2 Timoteo 2 - Samoan Contemporary New Testament

O le Fitafita Fa‘amaoni a Keriso Iesu

¹ O oe lo‘u atali‘i e, ia fa‘amalosia oe i le alofa tunoa o lo‘o ‘iā Keriso Iesu.

² ‘Ua e fa‘alogo i mea na ‘ou a‘oa‘o atu i luma o molimau e to‘atele. ‘Ia e tu‘uina atu na a‘oa‘oga i tagata fa‘amaoni, o ē ‘ua mafai fo‘i ‘ona a‘oa‘o atu i nisi.

³ O le mea lea, ia e ‘onosa‘i i puapuagā fa‘apei o se fitafita lelei a Keriso Iesu.

⁴ E leai se fitafita e tau i le tau‘a e fa‘alavelavea o ia e ia lava i mea o le ola nei; auā o lona fa‘amoemoe, ia fa‘afiafia lē na filifilia o ia e fai ma fitafita.

⁵ E lē fa‘apaleina se tagata ta‘alo pe ‘āfai e lē finau o ia e tusa ma tulafono.

⁶ O le faifa‘ato‘aga, o ia lea e tatau ‘ona maua muamua le fua.

⁷ ‘Ia e mafaufau i mea ‘ou te fai atu ai, ‘ona foa‘iina atu lea ‘iā te oe e le Ali‘i le malamalama i mea uma lava.

⁸ ‘Ia manatua Iesu Keriso o lē na toe fa‘atūina mai nai ē ‘ua oti, e tupuga mai o ia ‘iā Tavita, e pei ‘ona folafolaina atu i la‘u Tala Lelei;

⁹ o le Tala Lelei lea ‘ua ‘ou puapuagātia ai, ma ‘ua sāisāitia ai a‘u e pei o se pagotā; a o le afioga a le Atua e lē sāisāitia lava lea.

¹⁰ O le mea lea ‘ou te ‘onosa‘i ai i so o se mea, ‘ona o ē na filifilia e le Atua, ‘ina ‘ia maua fo‘i e i latou le fa‘aolataga o lo‘o ‘iā Keriso Iesu, ma le manuia e fa‘avavau.

¹¹ O le ‘upu moni lenei: “ ‘Āfai ‘ua tatou oti fa‘atasi ma ia, tatou te ola fa‘atasi ai fo‘i ma ia.

¹² ‘Āfai tatou te ‘onosa‘i, e fai fo‘i i tatou ma tupu fa‘atasi ma ia. ‘Āfai tatou te fa‘afitia o ia, e fa‘afitia fo‘i i tatou e ia.

¹³ ‘Āfai tatou te lē fa‘amaoni, e fa‘amaoni pea o ia, auā e lē mafai e ia ‘ona fa‘afiti ‘iā te ia lava.”

O le Tagata Faigaluega Fa‘amaoni

¹⁴ ‘Ia e fa‘amanatu ‘iā te i latou nei mea, ‘ua ta‘utino atu ‘iā te i latou i luma o le Ali‘i, ‘aua ne‘i fefinaua‘i i latou i ‘upu e leai se aogā, na ‘ona fa‘aleagaina ai ē e fa‘alogologo i ai.

¹⁵ ‘Ia e taumafai ‘ina ‘ia ‘avea oe ma tagata e fiafia i ai le Atua, fa‘apei o se tagata faigaluega e leai se mea e ma ai o ia i lana galuega, o lē na te a‘oa‘o tonu le ‘upu moni a le Atua.

¹⁶ ‘Ia e ‘alo‘alo ‘ese ma talanoaga lē aogā a tagata o lenei lalolagi; auā e fa‘atuputeleina ai le ta‘ita‘isesēina o tagata.

¹⁷ O a latou ‘upu e ‘a‘ati e pei se papala; o nisi o i latou o Umenio ma Fileto;

¹⁸ ‘ua sesē ‘ese i lā‘ua i le ala o le ‘upu moni, ma ‘ua fa‘aliliu‘eseina ai nisi i le fa‘atuatua, ‘ina ‘ua manatu i lā‘ua ‘ua uma ‘ona mavae atu le toetū.

¹⁹ ‘Ae peita‘i, o lo‘o tumau pea le fa‘avae mautū o le fa‘atuatua na tu‘uina e le Atua e lē mafai ‘ona lūlūina, o lo‘o tusia ai lenei fa‘aaliga: “ ‘Ua silafia e le Ali‘i ona lava tagata”; ma “O i latou uma lava o ē e tautala i le suafa o le Ali‘i, e tatau ‘ona liliu ‘ese mai le leaga.”

²⁰ O totonu o le fale tele o lo‘o i ai ipu, e lē na o ipu auro ma ipu siliva, a o ipu la‘au ma ipu ‘omea. O isi ‘ua ta‘uleleia, a o isi ‘ua ta‘uleagaina.

²¹ O le mea lea ‘āfai e fa‘amamā e se isi o ia lava mai nei mea, o le a ‘avea o ia ma ipu e ta‘uleleia, ‘ua fa‘asāina o ia mo le Atua, e aogā fo‘i i lona matai, ma ‘ua saunia mo galuega lelei uma lava.

²² ‘Ia e ‘alo ‘ese i tu‘inanau o taulele‘a, ma ‘ia e tausisi atu i le amiotonu ma le fa‘atuatua, ma le alofa ma le filemū, fa‘atasi ma i latou o ē e vala‘au i le Ali‘i ma le loto mamā.

²³ ‘Ia e ‘alo ‘ese fo‘i i fefinaua‘iga valea ma le lē aogā, ia e iloa o mea ia e tupu ai misa.

²⁴ E lē tatau ‘ona fa‘amisa o le ‘au‘auna a le Ali‘i, ia agalelei i tagata uma lava; o le faia‘oga lelei ma le ‘onosa‘i,

²⁵ o lē e a‘oa‘i atu ma le agamalū i ē e tete‘e mai. Atonu e tu‘uina atu ‘iā te i latou e le Atua le avanoa, ‘ina ‘ia salamō ai i latou ma iloa ai le ‘upu moni.

²⁶ ‘Ona sosola ‘ese ai lea o i latou i le mailei a le tiapolo, o ē ‘ua maua e ia e fai lona lava finagalo.