3 Ioane 1 - Samoan Contemporary New Testament

O le ‘Upu Tomua

¹ O le tusi lenei a le toeaina ‘iā Kaio, o le pele, o lē ‘ou te alofa fa‘amaoni i ai.

² La‘u uō pele, ‘ou te tatalo ‘ina ‘ia manuia oe i mea uma lava, ia mālōlōina lou tino e pei ‘ona manuia o lou agaga.

³ ‘Ua ‘ou matuā fiafia ‘ina ‘ua ō mai nisi uso ma fa‘aali mai o lo‘o e fa‘amaoni lava i le ‘upu moni, fa‘apei ‘ona e ola ai i le ‘upu moni.

⁴ E leai so‘u fiafia e sili atu i lo lo‘u fa‘alogo atu o lo‘o ola la‘u fānau i le ‘upu moni.

‘Ua Vi‘ia Kaio

⁵ La‘u uō pele e, ‘ua e fa‘amaoni lava i mea uma na e faia mo le ‘au uso, e ui lava o tagata ‘ese i latou;

⁶ na molimau mai i latou i lou alofa i luma o le ekalesia. Fa‘amolemole ia fesoasoani ‘iā te i latou i ala e fiafia ai le Atua.

⁷ Auā na ō atu i latou i le galuega a Keriso e aunoa ma le taliaina o se fesoasoani mai tagata o Nu‘u ‘ese.

⁸ E tatau ‘ona tatou lagolagoina na tagata, ‘ina ‘ia tatou fesoasoani atu ‘iā latou galuega mo le ‘upu moni.

O Tioterifi Ma Temetiu

⁹ Na ‘ou tusi atu i le ekalesia; a o Tioterifi o lē ‘ua fia sili ‘iā te i latou, na te le‘i taliaina i matou.

¹⁰ O le mea lea ‘āfai ‘ou te alu atu, ‘ou te fa‘amanatu atu ‘iā te ‘outou mea na faia e ia, o mea mata‘utia na fai atu e ia e uiga ia i matou, ‘atoa ma le pepelo na fa‘aali mai e ia ‘iā te i matou. E lē gata fo‘i i ia mea, ‘ae le‘i talia fo‘i e ia le ‘au uso, na vavao atu fo‘i i ē na loto i ai, ma fa‘ate‘a i latou i le ekalesia.

¹¹ La‘u uō pele e, ‘aua ‘e te fa‘aa‘oa‘o i le leaga, a ‘ia fa‘aa‘oa‘o i le lelei. O lē e faia mea lelei e mai le Atua lava ia; o lē e fai mea leaga, e le‘i iloa atu lava e ia le Atua.

¹² ‘Ua logoleleia Temetiu e tagata uma lava ‘atoa ma le ‘upu moni. E fa‘aopoopo atu fo‘i i ai la matou molimau, ‘ia iloa ai e ‘outou e moni la matou molimau.

O Toe ‘Upu

¹³ E tele mea ‘ou te fia tusi atu ai ‘iā te oe, ‘ae ‘ou te lē mana‘o e fa‘aaogāina le peni ma le vaitusi.

¹⁴ ‘Ou te fa‘amoemoe e fia feiloa‘i ma oe i se taimi e lē o mamao, ‘ina ‘ia ta fetautalatala‘i.

¹⁵ ‘Ia ‘iā te oe le manuia. O lo‘o alolofa atu ‘iā te oe au uō uma. ‘Ou te alofa atu ‘iā tatou uō uma lava.