Estere 10 - Bhaibhiri Idzva rechiShona rine Dhuterokanonika

Ukuru hwamambo Ahasurerusi nohwaModhekai

¹ Mambo Ahasuerusi aiteresa mutero nyika iyoyo nenyika dzokumahombekombe kwegungwa.

² Noukuru hwake nesimba raaiva naro, mabasa ose aakaita nenhoroondo chaiyo izere yokududza pachena ukuru ukuru hwaModhekai hwaakapiwa naiye mambo zvakanyorwa wani muBhuku reNhoroondo dzeMadzimambo ePezhiya neeMidhia.

³ Ndokusaka muJudha uyu Modhekai aiva mutevedzeri wamambo Ahasuerusi pachigaro. Akanga ari mukuru mukuru chaiye pakati pevaJudha ari munhu aizikanwa noruzhinji rwehama dzake, pamusana pokuti aida kuti zvinakire hama dzake; akanga ari munhu wokutaura zvorugare kuvanhu vorudzi rwake.