Sira 50 - Bhaibhiri Idzva rechiShona rine Dhuterokanonika

Simoni mupristi mukuru

¹ Simoni mwana waOniasi mupristi mukuru aiva mutungamiriri wehama dzake ndiye aidadwa naye navanhu nokuti panguva yake ndiye akavaka Temberi payakanga yapazwa, nokusimbisawo nzvimbo inoeresesa.

² Iyewo ndiye akavaka ugaro hworusvingo rwakaturikidzwa kaviri, rwakakwidziridzwa kuvakwa kuti rutsigise chivanze cheTemberi.

³ Namazuva ake iwayo kwakacherwa tsime, rakakura senyanza kutenderera.

⁴ Akafunga nzira dzokuti aponese nadzo vanhu vake, kuti varege kuparadzwa. Ndiko kusaka akasimbisa rusvingo rweguta kuitira kuti vazvidzivirire kana vakombwa.

⁵ Hakusi kufadza kwazvaiita kumuona akakomberedzwa navanhu vake! Pakubuda kwaaiita achibva nokuseri kwechidzikatiro chomuTemberi

⁶ ainge hweva iri mukati memakore, kana kuti mwedzi wejenaguru.

⁷ Ainge zuva rinopenya pamusoro peTemberi yoWokumusorosoro kana kuti somuraraungu wakanangana namakore anopenya.

⁸ Ainge maruva amarozi panguva yepfumvudza kana kuti ruva ramahapa pachisipiti chemvura kana kuti muti una mashizha manyoro kuRebhanoni pazuva romuzhizha.

⁹ Ainge moto nerusenzi mubisiro. Ainge mudziyo wendarama yakarohwa–rohwa una manyerekete otutombo tunokosha twakasiyana–siyana.

¹⁰ Ainge muorivhi unoremerwa nemichero yawo, kana kuti somusaipurasi unotunga makore kureba.

¹¹ Paainge apfeka gemenzi rake ramandiriri uye anyatsozvipfekedza zvishongo zvake zvakaruramisisa, oenda kuatari inoera, pamberi pose peatari paibva pava panhu panoshamisa nokunaka.

¹² Aiti zvino kana vapristi vomugamuchidza zvikamu zvezvinoda kupirwa, iye amire pamberi pechoto cheatari akakombwa navamwe vake, aiita somusidhari muduku wokuRebhanoni, ivo vachiita sehunde dzemirara dzakamukomba.

¹³ Vanawo vose vokwaAroni vainge vakapfeka zvinoyevedza kwazvo mumaoko vaine zvinoda kupirwa kuna Mwari, vari pamberi pegungano rose raIsiraeri.

¹⁴ Iye Simoni paainge apedza kupira miteuro padziatari, achitevera nhevedzano yemipiro yaipirwa kuna Wokumusorosoro, Samasimbaose.

¹⁵ Aizotambanudza ruoko, otora mukombe, womuteuro wewaini yaaidira munyasi meatari ichibva yava munhuhwi unofadza Wokumusorosoro, Mambo wazvose zvose.

¹⁶ Ndipo paizobva podaidzirwa navana vaAroni, vachiridza mabhosvo akaitwa zvokupfurwa. Vaiita kuti kurira kwawo kunzwike zvikuru kuitira kuti kugoyeuchidza vanhu nezvoWokumusorosoro.

¹⁷ Pakarepo gungano rose ndoparaibva rati pamwechete pasi kota kota nouso vachinamata Tenzi, Samasimba Mwari Wokumusorosoro.

¹⁸ Vokuimba ndopavaibva vati mumhanzi tsemu unonakidza kwazvo unokuimba kuzere.

¹⁹ Vanhu, izvozvo vaizoteterera Tenzi Wokumusorosoro, vachiisa zvichemo zvavo kuna iye weTsitsi kudzamara vapedze kupira. Saizvozvi vaizopedza kumushumira kwavo.

²⁰ Nezvo Simoni aibva abva kuatari achiuya kuvanhu, otambanudzira maoko ake kugungano rose ravana vaIsiraeri, achivakumbirira kuti Mwari avakomborere, achifarirawo kudoma zita raMwari.

²¹ Vanhu vaibva vati kota kotazve nouso kuti vakomborerwe noWokumusorosoro.

Mashoko okukurudzira

²² Zvino chirumbidzai Mwari wezvinhu zvose, anoita zvinhu zvikuru kose kose. Ndiye akatisimudzira kubvira pakuberekwa, achitibata namaitiro ake etsitsi.

²³ Dai akangotipawo rufaro mumwoyo tive norugare mumazuva edu muIsiraeri uye narini narini.

²⁴ Ngaarambe achitiitira tsitsi, atinunure mumazuva edu.

Tsumo

²⁵ Kuna marudzi maviri avanhu andisingadi, rwechitatu harusirimbori rudzi.

²⁶ Kunoti: vagari vomumakomo eSeiri, navaFirisitiya, namatutununu avanhu anogara Shikemu.

Mazwi okupedzisira

²⁷ Chidzidziso ichi chezvoruzivo norunzwisiso ndakachinyora ini mubhuku rino, ini Jesu, mwana waSira, mwana waEreazari, wokuJerusaremu, ndichidurura ungwaru kubva mumwoyo mangu.

²⁸ Akakomborerwa zvake anorangarira zvinhu izvi; uyo anozvipfundira mumwoyo achava mungwaru,

²⁹ nokuti kana achiita zvinhu izvi achakwanisana nazvose, nokuti mumwenje waMwari ndimo maanofamba namo.