Ʋatoŋgi 8 - Bhaibhiri Idzva rechiShona rine Dhuterokanonika

Kugumbukira Gidheoni kwevokwaEfuraimu

¹ Varume vokwaEfuraimu vakamubvunza kuti, “Ndochii ichochi chawatiitira ichi? Kuenda here chokwadi kundorwa navaMidhiani usina zvako kana kutidaidzawo?” Vakamupopotera vakagumbuka kwazvo.

² Iye akavati, “Chiiko zvino chandaita chingaenzaniswe nezvamakaita imi? Ko magirepisi amanofuhwa imi vokwaEfuraimu haasiri mazhinji here pane atinokohwa isu vokwaAbhiezeri?

³ Mwari akaisa mumaoko enyu vatungamiriri vevaMidhiani vanaOrebhu naZeebhu. Zvino chiiwo chandakaita chingabangoenzaniswa nezvamakaita, imi?” Ipapo kumugumbukira kwavakanga vakaita kwakabva kwapera paakavataurira izvozvi.

Hondo dzakarwiwa naGidheoni kumhiri kwaJorodhani

⁴ Kunyange Gidheoni navarume mazana matatu vaya, vakanga vaneta, vakasvika kuna Jorodhani vakayambuka vachingovadzingirira chete.

⁵ Paakasvika kuSukoti akakumbira vanhu veko achiti, “Ndapota ndipireiwo vanhu vandinavo zvingwa nokuti vave nenzara. Ndiri pakuronda Zebha naZarimuna, madzimambo evaMidhiani.”

⁶ Vakuru vakuru vomuSukoti vakati, “Ko ivo vana Zebha naZarimuna vacho wati wavabata here zvaunoti tipe hondo yako iyi chokudya?”

⁷ Gidheoni ndokuti, “Zvakanaka, kana Tenzi angoisa Zebha naZarimuna mumaoko angu, ndichakupurai neminzwa yomurenje norukato.”

⁸ Akabva ipapo akaenda kuPenueri akavakumbira zvimwechetezvo. Varume vokuPenueri vakamupindurawo zvimwechetezvo zvakapindurwa navarume vokuSukoti.

⁹ Akataurira varume vomuPenueri achiti, “Kana ndadzoka zvakanaka, ndichakoromora shongwe iyi.”

Kukundwa kwaZebha naZarimuna

¹⁰ Izvozvo Zebha naZarimuna vakanga vava muKarikori navarwi vavo vehondo yavarume vainge zviuru gumi nezvishanu. Ndovose vakanga vasara pavarwi vehondo vokumabvazuva nokuti kwakanga kwafa varume varwi vehondo zana namakumi maviri ezviuru.

¹¹ Gidheoni akakwira nenzira yavanogara mumatendhe kumabvazuva kweNobha neJogibheha, akabva afuta hondo iyoyo oirwisa nokuti hondo iyoyo yakanga yavarayirwa.

¹² Zebha naZarimuna vakagoti gumbo ndibereke. Iye akadzingirirana navo ndokubata madzimambo maviri evaMidhiani vanaZebha naZarimuna. Akaitisa hondo yose yevaMidhiani chimwandamwanda.

Kutsividza kwaGidheoni

¹³ Gidheoni mwana waJoashi akadzoka kundorwa kumakata okuHeresi.

¹⁴ Akabata rimwe jaya rokuSukoti ndokuribvunzisisa. Rakamunyorera mazita amachinda neavakuru vakuru vomuSukoti anosvika makumi manomwe namanomwe avarume.

¹⁵ Gidheoni akasvika kuvarume vaya vomuSukoti akati, “Chionaika kuti Zebha naZarimuna vamakambondidadira muchiti, ‘Ko iye Zebha naZarimuna wacho wati wavabata here zvaunoti tipe varwi vako vafa nenzara chokudya?’ ”

¹⁶ Akabata vakuru vakuru veguta reSukoti akavarova norukato neminzwa achiitira kuti vanhu vemuSukoti vawane chidzidzo pavari.

¹⁷ Akandoputsa shongwe yePenueri ndokuuraya varume vomuguta iroro.

