Joshua 16 - Bhaibhiri Idzva rechiShona rine Dhuterokanonika

Nyika yevedzinza rokwaEfuraimu neyechimwe chikamu chevokwaManase vokumadokero

¹ Nyika yakagoverwa vokwaJosefi, yaibvira muna Jorodhani pedyo neJeriko kumabvazuva kwematsime emvura yeJeriko zvichienda kugwenga rinobvira kuJeriko richienda kunyika yamakomo kusvikira kuBhetieri.

² Yaizobvira kuBhetieri yonanga nokuguta reRuzi yoenda kuAtaroti, nyika yevokwaAki.

³ Yozodzika yakananga kumadokero kumuganhu nevaJafureti kusvikira kumuganhu weBhetihoroni yezasi, yoenda kuGezeru yondosvika kugungwa reMedhiterenieni.

⁴ Saka vedzinza rokwaManase nerokwaEfuraimu, vokwaJosefi vakagoverwa nhaka yavo.

Nyika yokwaEfuraimu

⁵ Nyika yevedzinza rokwaEfuraimu nemhuri dzavo yakanga yakamira yakadai: Muganhu wenhaka yavo iyi kumabvazuva waiva Atarotiadha kusvikira kuBhetihoroni yokumusoro,

⁶ wobva wananga kugungwa reMedhiterenieni wakaisa Mikimetati kuchamhembe, wopota nokuTaanatishiro wakananga kumabvazuva wopfuurapo uchingoenda kumabvazuva wosvika kuJanoa.

⁷ Waizobva kuJanoa wodzika kuAtaroti nokuNaara wobva wasvika kuJeriko uchindosvika muna Jorodhani.

⁸ Kubvirawo kuTapua, muganhu uyu waienda kumadokero kundosvika kukakova keKana uchindosvika kugungwa reMedhiterenieni. Iyoyi ndiyo nhaka yevedzinza rokwaEfuraimu nemhuri dzavo.

⁹ Zvaisanganisirawo maguta akanga apiwa vedzinza rokwaEfuraimu mukati menhaka yakagoverwa vedzinza raManase, maguta iwayo ose nemisha yawo.

¹⁰ VokwaEfuraimu ava havana zvavo kudzinga vaKanani vaigara muGezeru. Saka vaKanani vagere pakati pevokwaEfuraimu kusvikira pari nhasi, asi vava kungogara vachivaitira basa zvechibharo.