Ruka 22 - Bhaibhiri Idzva rechiShona rine Dhuterokanonika

VI: DAMBUDZIKO NORUFU RWAJESU Bangano rokuda kuuraya Jesu

¹ Zvino zuva guru rechingwa chisina mbiriso rinonzi Pasika rakanga ravakuda kusvika.

² Vapristi vakuru nenyanzvi dzomutemo vakanga vachitsvaka kuti vangamuuraye sei nokuti vaitya vanhu.

Judhasi anobvuma kutengesa Jesu

³ Zvino Satani akapinda muna Judhasi ainzi Isikarioti, aiva mumwe wavane gumi navaviri.

⁴ Akaenda akandorangana navavakuru namapurisa kuti angamuturire sei kwavari.

⁵ Vakafara vakatsidza kumupa mari.

⁶ Iye akabvuma, akatsvaka nguva yakanaka yokumuturira kwavari nayo pasina vanhu vakawanda.

Kugadzirira chirariro

⁷ Zuva guru reChingwa Chisina mbiriso rakazosvika rayiitwa hwayana yePasika chibayiro.

⁸ Ipapo Jesu akatuma Pita naJohani achivati, “Endai mundotigadzirira Pasika kuti tigoidya.”

⁹ Vakati kwaari, “Munoda kuti tindoigadzirira kupi.”

¹⁰ Iye akati kwavari, “Pamunongoti pindei muguta muchasanganidzana nomurume akatakura chirongo chemvura. Muteverei muimba yaanondopinda

¹¹ mugotaurira muridzi wemba iyoyo kuti, ‘Mudzidzisi ari kuti kwamuri, ko imba yavayeni mandichadyira Pasika navadzidzi vangu iripi?’

¹² Iye achakuratidzai imba huru yapamusoro makanyatsorongedzwa. Imomo ndomomotigadzirira.”

¹³ Vakaenda vakasvikowana sezvaakanga avataurira, ndokugadzirira Pasika.

Chirariro chaJesu navadzidzi vake

¹⁴ Nguva yacho payakasvika, akagara pakudya pamwechete navapositori.

¹⁵ Akati kwavari, “Ndaidisisa kwazvo kudya chirariro ichi nemi ndisati ndatambudzika

¹⁶ nokuti, ndinokuudzai kuti handichazochidya kusvikira chazadziswa muumambo hwaMwari.”

¹⁷ Akatora mukombe akatenda ndokuti, “Torai mukombe uyu mugoverane pakati penyu

¹⁸ nokuti ndinokuudzai kuti kubvira zvino handizonwazve muchero womugirepisi kusvikira umambo hwaMwari hwasvika.”

¹⁹ Akatorawo chingwa akatenda ndokuchimedura akachipa kwavari achiti, “Uyu muviri wangu unopirirwemi. Itai izvi mugochindiyeuka nazvo.”

²⁰ Akaita zvimwechetezvo nomukombe mushure mechirariro achiti, “Mukombe uyu unoteurirwemi, chitenderano chitsva muropa rangu.

²¹ “Asi chinzwai, achandipandukira ari kuseva neni mundiro.

²² Mwanakomana womunhu anoenda zvake nenzira yaakatemerwa. Asi zvichamuwana munhu uyo anomutengesa.”

²³ Vakatanga kubvunzana kuti, “Ndiani wavo akanga achazoita izvozvo.”

Ndiani mukuru pakati pavadzidzi vaJesu?

²⁴ Pakamuka nharo pakati pavadzidzi dzokuti ndiani anofanira kutorwa somukuru wavo vose.

²⁵ Iye akati kwavari, “Madzimambo evechirudzi vanoita zvechisimba kuvanhu vavo. Uye vakuru vakuru vavo vanozviti vanasamwoyochena.

²⁶ Asi kwamuri hazvifaniri kudaro, mukuru pakati penyu ngaave iye somudiki. Uye mutungamiri aite somushandiri.

²⁷ Nokuti ndiani mukuru, agere pakudya here kana kuti muperekeri? Handiti ndouyo agere pakudya? Asika ndiri pakati penyu somuperekeri.

²⁸ “Imi ndimi makaramba muineni mumatambudziko angu,

²⁹ sokundipa kwakaita Baba umambo ini ndinohupawo kwomuri

³⁰ kuti muzodya nokumwa patafura neni muumambo hwangu makagara pazvigaro zvokutonga muchitonga madzinza gumi namaviri eIsiraeri.

Pita akaramba Jesu

³¹ “Simoni, Simoni, tarisa uone Satani akumbira kuti akuzungurei sekoroni.

³² Asi ndakunamatira kuti chitendero chako chirege kukundika. Kana uchinge wazotendeukazve simbisa hama dzako.”

³³ Pita akati, “Tenzi ndakagadzirira kuenda nemi kuJeri kana kurufu chaiko.”

³⁴ Iye akati kwaari, “Ndinokuudza Pita kuti, iye nhasi uno uchandiramba katatu jongwe risati rakukuridza.”

Nguva yakaomarara

³⁵ Jesu akati kwavari, “Pandakakutumai musina chikwama kana tsapo kana shangu, pane chamakashaiwa here?” Vakati, “Hapana.”

³⁶ Iye akati kwavari, “Asi parizvino, uyo ane chikwama ngaachitore; ndizvo zvimwechetezvo neane tsapo. Uyowo asina bakatwa ngaatengese bhachi rake atenge bakatwa.