¹⁸ Gidheoni akabvunza Zebha naZarimuna kuti, “Varume vamakauraya kuTabhori vakanga vakaita sei?” Ivo vakati, “Vakanga vakaita semi, vose vachinge vanakomana vamambo chaivo.”

¹⁹ Akati, “Vakoma navanun'una vangu, vomumba chaivo. Ndinopika naTenzi mupenyu kuti dai makavarega vari vapenyu handaikuurayai.”

²⁰ Ipapo akati kuna Jeteri dangwe rake, “Simuka uvauraye.” Asi mukomana uyu haana kuvaburitsira bakatwa rake muhara, aitya nokuti akanga achiri muduku.

²¹ Zebha naZarimuna vakati, “Simukai mutiuraye iyemi pachenyu nokuti ndimi mabve zano, mune simba.” Gidheoni akasimuka ndokuuraya Zebha naZarimuna, ndokubva atora nyembe dzaiva muhuro mengamera dzavo.

²² Varume veIsiraeri vakataurira Gidheoni vachiti, “Zvamakatinunura mumaoko avaMidhiani dai mukachiva zvenyu mutongi wedu iyemi muchiteverwa nomwanakomana wenyu kwozouya muzukuru wenyu mukomana.”

²³ Asi Gidheoni akavati, “Ini handisi kuzova mutongi wenyu, mwanakomana wangu haasi kuzovawo mutongi wenyu, asi Tenzi ndiye achava mutongi wenyu.”

²⁴ Gidheoni akatiwo kwavari, “Chinhu chimwechete chandinokukumbirai ndechokuti mumwe nomumwe wenyu ngaandipe mhete dzomunzeve dziri muzvinhu zvaakapamba.” Akadaro nokuti vaiva nemhete dzendarama dzomunzeve, zvavakanga vari vechiIshimaeri.

²⁵ Ivo vakati, “Zvokukupai, tinokupai zvedu.” Vakawaridza jira murume woga woga ndokubva atora mhete muzvinhu zvaakapamba, achikandapo.

²⁶ Uremo hwemhete dzendarama dzaakanga avakumbira dziya hwakaita chiuru chimwechete chamashekeri endarama namazana manomwe awo, tisingaverengei zvedu nyembe namakoza nehanzu dzeruvara rwehute dzaipfekwa namadzimambo evaMidhiani uye ngetani dzaiva mumitsipa yengamera dzavo.

²⁷ Gidheoni akagadzira nazvo hanzu yeefodhi akandoiisa muguta rake reOfura. VaIsiraeri vose vakaita unzenza hwokuinamata ikoko ikabva yava chinhu chakateya Gidheoni nemhuri yake.

²⁸ Naizvozvo vaMidhiani vakakurirwa navaIsiraeri, havana kana kuzombosimudza musoro. Panguva yaGidheoni, nyika yakava norunyararo kwamakumi mana amakore.

Rufu rwaGidheoni nokupandukira Mwari kwavaIsiraeri

²⁹ Jerubhaari mwanakomana waJoashi akandogara kumusha kwake.

³⁰ Zvino Gidheoni uyu aiva navana vakomana makumi manomwe vake vokubereka nokuti aiva navakadzi vazhinji.

³¹ Murongo wake aigara kuShikemu akamuberekerawo mwana mukomana. Iye akamutumidza zita rokuti Abhimereki.

³² Gidheoni mwanakomana waJoashi akazofawo anyatsokwegura, akavigwa muguva rababa vake kuOfura ravaAbhiezeri.

³³ Zvakazoitika kuti Gidheoni paakangofa vaIsiraeri vakapanduka vakaita unzenza hwokunamata vanaBhaari. Vakazvigadzirira Bhaaribheriti kuti ave mwari wavo.

³⁴ VaIsiraeri vakakanganwa Tenzi, Mwari wavo akanga avanunura mumaoko avavengi vavo vakanga vakavakomberedza.

³⁵ Havana zvakare kana kumboita hanya nevemhuri yaJerubhaari, (Gidheoni uya uya) maererano nezvakanaka zvose zvaakaitira vaIsiraeri.