2 Timoteo 3 - Samoan Contemporary New Testament

O Aso Mulimuli

¹ ‘Ou te loto ‘ina ‘ia e iloa, o aso mulimuli o le a o‘o mai ai puapuagā ‘iā te i tatou.

² Auā o tagata o le a alolofa ifo ‘iā te i latou lava, ma le mana‘o i tupe, o le a mitamitavale, ma manatu fa‘amaualuga ma fai ‘upuleaga; o le a lē usiusita‘i i latou i o latou matua, e lē loto fa‘afetai, ma le lē pa‘ia;

³ e lē agalelei i latou, ma lē alolofa, ma tu‘ua‘ifua, ma lē tāofi mana‘o o le tino, ma fa‘asauā, e ‘ino‘ino i latou i le lelei.

⁴ E fa‘alata i latou ma so‘ona fai ma manatu fa‘amaualuga; e mana‘o i fa‘afiafiaga a ‘ua leai se mana‘o i le Atua.

⁵ ‘Ua tausia e i latou itū i fafo o le lotu a ‘ua te‘ena e i latou le mana. ‘Ia e ‘alo ‘ese i tagata fa‘apenā.

⁶ E ō atu nisi o i latou i ‘āiga ma pule fa‘amalosi i fafine vāivāi, o ē ‘ua ta‘ita‘i‘eseina ‘iā latou agasala, ma ‘ua ta‘ita‘iina solo i mana‘o ‘ese‘ese.

⁷ ‘Ua lē aunoa ‘ona a‘oa‘oina i latou ‘ae lē iloa lelei le ‘upu moni.

⁸ E pei o Iani ma Iameri o ē na tete‘e atu ia Mose, e fa‘apea fo‘i ‘ona tete‘e atu o nei tagata i le ‘upu moni. ‘Ua lotoleaga ‘ina ‘ua lē fa‘amaoni i latou i la le ‘upu moni.

⁹ ‘Ae lē aga‘i i luma i latou, auā ‘ua iloa lelei e tagata uma lo latou vālea, fa‘apei o Iani ma Iameri.

O Toe Fa‘atonuga

¹⁰ A o oe, ‘ua e iloa lelei i la‘u a‘oa‘oga, ma la‘u amio, ma lo‘u fa‘amoemoe i le ola; ‘ua e iloa uma lava lo‘u fa‘atuatua, ma lo‘u ‘onosa‘i, ma lo‘u alofa, ‘atoa ma lo‘u tumau.

¹¹ O sauāga ma puapuagā na o‘o ‘iā te a‘u i Anetioka, ma Ikonio ma Lusa, o sauāga ia na ‘ou tauivi i ai; peita‘i na lavea‘iina a‘u e le Ali‘i mai nei mea uma.

¹² O i latou uma lava o ē e loto ia ola i le amioatua ‘iā Keriso Iesu, e fa‘asauāina i latou;

¹³ a o tagata amioleaga ma tala pepelo, e alualu pea lo latou leaga. O le a fa‘asesēina nisi e i latou ma o le a fa‘asesēina fo‘i latou e i latou lava.

¹⁴ ‘Ae tatau ‘ona e fa‘amaoni i le ‘upu moni na a‘oa‘oina ai oe, o le mea ‘ua e matuā talitonu i ai auā ‘ua e iloa ē na a‘oa‘o atu ‘iā te oe,

¹⁵ ma ‘ua e iloa fo‘i, talu lou tamaitiiti na e iloa Tusi Pa‘ia, na a‘oa‘oina fo‘i oe e o‘o atu i le fa‘aolataga, pe ‘āfai ‘e te fa‘atuatua ‘iā Keriso Iesu.

¹⁶ O le Tusi Pa‘ia ‘atoa e mai le Agaga o le Atua lea, e aogā fo‘i e a‘oa‘o ai, e fa‘atonu ai, e a‘oa‘oina ai fo‘i i le amiotonu,

¹⁷ ‘ina ‘ia ‘ato‘atoa ‘ona lelei ai o le tagata i le Atua, ma fa‘a‘aupegaina ai o ia ‘ina ‘ia faia galuega lelei uma lava.