³⁷ Nokuti ndinokutaurirai kuti Magwaro Matsvene aya anofanira kuzadziswa mandiri anoti, ‘Akaverengerwa mukati mavatadzi nokuti zvakanyorwa nezvangu zvinofanira kuzadziswa.’ ”

³⁸ Ivo vakati, “Tarisai Tenzi, haano mapakatwa maviri.” Iye akavati, “Zvakwana.”

Jesu anonamata pagomo remiorivhi

³⁹ Akabuda akaenda, samaitiro ake kugomo reMiorivhi. Vadzidzi vake vakamutevera.

⁴⁰ Paakasvika panzvimbo iyoyo akati kwavari, “Namatai kuti murege kupinda mukuedzwa.”

⁴¹ Iye akasudurukana navo chinhambwe chingasvike dombo kana rapotserwa. Akapfugama akanamata achiti,

⁴² “Baba kana muchida henyu bvisai mukombe wenhamo uyu kwandiri asi kusave kuda kwangu asi kuda kwenyu ngakuitwe.” [

⁴³ Mutumwa akabva kudenga akazviratidza kwaari achimusimbaradza.

⁴⁴ Jesu achirwadziwa zvakanyanya kudaro, akatonyanya kunamata. Dikita rake rakaita samadonhwe makuru eropa achidonhera pasi.]

⁴⁵ Paakasimuka paainamata, akauya kuvadzidzi akavawana vakakotsira nemhaka yokusuwa.

⁴⁶ Akati kwavari, “Sei muchikotsira, mukai munamate kuti murege kupinda mukuedzwa.”

Kusungwa kwaJesu

⁴⁷ Paakanga achiri kutaura kudaro, kwakauya chikwata chavanhu nomumwe murume ainzi Judhasi mumwe wavane gumi navaviri achivatungamirira. Akaswedera kuna Jesu akamutsvoda.

⁴⁸ Asi Jesu akati kwaari, “Judhasi unotengesa Mwanakomana womunhu nokumutsvoda here?”

⁴⁹ Vakanga vakamupoteredza pavakaona zvakanga zvavakuda kuitika vakati, “Tenzi totema namapakatwa here?”

⁵⁰ Mumwe wavo akabva atema muranda womupristi mukuru achimudimbura nzeve yake yokurudyi.

⁵¹ Jesu akati, “Imi siyanayi nazvo izvi” akabata nzeve yake ndokumurapa.

⁵² Jesu akataura kuvapristi vakuru namapurisa apaTemberi navakuru vakuru vakanga vauya kuzomusunga achiti, “Mauya namapakatwa netsvimbo sokunge muri kuvinga gororo.

⁵³ Asi pandaiva nemi zuva nezuva muTemberi imi hamuna kundisunga. Ino inguva yenyu nenguva yamasimba erima.”

Pita anoramba Jesu

⁵⁴ Vakabata Jesu vakaenda naye. Vakaenda naye kuimba yomupristi mukuru.

⁵⁵ Pita akatevera ari chinhambwe. Pavakakuhwidza moto pakati penhandare vakagara pasi pamwechete, Pita akagarawo pakati pavo.

⁵⁶ Mumwe musikana webasa paakamuona akagara pane chiedza akamunan'anidza akati, “Murume uyu anga ainayewo uyu.”

⁵⁷ Asi Pita akaramba achiti, “Mukadzi iwe, ini handimuzivi.”

⁵⁸ Mushure mechinguvana mumwewo munhu akamuona akati kwaari, “Newewo uri mumwe wavo iwe.” Asi Pita akati, “Murume iwe handisini.”

⁵⁹ Mumashure mechinhambo chinoita awa imwechete, mumwezve akasimbisisa achiti, “Chokwadi chokwadi munhu uyu anga ainaye nokuti muGarirea.”

⁶⁰ Pita akati, “Murume iwe, handizivi zvauri kutaura.” Pakare pakarepo achiri kutaura kudaro jongwe ndokubva rakukuridza.

⁶¹ Tenzi akacheuka akatarisa Pita. Pita akayeuka shoko raTenzi zvaakanga ati kwaari, “Jongwe risati rakukuridza nhasi uno uchandiramba rutatu.”

⁶² Akabuda akahwihwidza kuchema zvinosiririsa.

Jesu anonyombwa nokurohwa

⁶³ Zvino varume vakanga vakachengetedza Jesu vakamunyomba vachimurova.

⁶⁴ Vakamusunga kumeso vachimubvunza vachiti, “Porofitaka. Ndiani akurova.”

⁶⁵ Vakataura mamwe mazwi mazhinji vachimushonha.

Jesu pamberi pedare ravaJudha

⁶⁶ Kwaedza, gungano ravakuru–vakuru vavanhu rakaungana, vapristi vakuru nenyanzvi dzomutemo vakaenda naye kudare ravo vakati,

⁶⁷ “Kana uriwe Kristu tiudze.” Asi iye akati kwavari, “Kana ndikakuudzai zvangu hamutendi.

⁶⁸ Uye kana ndikakubvunzai hamundipinduri

⁶⁹ asi kubvira zvino Mwanakomana womunhu achagara ari kurudyi rwaMwari Samasimbaose.”

⁷⁰ Vose vakati, “Saka uri Mwana waMwari nhai?” Iye akati kwavari, “Inga imi matozvireva wani. Kuti ndini iye”

⁷¹ Ivo vakati, “Tichadirei humwe humbowo. Tazvinzwira iyesu achitaura nomuromo wake.”