt'twahˑso̱ħ, neħ să̱ħ'ă̱h neh oˑno̱'wa̱ħˑdaħ'ă̱ă̱ħ niˑyòħ'dă̱ă̱, oˑdeh'saħˑo̱h' sho̱ nă̱ˑga'yă̱ntˑtwa'gwă̱ˑo̱o̱k.

³⁶ Neħ haaˑyaħ'daˑdeħ naˑyă̱nt'twaˑgwʋs' hòtˑtga'nyaħˑgih, neħ' kuh ne waˑe'oˑeek' noˑdo̱ˑnii ne' dyotˑgo̱nt ha'yo̱hˑheˑdyeħ; neħ ne' deˑiˑgweˑgo̱h noˑno̱h'gwă̱ˑa̱nˑdyeħs' kuh naˑyă̱n'twaˑgwʋs' haħˑdă̱ă̱'yaˑdyes ă̱ˑò'no̱ħˑeesˑhaħ.

³⁷ Neħˑhuh dih neˑgă̱ħ nă̱ˑgă̱ă̱ he'o̱ˑweh niˑwă̱'o̱hˑseeh, niˑga'iˑwaˑgwĕnˑniˑyòħ, Shaˑyaħ'daat ne waˑo'no̱hˑgwă̱'o̱nˑdiħ, oˑyaħ' naeh ne daa'yă̱ntˑtwaˑgòħ.

³⁸ Neħ' dih, niiħ'' tgwahˑhaħ'o̱h nă̱ˑswa'yă̱ntˑtwaˑgòħ', he'o̱ˑweh niis' deħˑtaħ'gwĭsˑdă̱ħ deħˑswaˑdyeˑòħ'daˑdo̱h; oˑyaħ' naeh nă̱ˑno̱ˑgweh' hoˑno̱nˑdyeˑòħ'daˑdo̱h, da iis' ne'waħ neħˑhuh' heˑswaˑyo̱o̱' he'o̱ˑweh' niˑgaaˑyă̱ħ' noˑdiˑòħ'das'hăħ.

³⁹ Da neħ' noˑno̱nt'tgaħˑdeħ' ne Saˑmaˑriˑtans ne' toˑneehˑdo̱h' heˑgaˑno̱nˑdaˑyă̱ħ', ne waˑo̱ˑwa̱ˑiˑwaˑgwĕnˑniˑyòs', neħ sho̱ daˑyòˑiˑwaħ'heħt heˑno̱ħ'o̱ˑgoˑwă̱'no̱ˑwă̱h ne yaˑgo̱o̱ˑgweh goˑi'waˑgwa'ihˑso̱o̱, Neħ' noˑgweˑgo̱h' waak'hyòˑwiħ' heˑno̱nˑdo̱ˑgaˑdye'a̱nˑdyeħ' he'no̱ħˑweeħ.

⁴⁰ Neħˑhuh dih noˑnă̱h' ne Saˑmaˑriˑtans neħˑhuh' hoˑdi'yo̱sˑo̱h haˑyaħ'daˑdeħ', neħˑno̱ˑwa̱nˑdo̱ˑe'syo̱hˑgwaˑnii, neħˑhuh' sho̱ yaaˑeħ' a'oˑă̱ħ'heħˑo̱'o̱o̱k haˑdi'yaħˑdaaˑdeħ; daˑneħ' ne deˑwă̱'nĭsˑhăăˑgee' neħˑhuh' hoˑă̱ħ'ˑheħˑo̱h.

⁴¹ Neħ nah'so̱h sa'yòˑgă̱ă̱'is ne saˑo̱ˑwa̱'iˑwaˑgwĕnˑniˑyòs, neħ naeh dyòˑi'waħ heˑna'oˑwă̱ˑno̱'wă̱hˑsyo̱o̱ħ ne'aˑo̱ˑhwa̱ħ.

⁴² Neħ' kuh ne shaˑgoˑnă̱ˑo̱h'seeh ne' yaˑgo̱o̱ˑgweh', Oˑnă̱h' waħˑaˑgwa'iˑwaˑgwĕnˑniˑyòs, tă̱ħˑă̱h naeh' deħˑdyòˑiˑwaħ heˑniˑsaˑwă̱ˑno̱'wă̱ħˑo̱h; neħ să̱ħ'ă̱h naˑgwʋs' iiħ oˑnă̱h' shaˑgwaˑwă̱ˑno̱'o̱ˑgă̱h, neħˑkuh no̱ˑgwă̱'no̱hˑdo̱ħ he do'gă̱s o̱ˑweh neħ ne Christ, ne' Sho̱hˑheeˑdas' he'yo̱ˑă̱nˑjaˑdeħ.

⁴³ Neħ noˑnă̱h' shahˑga'at ne deˑwă̱'nĭsˑhăˑgee, hoˑtă'daˑdo̱h' ne' neħˑhuh, neħ noohˑdă̱n'dyo̱sˑo̱h, Galˑiˑlee heˑo'yo̱sˑo̱h'.

⁴⁴ Neħ să̱ħ'ă̱h ne'aˑo̱ˑhwa̱ħ' ne Jeˑsus' waˑi'waˑgwaˑihˑsiħ', he tă̱ħˑă̱h' naˑeh deˑoh'să̱ˑniˑyòò noˑdo'gă̱sˑdaaˑnih he'o̱ˑweh' niˑa'no̱ˑgeħ.

