Mateo 28 - Bhaibhiri Idzva rechiShona rine Dhuterokanonika

Kumuka KwaJesu

¹ Zvino kuzoti Sabata rapfuura, mambakwedza ezuva rokutanga revhiki, Maria Magadharena nomumwe Maria uya vakaenda kuguva.

² Heko kundengendeka kukuru kwenyika kwakaitika nokuti mutumwa waMwari akaburuka kubva kudenga. Akauya akakungurutsa dombo riya ndokugara pamusoro paro.

³ Aitarisika semheni, hanzu dzake dzakachena kuti mbuu samazaya echando.

⁴ Mapurisa aya akadedera nokumutya vakati papata sokunge vafa.

⁵ Asi mutumwa akati kumadzimai, “Imi musatye henyu nokuti ndinoziva kuti murikutsvaka Jesu akaroverwa pamuchinjikwa.

⁶ Haapo pano nokuti amuka sezvaakareva. Uyai muone paanga arere.

⁷ Zvino chiendai nokukurumidza mundoudza vadzidzi vake kuti amuka muvafi. Arikufanokutungamirirai kuGarirea. Muchamuona ikoko. Hezvoka ndakutaurirai.”

⁸ Nokudaro vakabva paguva nokukurumidza zvabatana nokutya nokufara kukuru. Vakamhanya kundoudza vadzidzi vake.

⁹ Jesu akabva asangana navo akati, “Kwaziwai” ivo vakauya kwaari vakabata tsoka dzake vachimugwadamira.

¹⁰ Jesu akati kwavari, “Musatye. Chiendai mundotaurira hama dzangu kuti dziende kuGarirea. Ndiko kwavachandiona ikoko.”

Masoja anopa rondedzero yezvokumuka kwaJesu

¹¹ Madzimai aya pavakanga vachienda, mamwe mapurisa aya akaenda muguta akataurira vapristi vakuru zvose zvakanga zvaitika.

¹² Vakaita dare navakuru vakuru ndokuita zano rokupa masoja chitsama chakati kuti chemari

¹³ vachiti, “Taurirai vanhu kuti vadzidzi vake vakauya usiku vakamuba isu takakotsira.”

¹⁴ Izvi zvikanzwika munzeve dzagavhuna, isu ndisu tichapedzerana naye kuti murege kuva nechinokutambudzai.

¹⁵ Saizvozvowo vakatora mari iya vakaita sezvavakanga vataurirwa. Rungano urwu rwakaparidzirwa muvaJudha kusvika pari nhasi.

Jesu anozviratidza kuvadzidzi vake

¹⁶ Vane gumi nomumwechete vakaenda kuGarirea, kugomo ravakanga vataurirwa naJesu.

¹⁷ Pavakamuona vakamugwadamira asi vamwe vakanga vasina chokwadi nazvo.

¹⁸ Jesu akauya akati kwavari, “Simba rose pasi nokudenga rakapiwa kwandiri.

¹⁹ Naizvozvo endai mundodzidzisa marudzi ose avanhu muvaombeke muzita raBaba neroMwanakomana neraMweya Mutsvene

²⁰ muchivadzidzisa kuchengeta zvose zvandakuudzai. Uye tarisai muone, ndinemi nguva dzose kusvikira kuguma kwapasi.”