Genesi 48 - Bhaibhiri Idzva rechiShona rine Dhuterokanonika

Kukomborerwa kwaEfuremu naManase

¹ Kuzoti kwati perei chinguva Josefi akaudzwa kuti baba vake varwara, nokudaro akaendako navanakomana vake vaviri Manase naEfuremu.

² Jakobho paakanzwa kuti mwana wake Josefi auya akazvisimbaradza akamuka akaita zvokugara pamubhedha.

³ Jakobho akataurira Josefi achiti, “Iye Aripagomo akazviratidza kwandiri paRuzi kuKanani akandikomborera.

⁴ Akanditiwo, ‘Ndichakupa vana vazhinji, ndigokuitai kuti muwande zvokuita madzinza namadzina avanhu. Ndichapa zvizvarwa zvako zvichauya nyika ino kuti ive yavo nokusingaperi.’

⁵ “Zvino vanakomana vako vaviri vakaberekerwa muno muIjipiti ndisati ndauya kuno vava vana vangu. Vana vako ava Efuremu naManase, vava vana vangu chaivo zvakangoita Rubheni naSimeoni.

⁶ Asi vawakazoberekerwa mushure mavo, ndivo vachava vana vako. Nhaka yavo vanotozoiwana muzita ravakoma vavo ivavo.

⁷ Ndinodaro nokuti pandaibva kuMesopotamia, amai vako Rakeri vakandifira panzira munyika yeKanani tava kuda kundosvika kuEfurati, ndiyowo Bheterehemu, ndikavaviga ipapo.”

⁸ Isiraeri paakaona vana vaJosefi vakomana akati, “Ko ava ndivananaaniko ava?”

⁹ Josefi akati kuna baba vake, “Ava ndivo vana vangu vandakapiwawo naMwari muno umu.” Iye akati, “Chiuya navo kuno ndivakomborere.”

¹⁰ Meso aIsiraeri akange oonera madzerere asisaone zvakanaka nokuti akanga akwegura. Josefi akaswededza vana vake pana baba vake. Jakobho akavatsvoda achivafungatira.

¹¹ Jakobho akataurira Josefi achiti, “Handina kufunga kuti ndichazokuonazwe. Asi Mwari akandibatsira ndikatoonawo navana vako.”

¹² Josefi akazovabvisa pamakumbo ababa vake akabva apfugama akakotamisa musoro.

¹³ Josefi akauya navana vake vari vaviri akati Efuremu kurudyi, Manase kuruboshwe. Akavaisa pana baba vake Isiraeri akati Efuremu kuruboshwe rwavo Manase kurudyi rwavo.

¹⁴ Isiraeri akapesanisa maoko ake achiisa ruoko rwake rworudyi pamusoro waEfuremu aiva muduku, akaisa ruoko rwake rworuboshwe pamusoro waManase aiva dangwe.

¹⁵ Jakobho akakomborera Josefi achiti, “Mwari aiteverwa namadzibaba angu Abhurahamu naIsaki, Mwari akava mufudzi wangu muupenyu hwangu hwose kusvikira zuva ranhasi,

¹⁶ iye mutumwa waMwari aindinunura pose pandainge ndawirwa nenjodzi, ngaakomborerewo vakomana ava. Zita rangu namazita amadzibaba angu Abhurahamu naIsaki ngaarege kurova pavana ivava. Mwari ngaavape vana vazhinji.”

¹⁷ Josefi paakaona baba vake vaisa ruoko rwavo rworudyi pamusoro waEfuremu, hazvina kumufadza. Akabata ruoko rwababa vake achida kurubvisa pamusoro waEfuremu kuti aruise pamusoro waManase

¹⁸ Josefi akati, “Handizvo baba, uyu ndiye dangwe. Dai maisa ruoko rwenyu rworudyi pamusoro wake.”

¹⁹ Asi baba vake vakaramba vakati, “Ndinoziva zvandiri kuita mwanangu. Iye achazovawo dzinza guru ravanhu. Asi munun'una wake ndiye achava mukuru kupinda iye. Vana vaEfuremu vachava ndudzi zhinji dzavanhu.”

²⁰ Jakobho akavakomborera pamusi iwoyo achiti, “VaIsiraeri vachakomborerana vachiti, ‘Mwari ngaakuitei saEfuremu naManase.’ ” Naizvozvo Jakobho akapa Efuremu ukuru hunopfuura hwaManase.

²¹ Jakobho akarayira Josefi achiti, “Ini ndava kufa, asi Mwari achava nemi, achakudzoserai kunyika yemadzibaba enyu.

²² Iwe ndinokupa mumwe mugove wandisingape vakoma nevanun'una vako. Ndinokupawo dunhu reShikemu randakatora pandakarwisa vaAmori nebakatwa rangu nouta hwangu.”