Mupiro 3 - Bhaibhiri Idzva rechiShona rine Dhuterokanonika

Mipiro yokuwadzana

¹ Kana munhu achida kupira Tenzi chibayiro chake kuti chive mupiro wokuwadzana, ingave mombe yomukono kana hadzi, asi ngaive isina chinoshoreka.

² Munhu iyeyo ngaaise ruoko rwake pamusoro wayo, aiurayire kumusuwo wetendhe rokusanganira. Vana vaAroni ngavasase ropa rayo pamativi ose eatari.

³ Pachibayiro chomupiro wokuwadzana unopirwa kuna Tenzi uchiitwa zvokupiswa ngaabvise mafuta ose anoputira zvomukati namafuta ari pazviri,

⁴ neitsvo mbiri namafuta ari pakatinginika petsvo nedivi rechiropa rakareba nechinyama chepachiropa chaachabvisa pamwechete netsvo.

⁵ Vanakomana vaAroni ngavapisire zvose izvozvo paatari pamwechete nomupiro wokupisa, pahuni dziri kubvira moto, iwoyu mupiro unoitwa zvokupisa, unonhuhwirira zvinofadza Tenzi.

⁶ Kana mupiro wake wokuwadzana kuna Tenzi uri wehwai kana mbudzi, hono kana hadzi, ngaive isina chinoshoreka.

⁷ Kana munhu achida kupira hwai, ngaauye nayo kuna Tenzi,

⁸ aise ruoko rwake pamusoro pechibayiro chake aiurayire kumusuwo wetendhe rokusanganira. Vanakomana vaAroni ngavasase ropa rayo pamativi ose eatari.

⁹ Pachibayiro chomupiro wokuwadzana, unopirwa kuna Tenzi uchiita zvokupiswa, ngaapire mafuta acho, neemuswe wacho wose, wakakora, wakachekwa nepaunosangana nomusana, namafuta ose anoputira zvomukati, neari pazviri,

¹⁰ neitsvo mbiri, namafuta ari pakatinginika petsvo, nedivi rechiropa rakareba.

¹¹ Mupristi ngaapisire Tenzi nyama idzodzo dzose paatari, somupiro wezvokudya unoitwa zvokupiswa.

¹² Kana chibayiro chake kuna Tenzi chiri chembudzi,

¹³ ngaauye nayo kuna Tenzi aise ruoko rwake pamusoro wayo, aiurayire kumusuwo wetendhe rokusanganira. Vanakomana vaAroni ngavasase ropa rayo pamativi ose eatari.

¹⁴ Pachibayiro ichocho, ngaabvise mafuta anoputira zvomukati neari pazviri, apire kuna Tenzi mupiro unoitwa zvokupisa,

¹⁵ neitsvo namafuta ari padziri nechinyama chepachiropa.

¹⁶ Mupristi ngaapisire nyama idzodzo dzose paatari, achipira Tenzi mupiro wezvokudya unoitwa zvokupiswa unonhuhwirira zvinomufadza. Mafuta ose ndeaTenzi.

¹⁷ Uyu murao uchagara uripo pazvizvarwa zvenyu zvose wokuti: kose kwamuchagara musadye mafuta kana ropa.