Ɀireʋo 6 - Bhaibhiri Idzva rechiShona rine Dhuterokanonika

Kumiririra chikwereti chomumwe

¹ Mwanangu ukati ndiwe wokumiririra chikwereti chomumwe uchitsidza panzvimbo pomumwe,

² kana wateewa mukutaura kwomuromo wako wabatwa mumazwi omuromo wako

³ zvaunofanira kuita ndezvizvi, mwanangu, kuitira kuti uzvinunure nokuti unenge watowira mumaoko omumwe wako. Enda uzvirereke utadzise mumwe wako iyeyo kudya rinopisa.

⁴ Usambobvuma zvako kuti meso ako abatwe nehope kana kutsomwaira nehope.

⁵ Zvinunure semhara kumuvhimi kana seshiri mumaoko omutei weshiri.

Tsimbe yomunhu

⁶ Iwe tsimbe, enda kumujuru uongorore maitiro awo udzidze ungwaru.

⁷ Mujuru hauna mambo, hauna muchinda kana mutongi

⁸ asi unogadzirira sadza rawo muzhizha unounganidza chokudya chawo pakukohwa.

⁹ Uchasvika riniko wakarara nhaiwe tsimbe uchamuka riniko muhope dzako?

¹⁰ Izvo zvokuti, “Regai ndimboti kotsire kashoma.” “Regai ndimboti tsomwaire kashoma. Ndimboti maoko gumbate kuzorora.”

¹¹ Urombo hunobva hwati pauri tutururu serombe uye kushaiwa kunouya kwauri somunhu akapakata zvombo zvokurwa.

Nhubu yomunhu

¹² Nhubu munhu akaipa anongofamba achikanganisa mashoko.

¹³ Anochonya maziso anotondeka netsoka dzake achinongedzera nongedzera neminwe yake.

¹⁴ Anoronga twaanoronga nomwoyo wakashata achiramba achingokonzera manyongori.

¹⁵ Nhamo inoyerekana yamuwira, nenguva isipi anotyorwa-tyorwa zvisina karapiro.

Zvinhu zvinomwe zvisingadiwe naMwari

¹⁶ Pane zvinhu zvitanhatu zvisingadiwi naTenzi zvinotosvika zvinomwe zvinosemesa kwaari, zvinoti:

¹⁷ Kuzvikudza, nokunyepa maoko anodeura ropa risina mhosva

¹⁸ nomwoyo unoronga zvirongwa zvakaipa netsoka dzinomhanyirira kune zvakaipa

¹⁹ chapupu chenhema chinotaura manyepo munhu anomutsa gakava pakati pehama.

Yambiro nezveupombwe nomukadzi womuridzi

²⁰ Mwanangu chengeta mitemo yababa vako, usakande pasi mirao yaamai vako

²¹ isungirire mumwoyo mako isungirire muhuro mako nguva dzose.

²² Kana wofamba inokutungamirira, kana worara inokuchengetedza. Kana wakasvinura inokurukura newe.

²³ Chandinodariro ndechokuti mutemo mwenje, murao chiedza kutsiurwa nokudzidziswa ndiwo mafambiro ohupenyu

²⁴ kuitira kuti zvikudzivirire kumukadzi wakaipa kururimi rwunotapira rwomukadzi pfambi.

²⁵ Usatorwe mwoyo norunako rwake usabatwe kumeso netsiye dzake.

²⁶ Nokuti pfambi inogona kutengwa nemari yechingwa asi mukadzi womumwe anonanga zvokutora upenyu hwakakosha hwomunhu.

²⁷ Munhu angatakure moto pachipfuva, hanzu dzake dzikarega kutsva here?

²⁸ Kana kuti munhu angafambe pamavhunze anopisa, tsoka dzake dzikarega kutsva here?

²⁹ Ndizvo zvakaita munhu anoenda kumukadzi womumwe hakuna anomubata bata akarega kurangwa.

³⁰ Handiti vanhu vanoshora mbavha here inenge yaba kuti irape nzara yayo?

³¹ Asi ikabatwa inoripiswa kakapetwa kanomwe inobvisa upfumi hwose hwomumusha mayo.

³² Munhu anoita upombwe haana njere, anoita zvakadai kuzviuraya

³³ chaanowana ipapa maronda nokushorwa uye kuzvidzwa kwako hakufe kwakabva

³⁴ nokuti shanje inoitisa munhu hasha, kana wotsividza anotsividza zvisina tsitsi

³⁵ zvokuti pakaripwa haambozviona kana kugadzana mwoyo nokumupa kwako zvipo zvakawanda.