Mupiro 8 - Bhaibhiri Idzva rechiShona rine Dhuterokanonika

Kugadzwa kwaAroni navanakomana vake

¹ Tenzi akataurira Mosesi achiti,

² “Tora Aroni navanakomana vake pamwechete nehanzu namafuta okuzodza nehandira yomupiro wokupfupira zvitadzo nehondohwe mbiri netswanda ine chingwa chisina mbiriso,

³ uunganidze gungano rose ravanhu kumusuo wetendhe rokusanganira.”

⁴ Mosesi akaita zvaakaudzwa naMwari, gungano rose rikaungana kumusuo wetendhe rokusanganira.

⁵ Mosesi akataurira gungano rose achiti, “Zvandava kuita izvi, ndozvakanzi naTenzi zviitwe.”

⁶ Mosesi akaunza Aroni navanakomana vake, akavashambidza nemvura.

⁷ Akamupfekedza hanzu refu inoda kusvika mumabvi, akamusunga mudya muchiuno. Akamupfekedzawo gemenzi, nehanzu yeefodhi akamusunga mudya wakarukwa zvakanaka kwazvo weefodhi, achimusunga muchiuno nawo.

⁸ Akamupfekedza nyembe dzapadundundu, akaisa machiri Urimu neTumimu.

⁹ Akamupfekedza ngundu mumusoro, akaisa karata kendarama, kechiremba, kanoera pangundu iyoyo nechapahuma sokuudzwa kwakaitwa Mosesi naTenzi.

¹⁰ Mosesi akatora mafuta okuzodza ndokuzodza tendhe rinoera nezvose zvaivemo, achizvipira kuna Mwari.

¹¹ Akatora mamwe acho akasasa kanomwe paatari nemidziyo yayo yose, nedhishi rokushambira nechigadzikiro charo, achizvikomborera.

¹² Akadira mamwe mafuta okugadza pamusoro waAroni kumugadza achimuteketera kuna Mwari.

¹³ Mosesi akazounza vanakomana vaAroni akavapfekedza hanzu refu dzinoda kusvika mumabvi, akavasunga midya muchiuno, akavapfekedzawo tunguwani sokutaurirwa kwaakaitwa naTenzi.

¹⁴ Akazounza handira yomupiro wokupfupira zvitadzo. Aroni navanakomana vake vakaisa maoko avo pamusoro wehandira iyoyo yomupiro wokupfupira zvitadzo.

¹⁵ Mosesi akaiuraya, akatora ropa rayo, akanyika munwe wake muropa iroro akariisa pane zvinenge nyanga achizvitenderedza, akanatsa atari, akadururira ropa nechepasi peatari achiikumikidza kuna Mwari achiichenura.

¹⁶ Mosesi akatora mafuta ose ayo pane zvomukati nechinyama chepachiropa netsvo mbiri namafuta ari padziri, akazvipisa paatari.

¹⁷ Asi handira iyoyo nedehwe rayo, nenyama yayo, nechinzvinzvi chayo, Mosesi akandozvipisa nomoto kunze kwematendhe sokuudzwa kwaakaitwa naTenzi.

¹⁸ Akazounza hondohwe yemupiro wokupisa. Aroni navanakomana vake vakaisa maoko avo pamusoro wehondohwe iyoyo.

¹⁹ Mosesi akaiuraya, akasasa ropa rayo pamativi ose eatari.

²⁰ Mosesi akadimura-dimura hondohwe iyoyo, akapisa musoro wayo nezvidimbu izvozvo, namafuta.

²¹ Mosesi akasuka nemvura zvomukati nemazondo ayo, akapisa hondohwe iyoyo yose zvayo paatari somupiro wokupisa, unonhuhwirira zvinofadza, mupiro unoita zvokupiswa kuna Tenzi, sokuudzwa kwaakaitwa naTenzi.

²² Mosesi akaunzawo hondohwe imwe yokugadza vapristi nayo. Aroni navanakomana vake vakaisawo maoko avo pamusoro wehondohwe iyoyo.

²³ Mosesi akaiuraya akatora ropa rayo akarizora kwokupedzisira kwenzeve yokurudyi yaAroni, napachara choruoko rwake rworudyi, napachigunwe chegumbo rake rorudyi.

²⁴ Vanakomana vaAroni vakaunzwawo, Mosesi akavazora ropa kwokupedzisira kwenzeve dzavo dzokurudyi, napazvara zvamaoko avo okurudyi, nepazvigunwe zvemakumbo avo okurudyi. Mosesi akasasa ropa pamativi ose eatari.

²⁵ Akatora mafuta nemuswe, wakakora, nemafuta ose akaputira zvomukati, nechinyama chepachiropa nemafuta ari padziri, netsvo mbiri nechidya chokurudyi.

²⁶ Mutswanda yezvingwa zvisina mbiriso zvaiva pana Tenzi, akatora chingwa chimwe chisina mbiriso, nechimwe cheupfu hwakakanywa nemafuta, nechimwe chakati fatata akazviisa pamusoro pemanda napamusoro pechidya chokurudyi.

²⁷ Mosesi akapa Aroni navanakomana vake izvozvo zvose. Vakazvibata mumaoko avo, vakazvisimudza vachizviita mupiro unosimudzirwa kuna Tenzi.

²⁸ Mosesi akazvitora mumaoko avo akazvipisa paatari pamwechete nomupiro wokupisa somupiro wokugadza mupristi, unonhuhwirira zvinofadza, iwoyu mupiro unoita zvokupiswa kuna Tenzi.

²⁹ Mosesi akatora chityu akachisimudza achiita mupiro unosimudzirwa kuna Tenzi. Ichochi ndochaiva chityu chehondohwe chakapiwa Mosesi pamugove wehondohwe yokugadza, sokuudzwa kwaakaitwa naTenzi.

³⁰ Mosesi akatora mamwe mafuta okuzodza nerimwe ropa raiva paatari akasasa Aroni nehanzu dzake, akasasawo vanakomana vake nehanzu dzavo. Naizvozvo akazvipira kuna Mwari, Aroni nehanzu dzake, pamwechete navanakomana vake.

³¹ Mosesi akataurira Aroni navanakomana vake achiti, “Bikirai nyama yehondohwe iyi kumusuo wetendhe rokusanganira, muidyire ikoko pamwechete nechingwa chiri mutswanda yemipiro yokugadza sokutaura kwandakamboita ndichiti, ‘Aroni navanakomana vake vanofanira kuidya.’

³² Zvinenge zvasarapo, nyama nechingwa, ngazvipiswe nomoto.

³³ Musambobuda zvenyu pamusuo wetendhe rokusanganira kwamazuva manomwe, kusvikira mazuva okugadzwa kwenyu apera nokuti kugadzwa kwenyu kunotora mumazuva manomwe.

³⁴ Zvaitwa nhasi uno izvi, ndozvakanzi naTenzi zviitwe, kupfupira zvitadzo zvenyu.

³⁵ Munofanira kuramba muri kumuso wetendhe rokusanganira, siku nesikati, kwamazuva manomwe, muchiita zvinorehwa naTenzi, mungadaro mukafa nokuti ndozvandakaudzwa.”

³⁶ Naizvozvo Aroni navanokomana vake vakaita zvose zvakarehwa naTenzi achizvitaura nomuromo waMosesi.