2 Peteru 1 - Samoan Contemporary New Testament

O ‘Upu Fa‘afeiloa‘i

¹ O le tusi lenei a Simona Peteru, o le ‘au‘auna ma le ‘aposetolo a Iesu Keriso, ia i latou o ē ‘ua maua le fa‘atuatua e tutusa lona lelei ma lo matou fa‘atuatua, ‘ona o le amiotonu a lo tatou Atua ma lo tatou Fa‘aola o Iesu Keriso:

² ‘Ia fa‘ateleina ‘iā te ‘outou le alofa tunoa ma le manuia, ‘ona o lo ‘outou iloa lelei o le Atua ma Iesu lo tatou Ali‘i.

O Le Vala‘au a le Atua Ma le Filifiliga

³ ‘Ua foa‘iina ‘iā te i tatou mea uma lava e o‘o ai i le ola ma le amio Atua, ‘ona o le iloa lelei o lē na vala‘auina i tatou i lona mamalu ma lona lelei silisili.

⁴ ‘Ona o lea mea na tu‘uina mai ai e ia ia i tatou le folafolaga tāua ma le silisili, ‘ina ‘ia tofusia ai ‘outou i uiga o le Atua, ‘ina ‘ua sosola ‘ese ‘outou i le amioleaga o i le lalolagi, ‘ona o le tu‘inanau.

⁵ O le mea lea ‘ia ‘outou matuā fa‘amalosi ai ‘ina ‘ia fa‘aopoopo le amiolelei i lo ‘outou fa‘atuatua, ma ‘ia fa‘aopoopo atu fo‘i le iloa i le amiolelei.

⁶ Ia fa‘aopoopo atu le amio pulea i lo ‘outou iloa, ia fa‘aopoopo atu le ‘onosa‘i i le amio pulea, ia fa‘aopoopo atu le amio Atua i le ‘onosa‘i.

⁷ Ia fa‘aopoopo atu le fealofani o le ‘au uso i le amio Atua, ia fa‘aopoopo atu fo‘i le alofa i le fealofani o le ‘au uso.

⁸ Auā a ‘outou maua ia mea ma ‘ua fa‘ateleina, ‘ona lē toe ‘avea ai lea o ‘outou ma tagata paiē, a o tagata e fua mai i le iloa lelei o lo tatou Ali‘i o Iesu Keriso.

⁹ O le tagata na te lē o maua ia mea ‘ua tauaso o ia, e lē mafai fo‘i ‘ona va‘ai. ‘Ua galo fo‘i ‘iā te ia ‘ua fa‘amāgaloina ana agasala tuai.

¹⁰ O le mea lea uso e, ia matuā taumafai e fa‘amaonia na vala‘auina ma filifilia ‘outou. ‘Āfai tou te faia ia mea, tou te lē i‘uvale lava.

¹¹ O le mea lea e tu‘uina atu ai ‘iā te ‘outou le avanoa e ulufale atu ai i le Mālō e fa‘avavau o lo tatou Ali‘i ma le Fa‘aola o Iesu Keriso.

¹² O le mea lea ‘ua ‘ou manatu ai e fa‘amanatu atu pea ‘iā te ‘outou nei mea, e ui lava ‘ina ‘ua ‘outou iloa ma ‘ua atiina a‘e ai i le ‘upu moni ‘ua ‘iā te ‘outou.

¹³ ‘Ou te manatu e tatau lava ‘iā te a‘u ‘ona ‘ou fa‘amalosi atu ‘iā te ‘outou i nei mea i aso uma ‘ou te ola ai,

¹⁴ auā ‘ua ‘ou iloa e mulimuli ane ‘ona uma lea o a‘u ma lenei tino. ‘Ua fa‘ailoa mai ‘iā te a‘u e lo tatou Ali‘i o Iesu Keriso lenā mea.

¹⁵ ‘Ou te matuā taumafai fo‘i ‘ina ‘ia ‘outou mafai ‘ona manatua pea nei mea pe a mavae lo‘u oti.

O Molimau Va‘aia o le Mamalu o Keriso

¹⁶ Auā matou te le‘i fa‘alagolago i tala fatu e fa‘ailoa atu ai ‘iā te ‘outou le afio mai ma le mana o lo tatou Ali‘i o Iesu Keriso. Na va‘aia e o matou mata lona silisili ‘ese.

¹⁷ Na fa‘amamaluina ma vi‘ia o ia e le Atua le Tamā, ‘ina ‘ua tulei mai le si‘ufofoga ‘iā te ia mai lē e ona le mamalu silisili ‘ese, ‘ua fa‘apea mai, “O lo‘u atali‘i pele lenā, ‘ou te fiafia lava ‘iā te ia.”

¹⁸ Na matou fa‘alogo lava i lenā si‘ufofoga mai le lagi, a o matou fa‘atasi ma ia i le mauga pa‘ia.

¹⁹ O le mea lea, ‘ua mausalī lo matou talitonu i ‘upu a perofeta. O le a lelei ai ‘outou pe ‘āfai tou te tausia lenā ‘upu. E pei lava o se molī o lo‘o susulu atu i le pogisā se‘ia o‘o i le tafa mai o ata, se‘ia ali a‘e fo‘i le fetū ao i o ‘outou loto.

²⁰ ‘Ae peita‘i, ia muamua i mea uma ‘ona iloa e ‘outou e lē mafai e se isi ‘iā te ia lava ‘ona fa‘amatala valo‘aga o i le Tusi;

²¹ auā e le‘i faia se valo‘aga ‘ona ‘ua mana‘o i ai le tagata; ‘ae peita‘i na tautala tagata pa‘ia o le Atua ‘ina ‘ua osofia i latou e le Agaga Pa‘ia.