Ruka 19 - Bhaibhiri Idzva rechiShona rine Dhuterokanonika

Jesu nomuteresi Zakeo

¹ Akapinda muJeriko achipfuura nomo.

² Maiva nomumwe murume ainzi Zakeo. Aiva mukuru mukuru wavateresi uye ari mupfumi.

³ Aida kuona zvakaita Jesu asi haana kukwanisa nokuda kwegurumwandira ravanhu nokuti iye akanga akapfupika.

⁴ Ipapo akafanomhanyira mberi ndokukwira mumuonde kuti amuone nokuti akanga achizopfuura nepo.

⁵ Jesu paakasvika panzvimbo iyoyo, akatarisa mudenga akamuti, “Zakeo kurumidza kuburuka nokuti ndinofanira kundogara kumba kwako nhasi.”

⁶ Saizvozvo akakurumidza kuburuka akamugamuchira norufaro.

⁷ Vanhu pavakazviona, vose vakanyunyuta vachiti aenda kundogara mumba momutadzi.

⁸ Zakeo akamirawo achiti kuna Tenzi, “Chionai Tenzi ini ndichapa kuvarombo hafu yezvinhu zvangu. Kana ndakabiridzira munhu chinhu ndichamudzorera kakapetwa kana.”

⁹ Jesu akati kwaari, “Nhasi uno ruponeso rwauya kumba ino nokuti murume uyu mwanakomanawo waAbhurahamu

¹⁰ nokuti Mwanakomana womunhu akauya kuzotsvaka nokuponesa chakarasika.”

Muenzaniso wepondo

¹¹ Pavakanga vakateerera zvinhu izvi, akaenderera mberi achivapa muenzaniso nokuti akanga ava pedyo neJerusaremu uye nokuti vakanga vachifunga kuti umambo hwaMwari hwakanga hwava kuda kutoonekwa.

¹² Naizvozvo akati, “Mumwe murume wokumbahuru akaenda kune imwe nyika iri kure kundopiwa umambo achizodzoka.

¹³ Akashevedza varanda vake gumi akavapa gumi repondo, achiti kwavari, ‘Itai mhindu nayo kusvikira ndauya.’

¹⁴ Asi vanhu vake vaimuvenga. Vakatumira nhume dzokumutevera dzichiti, ‘Hatidi kuti munhu uyu atitonge.’

¹⁵ Paakadzoka apiwa umambo huya akati varanda vake vaakanga apa mari iya vadaidzwe kwaari kuti azive kuti mumwe nomumwe akanga awanei nemhindu.

¹⁶ Wokutanga akauya kwaari achiti, ‘Changamire pondo yenyu yakabereka dzimwe pondo gumi pamusoro.’

¹⁷ Iye akati kwaari, ‘Hauchionaka muranda wakanaka! Pamusana pokuti wakatendeka muzvinhu zvidikidiki kudai uchatonga maguta gumi.’

¹⁸ Wechipiri akauyawo achiti, ‘Tenzi pondo yenyu yakabereka pondo shanu.’

¹⁹ Iye akati kwaari, ‘Iwewo uchatonga maguta mashanu.’

²⁰ Mumwe akauya achiti, ‘Tenzi pondo yenyu iyi ini ndakaipfundira muhengechepfu,

²¹ nokuti ndaikutyai nokuti muri munhu akaomarara. Munonhonga chamusina kuisa pasi, muchikohwa chamusina kudyara.’

²² Akati kwaari, ‘Ndinokupa mhosva nezvabva mumuromo mako, iwe muranda akaipa. Heya waitoziva zvako kuti ndiri munhu akaomarara anonhonga chaasina kuisa pasi nokukohwa paasina kudyara,

²³ ko zvino wakaregererei kuisa mari yangu mubhangi. Pandainge ndauya ndaizoitora yabereka.’

²⁴ Akati kuna vakanga vakamira pedyo, ‘Mutorerei pondo iyoyo muipe kune ane gumi repondo.’

