Isaya 64 - Bhaibhiri Idzva rechiShona rine Dhuterokanonika

¹ Dai mabvurura matenga mukaburuka pasi pano, makomo angandengendeke nokuvapo kwenyu imi,

² sokubvira kunoita tsotso, sokufashaidza mvura kunoita moto kuti zita renyu rizivikanwe nevavengi venyu, marudzi adedere pamusana pokuvapo kwenyu.

³ Inga wani makaita zvinhu zvinotyisa zvatakanga tisingatarisiri. Makaburuka pasi makomo akandengendeka pamusana pokuvapo kwenyu.

⁴ Kubvira pasichigare hazvina kumbonzwika kana kupinda munhu munzeve kunyange ziso zvaro rati ramboona mumwe Mwari kunze kwenyu imimi, anoitira zvakadai vanotarisira kwaari.

⁵ Munosanganawo naanofarira kuita zvakarurama, ivo vanokurangarirai panzira dzenyu imi. Handiti makashatirwa, isu tichikutadzirai tagarisa muzvitadzo zvedu zvino tichaponeswawo here iyesu?

⁶ Tose zvedu isu, tangova somunhu akan'ora. Zvose zvazvo zvoururami zvatakaita zvava kunge hanzu dzakatindivara. Tose tabhuruvara seshizha. Zvino uipi hwedu uhu hunotipupurutsa semhepo.

⁷ Hakuna kana nomumwe achiri kunamata zita renyu kana anombonzwawo shungu yokuti abatirire pamuri, nokuti makazvihwandisa kwatiri ndokubva matiti kuche kuzvitadzo zvedu.

⁸ Asi imi Tenzi, ndimi Baba wedu. Isu tiri ivhu rokuumbisa imi ndimi muumbi wedu tose zvedu tiri basa ramakaita imi namaoko enyu.

⁹ Tenzi regai zvenyu kubva matoshatirwa mukadaro. Regai zvenyu kuramba mongorangarira zvakaipa nokusingaperi. Tonderai inga wani tose tiri vanhu venyu.

¹⁰ Maguta enyu anoera angova renje zvaro, guta reZioni rava renje chairo, Jerusaremu rave dongo.

¹¹ Imba yedu iyi inoera yakanakisisa kwazvo mamairemekedzerwa nemadzibaba edu yakaroromeswa nomoto. Nzvimbo dzedu dzose dzakanaka dzangova matongo zvawo.

¹² Zvino moramba makangotarisa zvenyu here zvinhu zvakadai nhai Tenzi? Moramba makangonyarara zvenyu here muchitionesa nhamo inorwadza kudai?