Zekaria 5 - Bhaibhiri Idzva rechiShona rine Dhuterokanonika

Chiratidzo chaakaona chebhuku rokumononora

¹ Ndakasimudza musoro ndikatarisa wonei bhuku rokumononora richibhururuka.

² Akabva anditi, “Ko chii chauri kuona?” Ndakadavira ndichiti, “Ndiri kuona bhuku rekumononora riri kubhururuka. Urefu hwaro hunoita mamita mapfumbamwe uye upamhi hwaro huchiita mamita mana ane hafu.”

³ Akazoti kwandiri, “Irworwu urwu ndirwo rushambwa rwawira pamusoro penyika yose nokuti kubvira iye zvino anenge angoba chete anosungirwa kuparadzwa zvichienderanawo norushambwa irworwo uye anopika nhema achaparadzwa zvechienderana narwo.

⁴ Ndini charwutumidzira, ndizvo zviri kutaura TENZI wehondo nehondo rugopinda mumba membavha nomumba memunhu anopika zvenhema nezita rangu rwuchagara mumba make rwuiroromese mapango zvose namatombo.”

Kuonesa chiratidzo chomukadzi aiva mubhaghidhi

⁵ Mutumwa aitaura neni uya akauyapo akati kwandiri, “Simudza musoro uone kuti zvii zvavakuuya.”

⁶ Ini ndakati, “Chiiko?” Akati, “Ibhaghidhi riri kuuya.” Akatiwo, “Irori ndiho uipi hwavo munyika iyoyi yose zvayo.”

⁷ Ndiye onei chivharo chomutobvu chakuduburwa. Izvozvo makanga muina mukadzi agere mubhaghidhi imomo.

⁸ Mutumwa uya ndokuti, “Uhu huipi uhu.” Akabva amukanda pasi imomo mubhaghidhi makare akaroverera pasi chivharo chacho chomutobvu chairema pamuromo waro.

⁹ Ndakasimudza musoro ndikaona havo vakadzi vaviri vachiuya mberi. Mhepo yakanga iri mumapapiro mavo. Vaiva vane mapapiro akaita semapapiro eshuramurove. Vakasumudzira bhaghidhi iroro pakati penyika nedenga.

¹⁰ Ndakabvunza mutumwa aitaura neni uya kuti, “Ko ivava vava kuendesa bhaghidhi iroro kupi?”

¹¹ Akanditi, “Kunyika yeShinari kundorivakira imba yokunamatira. Rikange ravakirwa saizvozvo richagadzikirwa pachigadzikiro paro.”