⁴⁵ Da neħ'dih noˑnă̱h' neħˑhuh' waˑaˑyo̱ħ' ne Galˑiˑlee, neħ ne' waˑo̱ˑwa̱ˑgòħ' ne Galˑiˑleans, neħ heˑtoˑno̱nt'tgatˑhwă̱h neˑyò'iˑwaˑgweˑgo̱h' heˑno̱nˑdaa'dyeeħ Jeˑruˑsaˑlem, ne chiˑtoˑno̱ˑdek'hwaˑeeħ; neħ să̱ħˑă̱h neh, neħˑhuh' ha'eħˑgwah heˑă̱'neħˑsgwaħ he'toˑno̱n'dekˑhweˑo'o̱ˑno̱ħ.

⁴⁶ Neħˑhuh dih aeħ' no̱ħˑdet'haˑweeˑno̱o̱' ne Jeˑsus, shoˑyo̱s'o̱h ne' Caˑna ne a'ă̱nˑjaħˑgĕh ne Galˑiˑlee, he'o̱ˑweh no'neˑgaˑnòs' wine hosˑyo̱ˑniih. Da neħ naˑyaħ'daˑdòòˑgă̱ă̱h go'wăhˑgoˑwaah hoˑhaħ'shăħ neħ nò'aaˑwak' toˑno̱o̱kˑdaˑnih' heh' tgaˑno̱nˑdaˑyă̱ħ Caˑperˑnaum.

⁴⁷ Neħ noˑnă̱h' waˑò'iˑwa'o̱o̱k he'detˑho'yaˑgă̱ħ'o̱h ne Jeˑsus ne Juˑdea, Galˑiˑlee detˑhoˑyo̱o̱', neħˑhuh' heˑaˑweeˑno̱o̱' heˑtaˑyaħ'daˑdeħ, hoˑdo̱ˑeˑsyo̱h'gwaˑnii ne' neħˑhuh o̱n'daˑeet, o̱'saˑoˑjă̱ħt' no'aaˑwak; neħ să̱ħ'ă̱h neh, oˑnă̱h' neħˑhuh' heˑgaaˑdeħ' nă̱'eeˑyo̱s.

⁴⁸ Oˑnă̱h ne Jeˑsus, haˑwă'o̱hˑseeh, Neħ nă̱ˑgă̱'a̱a̱k deħˑswaˑgă̱ă̱ħ' noˑyă̱nˑdeet' aaˑyo̱ˑnyaa'no̱o̱ħ, kuh noˑi'waˑnăăˑgwah'do̱ħs', tă̱ħˑă̱h' deħˑaaˑo̱h' aeh'swai'waˑgwĕnˑniˑyòs.

⁴⁹ Neħ ne go'wăhˑgoˑwaah hoˑhaħ'shăħ detˑħos'nyeħˑo̱h, haˑwă̱'o̱hˑseeh, Syaħˑdaˑgwĕnˑniˑyòħ, gaa'oħ' daˑseet, ahˑso̱h' ă̱ˑgă̱'a̱a̱k deˑa'weˑeˑyo̱o̱ neh' he'aˑwak.

⁵⁰ Detˑhos'nyeħˑo̱h ne Jeˑsus, haˑwă̱'o̱hˑseeh, Sahˑdă̱nˑdih; neħ' naeh shoˑdo̱ħ'o̱o̱nˑdyeħ nees'haˑwak. Neħ ne waˑi'waˑgwĕnˑniˑyòs' no̱'gweh he'naˑoˑwă̱ˑno̱'wă̱h ne Jeˑsus waˑos'snyeħs, neħ noohˑdă̱nˑdyo̱sˑo̱h.

⁵¹ Da neħ' dih noˑnă̱h' neħˑhuh' ho̱ˑsa'we'no̱ˑo̱nˑdyeħ' oħˑto̱ˑwa̱ˑdăt' noˑhaħ'shăħˑsho̱ħ, hoˑnă̱ă̱', shoˑdo̱ħ'o̱ˑo̱nˑdyeħ' nee'shaˑwak.

⁵² Oˑnă̱h' haˑgo̱ˑyaˑo̱n'do̱sˑo̱h heˑniˑdyò'ĭsˑdaħ'eeˑno̱ħ' noˑnă̱h' sho̱ˑsaa'do̱o̱ˑgweeħ. Neħ no̱ˑwă̱ˑo̱hˑseeh, Tee'dă̱h, jaaˑdak' chiˑjò'ĭsˑdaaħˑeeh' waˑo'yaħˑdaatˑgaħ' noħˑdo̱h'goˑăăsˑgwaħ.

⁵³ Da neħ ne toˑno̱h'do̱ħ nooħ'nih he neħ' sho̱ kuh naeh shaħˑgaat' chiˑdyòˑĭsˑdaħ'eeˑno̱ħ no̱ˑnă̱h' ne Jeˑsus sha'wă̱ˑo̱s, Ho̱ˑheħ' naeh, shoˑdo̱ħ'o̱ˑo̱nˑdyeħ kuh neesˑhaaˑwak; da neħ ne'aˑo̱hˑhwa̱ħ waˑi'waˑgwĕnˑniˑyòs, kuh neh' hoˑno̱h'saˑgweeˑgo̱h.

⁵⁴ Da neħ' nă̱ˑgă̱ă̱ ne' dekˑni waˑdo̱ħ'taħ aeħ' ne Jeˑsus oˑi'waˑnăă'gwat heˑno̱ˑo̱nˑdyeeħ noˑnă̱h' shaħˑdetˑhoˑya'gă̱ħˑo̱h ne Juˑdea, Galˑiˑlee hesˑho'yo̱sˑo̱h.