2 Peteru 2 - Samoan Contemporary New Testament

O A‘oa‘o Pepelo

¹ Sa i ai perofeta pepelo i le nu‘u e pei fo‘i ‘ona i ai ‘iā te ‘outou a‘oa‘o pepelo. O le a ‘aumaia fa‘alilolilo e i latou a‘oa‘oga e fa‘aumatia ai, ma fa‘afitia le Matai na lavea‘iina i latou, ma ‘aumaia ‘iā te i latou lava le malaia e vave o‘o mai.

² E to‘atele fo‘i o le a mulimuli atu i o latou ala leaga, ma ‘upuleagaina ai le ‘upu moni.

³ O lo latou matape‘ape‘a ‘iā te ‘outou, latou te ta‘u atu ai tala pepelo ‘iā te ‘outou ‘ina ‘ia maua ai e i latou tupe fa‘asili. E lē tuai mai ‘iā te i latou le sala na fetalai mai anamuā, e lē moe fo‘i lo latou malaia.

⁴ E le‘i fa‘asaoina e le Atua agelu na agasala, a ‘ua tu‘uina i latou e ia i le lua pogisā, o seoli, e fa‘atali ai mo le aso o le fa‘amasinoga.

⁵ E le‘i fa‘asaoina fo‘i e ia le lalolagi tuai, ‘ina ‘ua aumai e ia le lolo i le lalolagi o tagata fa‘alēmata‘u; na o Noa, o lona to‘avalu lea o tagata na fa‘aolaina, o lē na tāla‘i le amiotonu.

⁶ Na fa‘asalaina fo‘i e le Atua nu‘u o Sotoma ma Komoro, ‘ua liulefulefu i latou ma ‘ua fa‘aumatia; ‘ua ‘avea fo‘i i latou ma a‘oa‘oga mo ē e fa‘alēmata‘u i aso mulimuli.

⁷ ‘Ae peita‘i na fa‘asaoina e ia Lota, auā o ia o le tagata lelei, ma ‘ua matuā tigā i le amioleaga a tagata lē taupulea.

⁸ Na mau fo‘i lenei tagata lelei ma i latou i lea aso ma lea aso. Sa va‘ai ma fa‘alogo o ia i mea sa tutupu, o a latou amio lē taupulea sa fa‘atigā i lona loto.

⁹ ‘Ua silafia e le Ali‘i le mea e lavea‘iina mai ai ē e amio Atua nai le tofotofoga, ‘ae tāofi i ē e amiolētonu se‘ia o‘o i le aso fa‘amasino e fa‘asalaina ai;

¹⁰ ‘ae maise lava i latou o ē e mulimuli i mana‘o leaga o latou tino, ma le manatu fa‘atauva‘a i le pule. ‘Ua lototetele ma fa‘amaualuluga nei a‘oa‘o pepelo, ma ‘ua lē fa‘aaloalo i le mamalu o ē o i lugā.

¹¹ ‘Ae peita‘i, e o‘o lava i agelu o ē e sili lo latou malosi ma le mana i lo nei a‘oa‘o pepelo, latou te le‘i molia i latou i ni ‘upuleaga i luma o le Ali‘i.

¹² A o i latou nei, e pei o meaola, na faia ‘ina ‘ia pu‘ea ma fasimatea, latou te fāifāi i mea latou te lē iloa. E fa‘aumatia i latou e pei o manu fe‘ai;

¹³ e maua e i latou le taui o le amiolētonu. E fiafia i latou i le pisapisaō i le ao. E mamā ma ta‘uvalea i latou a o fa‘atasi atu i latou ia ‘outou faiga‘ai, e fiafia i latou i o latou lava ala leaga.

¹⁴ Latou te lē fia va‘ai i se isi lava mea na‘o fafine amioleaga, ‘ua lē mālōlō o latou mata mai le agasala. Latou te maileia tagata vāivāi. ‘Ua a‘oa‘oina o latou loto i le matape‘ape‘a. ‘Ua fa‘amalaiaina i latou e le Atua.

¹⁵ ‘Ua tu‘ua e i latou le ala sa‘o ‘ae ō atu i ala sesē, ‘ua mulimuli atu i ala o Palaamo, le atali‘i o Peoro, o lē na mana‘o i tupe na maua e ia i le faia o mea sesē,

¹⁶ ma ‘ua a‘oa‘iina o ia ‘ona o lana agasala, ‘ua tautala mai i le leo o le tagata le manu lē tautala, ma ‘ua vavao atu e ia le valea o le perofeta.

¹⁷ O nei tagata ‘ua pei i latou o punāvai e lē o i ai se vai, e pei fo‘i o ao ‘ua lelea i le afā, ‘ua tu‘u mo i latou le nofoaga i le pogisā o le pouliuli.

¹⁸ Auā o lo‘o tautala i latou i ‘upu fa‘asausili lē aogā, ‘ua fa‘aaogāina fo‘i e i latou mana‘o leaga o le tino e mailei ai tagata amiotonu, o ē ‘ua sosola ‘ese mai le lalolagi fa‘apaupau.

¹⁹ Na folafola atu e i latou le sa‘olotoga ‘iā te i latou, a o i latou lava ‘ua fai ma pologa a le leaga, auā a to‘ilalo le tasi i le isi, ‘ua nofo pologa o ia.

²⁰ Auā ‘āfai e sosola ‘ese tagata i le leaga o le lalolagi ‘ona o le iloa o lo tatou Ali‘i ma le Fa‘aola o Iesu Keriso, ‘ae toe fa‘alavelaveina ma fa‘ato‘ilaloina i na mea, ‘ona tele ai lea o le leaga o lo latou i‘uga i lo latou amataga.

²¹ E lelei pe ana lē iloa e i latou le ala o le amiotonu, ‘ae leaga ‘ina ‘ua latou iloa, ma toe liliu ‘ese ma lafoa‘iina le poloa‘iga pa‘ia na tu‘uina atu ‘iā te i latou.

²² A ‘ua fa‘amaonia ‘iā te i latou le moni o le ‘upu fa‘atusa, “ ‘Ua toe fo‘i le ta‘ifau i ona pua‘iga,” o lo‘o i ai fo‘i le tasi ‘upu, “O le pua‘a na fa‘atā‘eleina ‘ua toe fo‘i o ia e ta‘afili i le palapala.”