Sira 49 - Bhaibhiri Idzva rechiShona rine Dhuterokanonika

Josiya

¹ Kurangarira Josiya kunonhuhwira sorusenzi rwanyatsogadzirirwa navazivisisi vezvezvinonhuhwira. Kumurangarira kunotapira sokutapira kwouchi mukanwa, kunonakidzawo sokuimba pamabiko panonwiwa waini.

² Akatevera gwara rakanaka rokupindura vanhu. Akabvisa chose unyangadzi hwakan'ora.

³ Akaisa mwoyo wake muna Tenzi. Panguva yakwakanga kusina zvokutevera mutemo, iye akakurudzira zvokunamata.

Madzimambo navaporofita vokupedzisira

⁴ Dhavhidhi naHezekiya naJosiya ndivo voga, vakateerera Mwari, mamwe madzimambo ose akatadzira Mwari zvakanyanya nokuti vakafuratira mutemo woWokumusorosoro. Madzimambo okwaJudha akabva aguma,

⁵ nokuti akapa vamwe simba rahwo, akapawo mbiri yahwo kune venyika yevechirudzi.

⁶ Vakapisa guta reNzvimbo Inoera rakanga rakasarudzwa naMwari; migwagwa yaro yakasara isisina nomunhu wose, sokufanotaurwa kwazvakanga zvaitwa naJeremiya.

⁷ VaJudha vakambomuonesa nhamo, kunyange zvake akanga afanosarudzwa naMwari achiri munhumbu yaamai vake, kuti ave muporofita kuti adzure, arwadzise uye kuti aparadze uye kuti avake nokusima.

Ezekieri

⁸ Ezekiyeri ndiye akaona chioneso chaipenyesesa, chaakaratidzwa naMwari chiri nechokumusoro kwengoro yamakerubhu.

⁹ Nokuti Mwari akayeuka vavengi vake akavatumira dutu remvura, akabatsira vaitevera nzira kwayo.

¹⁰ Mapfupa avaporofita gumi namaviri ngaatungirezve paakaradzikwa, nokuti vakanyaradza vokwaJakobho, vakavanunura nechitarisiro chakaperera.

Zerubhabheri

¹¹ Tingarumbidze Zerubhabheri nomutoo upiko? Akaita ringi riri muruoko rworudyi.

¹² Ndizvowo zvaiva naJoshuwa mwana waJozadhaki. Pamazuva avo, vakavaka imba yaMwari vakavaka patsva Temberi inoera yaMwari, yakavakirwa kupa mbiri nokusingaperi.

Nehemiya

¹³ Nehemiya ndiye mumwe asingafaniri kukanganwikwa nokusingaperi nokuti ndiye akavakiridza rusvingo rwakanga rwapazwa, akamisawo misuo mikuru ine zvihuri, akavaka patsva dzimba dzedu.

Kutarira shure

¹⁴ Hakuna akasikwa pasi pano angaenzane naEnoki, nokuti ndiye akatorwa achibva pasi pano.

¹⁵ Hakuna ati azvarwa akaita saJosefi akava mutungamiri wamadzikoma ake nomutsigiri worudzi rwake; mapfupa ake akaremekedzwa.

¹⁶ Shemu naSeti vakaremekedzwa pakati pavanhu, asi ari pamusoro pezvisikwa zvose zvinoupenyu ndiAdhamu.