Mupiro 9 - Bhaibhiri Idzva rechiShona rine Dhuterokanonika

Aroni anopira zvibayiro kuna Mwari

¹ Pazuva rorusere Mosesi akakokera Aroni navanakomana vake, navakuru vakuru vavaIsiraeri kuti vauye,

² akati kuna Aroni, “Zvitorere chimhuru chomukono yomupiro wokupfupira zvitadzo, nehondohwe yomupiro wokupisa, dzose dziri mbiri ngadzive dzisina chinoshoreka padziri, udzipire kuna Tenzi,

³ utaurire vaIsiraeri kuti, ‘Torai gotora romupiro wokupfupira zvitadzo nemhuru, nehwayana dzose dziri mbiri dzive dzine gore rimwechete, dzisina chinoshoreka padziri dzomupiro wokupisa.’

⁴ Mutorewo nzombe nehondohwe zvomupiro wokuwadzana, zvokubayira kuna Tenzi pamwechete nomupiro wembesanwa wakasanganiswa nemafuta, nokuti nhasi uno Mwari achazviratidza kwamuri.”

⁵ VaIsiraeri vakaunza zvose zvakarayirwa naMosesi kumusuo wetendhe rokusanganira, vose vakauya vakasvikomira pana Tenzi.

⁶ Mosesi akati, “Izvozvi ndizvo zvakanzi naTenzi muite. Kupenya kwokuvapo kwaTenzi kuchazviratidza kwamuri.”

⁷ Mosesi akati kuna Aroni, “Chienda kuatari upire mupiro wako wokupfupira zvitadzo, nomupiro wako wokupisa upfupire zvitadzo zvako, nevemba yako, upirire vanhu mupiro, sokureva kwaTenzi.”

⁸ Aroni akaenda kuatari akandouraya chimhuru chomupiro wokupfupira zvitadzo zvake.

⁹ Vanakomana vaAroni vakamuigira ropa rayo. Akanyika munwe wake muropa iroro akarizora pane zvinenge nyanga zviri paatari, akateurira ropa iroro nechapasi peatari.

¹⁰ Mafuta ayo neitsvo nechinyama chapachiropa zvomupiro wokupfupira zvitadzo akazvipisa paatari sokuudzwa kwakaitwa Mosesi naTenzi.

¹¹ Nyama nedehwe rayo akandozvipisa nomoto kunze kwematendhe.

¹² Aroni akauraya chibayiro chomupiro wokupisa. Vanakomana vake vakamuigira ropa racho akarisasa pamativi ose eatari.

¹³ Vakamugamuchidza chibayiro chomupiro wokupisa, chidimbu nechidimbu chacho, nomusoro wacho akazvipisa paatari.

¹⁴ Akasuka zvomukati namazondo akazvipisa paatari pamwechete nomupiro wokupisa.

¹⁵ Akauya nomupiro wavanhu. Akatora mbudzi iyoyo yavanhu yezvitadzo, akaiuraya achiipira kupfupira zvitadzo, seyokutanga iya.

¹⁶ Akaunzazve chibayiro chomupiro wokupisa akachipira maererano nezviri pamurao.

¹⁷ Akauya noupfu hwomupiro wembesanwa, akanokora chanza chizere chahwo, akapisa paatari, kunyange zvazvo kwainge kwapirwa mupiro wokupisa wamangwanani.

¹⁸ Akauraya nzombe iya nehondohwe iya, zvibayiro zvemipiro yokuwadzana yavanhu, vanakomana vaAroni vakamuvigira ropa, akarisasa pamativi ose eatari.

¹⁹ Mafuta enzombe neehondohwe pamwechete nomuswe wayo wakakora namafuta akaputira zvomukati, netsvo, nechinyama chepachiropa

²⁰ akaisawo mafuta pamusoro pezvityu, akapisa paatari.

²¹ Asi zvityu nechidya chokurudyi akazvisimudzira somupiro kuna Tenzi sezvakanga zvarehwa naMosesi.

²² Aroni akasimudzira maoko ake kuvanhu, akavapa chikomborero, akaburuka paaipira mupiro wokupfupira zvitadzo, nomupiro wokupisa nomupiro wokuwadzana.

²³ Mosesi naAroni vakapinda mutendhe rokusanganira, pavakabudamo vakapa vanhu chikomborero, kupenya kwokuvapo kwaTenzi kukaonekwa navanhu vose.

²⁴ Pakarepo moto wakabva kuna Tenzi ukaroromesa mupiro wokupisa pamwechete namafuta aiva paatari. Vanhu vose pavakazviona vakadaidzira vakati pasi zvambarara.