Zekaria 6 - Bhaibhiri Idzva rechiShona rine Dhuterokanonika

Chiratidzo chengoro ina dzehondo

¹ Ndakasimudzazve musoro ndikaona hedzo ngoro ina dzehondo dzichibuda napakati pamakomo maviri. Makomo acho akanga ari makomo endarira.

² Ngoro yehondo yokutanga yakanga ina mabhiza matsvuku, yechipiri iina mabhiza matema

³ yetatu yacho iina mabhiza machena. Ngoro yehondo yechina yaiva namabhiza mapfumbu, ano chaiwo.

⁴ Ndakabvunza mutumwa uya aitaura neni kuti, “Ko izvi zviiko nhai changamire wangu?”

⁵ Mutumwa uye akandipindura achiti, “Idzodzi dziri kuenda kumativi mana emhepo dzedenga mushure mokunge dzambozvikumikidza kuna Changamire wapasi pose.”

⁶ Ngoro yehondo ina mabhiza matema inoenda kunyika yokuchamhembe, machena achaenda kunyika yokumadokero. Mapfumbu anoendawo kunyika yokumaodzanyemba.

⁷ Pakabuda mabhiza, aya ano chaiwo akanga asingagare zvakanaka nokuda kupinda munzira kuti apote nenyika. Ndokubva iye ati, “Chiendai mupote nenyika.” Saizvozvowo akapota nayo nyika.

⁸ Akazodaidzira kwandiri achiti, “Chinzwa, vaya vanoenda kunyika yokuchamhembe vapa kuti mweya wangu uwane zororo kunyika yokuchamhembe.”

Chirevo chokudzika mupristi Joshuwa ngundu mumusoro

⁹ Shoko raTENZI rakazouya kwandiri rikati,

¹⁰ “Enda kunhapwa utore Heridhai naTobhiya naJedhaya vasvika vachibva kuBhabhironi ubva waenda musi wakarewo kumba kwaJosiya mwanakomana waZefaniya.

¹¹ Unotora kwavari sirivha nendarama uite nayo ngundu uidzike mumusoro maJoshuwa mwanakomna waJehozadhaki mupristi mukuru

¹² umuti zvanzi naTENZI wehondo nehondo: ‘Chinzwa, murume ane zita rokuti Bazi achabukira kuva bazi munzvimbo maari achizovaka Temberi yaTENZI.

¹³ Iye ndiye achavaka Temberi yaTENZI uye achawana chiremera choumambo uye achagara pachigaro choumambo achitonga. Pachava nomupristi pedyo nechigaro chake choumambo vachiwirirana vachinzwisisana kwazvo pauviri hwavo.’

¹⁴ Ngundu dzinofanira kuzova muTemberi yaTENZI sechiyeuchidzo chokuyeuka nacho Heridhai naTobhiya naJedhaya naJosiya mwanakomana waZefaniya.”

¹⁵ Vari kurewo vachauya kuzovaka Temberi yaTENZI. Ndipo pamuchazoziva kuti TENZI wehondo nehondo andituma kwamuri. Izvozvi zvichaitika kana mukanyatsoteerera izwi raTENZI, Mwari wenyu.