Sira 51 - Bhaibhiri Idzva rechiShona rine Dhuterokanonika

ZVIMWEWO Rumbo rwokutenda Mwari

¹ “Ndinokutendai imi Tenzi, Mambo; ndichikurumbidzai, imi Mwari Muponesi wangu.

² Ndinorumbidza zita renyu ndimi maindidzivirira nokundibatsira; makandinunura kuti ndisaparadzwe, uye, makandinunura kururimi runotaura makuhwa uyewo kumuromo unotaura nhema. Kune vakanga vakamirisana neni, mukandibatsira, mukandinunura.

³ Netsitsi dzenyu dzakanyanya, uye, nezita renyu guru, makandinunura kumazino avaida kunditsenga, nomumaoko avaida kundiparadza upenyu. Makandiburitsawo munhamo zhinji dzandakapindana nadzo

⁴ uye mumoto unokachidza wakanga wakanditenderedza pandakanga ndiri mukati momoto wandisina kubatidza.

⁵ Makandinunura kurufu ndikasaenda pasi pasi penzvimbo yavakafa, makandinunura kururimi rwakan'ora nokumazwi amanyepo

⁶ pandakapomerwa mhosva paya kuna mambo nomunhu asina kururama, ndakanga ndotoda kufa, mweya wangu wakanga wadzika pedyo nenzvimbo yavafi.

⁷ Vakandikomba kumativi ose, pasina anondibatsira, ndakatsvaga wokundibatsira ndikamushaya.

⁸ Ndakachizoyeuka tsitsi dzenyu, imi Tenzi, namabasa makuru amakaita kubvira kare nakare, uye kuti imi munoponesa vanokumirirai muchivanunura kumaoko avavengi vavo.

⁹ Ndakasvitsa chichemo changu chichibva panyika, ndakumbira kuti ndinunurwe kurufu.

¹⁰ Ndakachema ndichiti, ‘Tenzi ndimi baba vangu, musandisiye ndiri munhamo, pandinenge ndisina rubatsiro pavanhu vanozvikudza. Ndicharamba ndichirumbidza zita renyu, ndichiriimbira ndichikutendai.’

¹¹ Chichemo changu makachinzwa, mukandiponesa kuti ndisaparadzwe, mukandinunura kune zvakaipa.

¹² Naizvozvo ndicharamba ndichikutendai nokukuimbirai, ndichirumbidza zita renyu imi Tenzi.”

Nhetembo yezvokutsvaga ungwaru

¹³ Zvandakanga ndichiri muduku, ndisati ndafamba nzendo dzangu, ndakanamata zviri pachena ndichikumbira ungwaru.

¹⁴ Ndakaukumbira ndiri pamberi peTemberi yaMwari, ndicharamba ndichiutsvaka kusvikira pakupedzisira.

¹⁵ Mwoyo wangu wakaufarira kubvira pakutumbuka kweruva rahwo kusvikira pakuibva kwomuchero wahwo. Rutsoka rwangu rwakaramba ruchingoutevera munzira, yahwo yakati tasa kubvira pauduku hwangu.

¹⁶ Pandakangotangisa kuupa nzeve, ndakaunzwa, ndikadzidza zvakawanda.

¹⁷ Ndakazoenderera mberi muungwaru. Ngaarumbidzwe uyo akandipa ungwaru!

¹⁸ Ndakatsunga mwoyo kugara upenyu huno ungwaru ndakaita shungu nezvakanaka, handichambofa ndakanyara nazvo.

¹⁹ Mweya wangu wakarwisa kuti ndiwane ungwaru, ndakanyatsoita zvinhu zvose nemazvo ndakatambanudzira maoko angu kudenga ndichichema kusaziva kwangu ungwaru.

²⁰ Mweya wangu wakatsvira ungwaru neshungu ndikauwana nokuzvinatsa kwandaiita. Kubvira pakutanga ndaiva neshungu dzokuuwana, saka hauchambozondisiya.

²¹ Ndakahutsvaga nakwose kwandinogona, ndakazouwana hwakati kuti.

²² Mwari akandipa mubairo wokugona kutaura, ini ndichamurumbidza narwo.

²³ Uyai kwandiri, imi musati madzidziswa, mugare muchikoro mangu.

²⁴ Seiko muchibvuma zvenyu kuti hamuna ungwaru, asi muchigara muine nyota yahwo?

²⁵ Ndakazarura muromo wangu ndichiti, “Zviwanirei ungwaru pasina mari mugozviwanira ungwaru pasina mutengo.

²⁶ Pinzai mitsipa yenyu mujoko rahwo, mugodzidza, nokuti hunowanikwa pedyo.

²⁷ Zvionerei nemeso enyu kuti kushingaira kwangu, kushoma asi zvino ndakawana zororo.

²⁸ Tengai zvenyu ungwaru nesirivha yakawanda, hunokubatsirai kuwana ndarama zhinji.

²⁹ Farirai tsitsi dzaMwari, musanyare kumurumbidza.

³⁰ Itai basa renyu nenguva, iye achazokupai mubayiro nenguva yake.” Ungwaru hwaJesu Mwana waSira.