Ɀireʋo 2 - Bhaibhiri Idzva rechiShona rine Dhuterokanonika

Mubayiro wokuva noungwaru

¹ Mwanangu, ukagamuchira mashoko angu uye ukapfimbika mauri mitemo yangu,

² uchirerekera nzeve yako kuungwaru, uchitorwa mwoyo nenzwisiso

³ nokungewo uchichemera kuzivisisa uchidaidza kunzwisisa

⁴ ukatsvaka ungwaru sesirivha uchihutsvaka upfumi hwakavandika.

⁵ Kutya Tenzi unobva wakunzwisisa uchibva wawana kuziva Mwari,

⁶ nokuti Tenzi ndiye anopa ungwaru mukanwa make ndimo munobva ruzivo nokunzwisisa

⁷ anochengetera vakarurama ungwaru chaihwo ndiye nhowo yokudzivirira vanofamba zvakarurama.

⁸ Anochengetedza maitiro okutonga kwakarurama achichengetedza nzira yavarurami vake.

⁹ Ndopaunozonzwisisa kuti ururami noruenzaniso nokuva pachokwadi chii uyewo maitiro ose akarurama

¹⁰ nokuti uchapindura mwoyo noungwaru uye ruzivo ruchave shamwari yako.

¹¹ Kuziva kusarudza kuchakuchengetedza, kuziva chokusarudza kuchakutarira.

¹² Kuchakununura kunzira yakaipa kuvanhu vanotaura zvakaora,

¹³ vanhu vanosiya nzira tsvene vachifamba munzira dzerima;

¹⁴ vanofarira kuita zvakaipa vanonakirwa nokushata kwouipi;

¹⁵ vanhu vane nzira dzakakombama vanokuita kwakamonyoroka.

¹⁶ Zvinokununura kumukadzi asiwako kumukadzi asingazivikanwi twaanotaura norurimi rwake twunotapira

¹⁷ mukadzi anosiya shamwari yake yepaudiki achikanganwa chitsidzirano chaMwari wake.

¹⁸ Anonyudza pasi kurufu imba yake nzira dzake dzinodzika kuvafi.

¹⁹ Wose anoenda kwaari haadzoki haazowanazve nzira youpenyu.

²⁰ Saka famba nenzira yavanhu vakanaka uchengetedze nzira dzavakarurama

²¹ nokuti vakarurama ndivo vachagara panyika uye vanotendeseka vachararama mairi

²² vakaipa vachabviswa panyika vanoujarijari vachatipurwapo.