²⁵ Vanhu vakati kwaari, ‘Tenzi, inga ane gumi repondo wani.’

²⁶ Ndinokutaurirai kuti munhu wose anazvo achawedzerwa zvimwe asi uyo asina, kunyange chaanenge anacho achachitorerwa.

²⁷ “Asi zvemhandu dzangu dziya dzaisada kuti ndidzitonge dziunzei pano mudziuraye ndakatarisa.”

V: KUDZIDZISA KWAJESU MUJERUSAREMU Kupembererwa kwakaitwa Jesu achipinda muJerusaremu

²⁸ Paakapedza kutaura izvi, akatungamira vachikwira kuJerusaremu.

²⁹ Paakanga ava kusvika kuBhetifage nokuBhetania kugomo rinonzi Orivheti, akatuma vadzidzi vake vaviri achiti,

³⁰ “Endai mumusha wakatarisana nesu wamunoti kana mavakupindamo muchaona chigondora chedhongi chakasungirirwa chisati chambotaswa nomunhu. Chisinungurei muuye nacho kuno.

³¹ Kana munhu akakubvunzai kuti, ‘Muri kuchisunungurirei?’ Munomuti, ‘Tenzi anochida.’ ”

³² Saizvozvo vaya vakatumwa vakaenda vakawana zvakangoita sokuvataurira kwaakanga aita.

³³ Pavakanga vavakuchisunungura varidzi vacho vakati kwavari, “Muri kuchisunungurirei?”

³⁴ Ivo vakati, “Tenzi vari kuchida.”

³⁵ Vakauya nacho kuna Jesu. Vakawaridza hanzu dzavo pachigondora chiya. Vakakwidza Jesu pachiri.

³⁶ Paaifamba kudaro vakawaridza hanzu dzavo munzira.

³⁷ Paakanga ava kuda kusvika kumateru eGomo reMiorivhi mhomho yose yavadzidzi vake yakatanga kupembera ichirumbidza Mwari ichidaidzira, ichirumbidza Mwari nokuda kwamabasa makuru avakanga vaona

³⁸ vachiti, “Ngaarumbidzwe Mambo anouya muzita raTenzi. Rugare ngaruve kudenga nembiri ive kumusorosoro.”

³⁹ Vamwe vaFarisei vaiva mumhomho iyoyo vakati kwaari, “Mudzidzisi tsiurai vadzidzi venyu.”

⁴⁰ Iye akapindura achiti, “Ndinokuudzai kuti kana ava vakanyarara, matombo chaiwo achadanidzira.”

Jesu anochema Jerusaremu

⁴¹ Paakanga ava kuda kusvika, akatarisa guta akarichema,

⁴² achiti, “Dai wanga uchiziva nhai zvinhu zvinounza rugare asi zvino zvakavanzwa kwauri.

⁴³ Mazuva achakuvinga zvako, mhandu dzako padzichaita mazidhunduru muberere rako kukutenderedza vachikukomberedza kumativi ose.

⁴⁴ Vachakupwatitsira pasi, iwe navana vako vari mauri. Havachazosiya rimwe dombo riri pamusoro perimwe dombo mauri nokuti hauna kuziva nguva yokushanyirwa kwako.”

Jesu anodzinga vaiita Temberi yaMwari musika

⁴⁵ Jesu akapinda muTemberi akatangisa kudzinga vaitengesa

⁴⁶ achiti kwavari, “Zvakanyorwa zvichinzi, ‘Imba yangu ichanzi imba yokunamatira asi imi makaiita bako ramakororo.’ ”

⁴⁷ Aidzidzisa mazuva ose muTemberi. Vapristi vakuru nenyanzvi dzomutemo navakuru vakuru vavanhu vaitsvaka zvokumuparadza

⁴⁸ asi havana kuwana chavakagona kuita, nokuti vanhu vose vanga vangoti kwati kwati kumashoko ake.