Ruka 18 - Bhaibhiri Idzva rechiShona rine Dhuterokanonika

Mutongi asinganyari munhu nechirikadzi isinganeti kukumbira

¹ Jesu akavataurira mumwe muenzaniso wokuti vanofanira kunamata nguva dzose vasingarasi mwoyo.

² Akati, “Mune rimwe guta maiva nomutongi akanga asingatyi Mwari kana kuzeza munhu.

³ Maivawo neimwe chirikadzi muguta iroro yaingoramba ichiuya kwaari ichiti, ‘Ndienzanisireiwo nyaya yangu nomuvengi wangu.’

⁴ Kwechinguva chakati kuti akamboramba. Mushure mezvo akazozviti, ‘Kunyange zvazvo ndisingatyi Mwari kana kuzeza munhu

⁵ asi pamusana pokuti chirikadzi iyi inondinetsa, regai ndiienzanisire nyaya yayo; ingandisvote nokuramba kwayo ichingouya.’ ”

⁶ Tenzi akati, “Inzwai zviri kutaurwa nomutongi asina kururama.

⁷ Mwari haangadzivirire here vasarudzwi vake vanochema kwaari siku nesikati. Angavanonokere kwenguva ndefu here?

⁸ Ndinokutaurirai kuti achavadzivirira nokuchimbidza. Kunyange zvakadaro zvazvo, pachauya Mwanakomana womunhu, achasvikowana panyika pane chitendero here?”

Muenzanaiso womuFarisei nomuteresi

⁹ Jesu akavataurirawo muenzaniso uyu kune vamwe vaizvikudza vachizviona savakarurama kupinda vamwe vachishora vamwe.

¹⁰ “Vamwe varume vaviri vakaenda muTemberi kundonamata. Mumwe wavo aiva muFarisei, mumwe ari muteresi.

¹¹ MuFarisei akamira akanamata nechomumwoyo achiti, ‘Mwari ndinokutendai nokuti handina kuita savamwe vanhu, vapambi, vasina ruenzaniso, nemhombwe kana somuteresi uyu.

¹² Ndinotsanya kaviri pasvondo. Ndinopa chegumi chezvose zvandinowana.’

¹³ Asi muteresi akamira nechokure asingatomboda kusimudza maziso ake kudenga. Akazvibata pachifuva achizvininipisa achiti, ‘Mwari, ndinzwirewo tsitsi ini mutadzi.’

¹⁴ Ndinokutaurirai kuti murume uyu akaenda kumba kwake aruramiswa panze pomumwe uya. Nokuti munhu wose anozvikudza achadukupiswa asi uyo anozvidukupisa anokudzwa.”

Jesu anokomborera vana vaduku

¹⁵ Vanhu vakanga vava kuunza kunyange vacheche kwaari kuti avabate. Vadzidzi vake pavakazviona, vakavarambidza.

¹⁶ Asi Jesu akadaidzira achiti, “Regai vana vaduku vauye kwandiri musavarambidze nokuti umambo hwedenga ndehwevakaita savava.

¹⁷ Chokwadi chaizvo ndinokuudzai kuti ani naani asingagamuchiri umambo hwaMwari somwana muduku haambohupinda.”

Jaya mupfumi

¹⁸ Mumwe mutongi akabvunza Jesu achiti, “Mudzidzisi wakanaka. Ndingaitei kuti ndiwane upenyu husingaperi?”

¹⁹ Jesu akati kwaari, “Sei uchinditi ndakanaka? Hakuna wakanaka asi Mwari woga.

²⁰ Inga unoziva wani mitemo, inoti usaite upombwe, usauraye, usabe, usaite uchapupu hwenhema remekedza baba naamai vako.”

²¹ Iye akati, “Yose iyi ndakaichengeta kubvira paudiki hwangu.”

²² Jesu paakazvinzwa akati kwaari, “Pane chinhu chimwechete chausina. Tengesa zvose zvaunazvo uzvigovere kuvarombo. Uchava noupfumi kudenga; ugouya ozonditevera.”

²³ Paakanzwa izvi akasuruvara nokuti akanga akapfuma zvikuru.

²⁴ Jesu akamutarisa akati, “Zvakaoma sei kuti vano upfumi vapinde muumambo hwaMwari.

²⁵ Zviri nyore kuti ngamera ipinde napaburi retsono panokuti mupfumi apinde muumambo hwaMwari.”

²⁶ Avo vakazvinzwa vakati, “Kana zvakadaro ndiani angaponeswe.”

²⁷ Asi iye akati, “Zvisingagoneki navanhu zvinogoneka naMwari.”

²⁸ Pita akazoti, “Tarisai muone, isu takasiya misha yedu tikakuteverai.”

²⁹ Iye akati kwavari, “Zvirokwazvo ndinoti kwamuri, ‘Hakuna munhu akasiya musha kana mukadzi kana vakoma kana vaunun'una kana vabereki kana vana pamusana poumambo hwaMwari

³⁰ asingazowani zvakapetwa kakawanda kupinda izvozvo panguva ino uye upenyu husingaperi munguva ichauya.’ ”

Jesu anotaura nezvorufu rwake kechitatu

³¹ Jesu akatora vane gumi navaviri akati kwavari, “Chinzwai, tavakukwira kuJerusaremu. Zvose zvakanyorwa navaporofita nezveMwanakomana womunhu zvichazadziswa.

³² Nokuti achandoiswa mumaoko evechirudzi, achasveeredzwa achiitirwa zvinonyadzisa nokusvipirwa mate.

³³ Vachamurova zvakanyanya vozomuuraya asi achizomuka pazuva retatu.”

³⁴ Pazvinhu izvi hapana chavakanzwisisa. Zvaakataura izvi zvakanga zvakavanzwa kwavari. Havana kubata zvaaireva.

Jesu akarapa bofu kuJeriko

³⁵ Paakaswedera kuJeriko, rimwe bofu rakanga rigere parutivi rwenzira richipemha

³⁶ parakanzwa mhomho yavanhu ichipfuura, rakabvunza kuti, “Kwauyei?”

³⁷ Vakati kwaari, “Jesu weNazareti ari kupfuura nepo.”

³⁸ Iye akashevedzera achiti, “Jesu Mwanakomana waDhavhidhi ndinzwireiwo tsitsi.”

³⁹ Vakanga vari mberi vakamutsiura vachimuti anyarare asi iye akatoshevedzera zvakatonyanya achiti, “Mwanakomana waDhavhidhi ndinzwireiwo tsitsi.”

⁴⁰ Jesu akamira akati ngaauiswe kwaari. Paakasvika pedyo, akamubvunza achiti,

⁴¹ “Chii chaunoda kuti ndikuitire.” Akati, “Tenzi itai kuti ndione.”

⁴² Jesu akati kwaari, “Chiona zvako. Chitendero chako chakuponesa.”

⁴³ Pakarepo akabva avakuona akatevera Jesu achirumbidza Mwari. Vanhu vose pavakazviona vakarumbidza Mwari.