Mika 3 - Bhaibhiri Idzva rechiShona rine Dhuterokanonika

Muporofita Mika anotsoropodza vatungamiriri

¹ Ndakati: “Teererai munzwe, imi vatungamiriri vokwaJakobho nemi vatongi vemba yokwaIsiraeri. Harisi basa renyu here kuziva ruenzaniso?

² Imi munovenga zvakanaka muchida zvakaipa, munovhiya vanhu vangu ganda muchivamwaura nyama pamapfupa avo.

³ Munodya vanhu vangu nyama, muchivakwatura ganda imi. Muchivatyora-tyora mapfupa muchivajajada senyama mupoto, senyama zvayo mumazibhodho.

⁴ Ndopayeka pavanozochema kuna Tenzi asi haavapinduri. Ndipo paanotobva atovanza uso hwake nokudawo kokuti vakaita zviito zvakaipa.”

Vaporofita venhema vanoyambirwa

⁵ Zvanzi naTenzi kuna vaporofita vanotungamirira vanhu vangu mutome, munodaidzira kuti, “Kwakanaka,” kana muchiwaniswa chokudya asi kune vasingakuwanisi chokuisa kumuromo heyo hondo naye.

⁶ Nezvo kwamuri, zvokuona zviratidzo izvozvo, huchava usiku zvahwo. Muchava murima, zvokushopera pasisina. Vaporofita, zuva richavadokera, zuva richasviba kwavari.

⁷ Vaoni vachafumurwa, vanoshopera vachanyadziswa. Vachati kapu kubata muromo nokuti mhinduro kuna Mwari panenge pasisina.

⁸ Asi ini ndakazara nesimba ndizere naMweya waTenzi uye ndakazara neruenzaniso nesimba kuti nditaurire vokwaJakobho kukanganisa kwavo, nevekwaIsiraeri chitadzo chavo.

Vatongi vakaipa

⁹ Chinzwai izvi, imi vatungamiri vemba yokwaJakobho nemi vatongi vemba yokwaIsiraeri. Munovenga ruenzaniso, uye zvose zvinenge zviri pamwero muchizviminamisa.

¹⁰ Munovaka Zioni neropa, Jerusaremu iyoyi nezvakaipa.

¹¹ Vatungamiriri vayo vanoda pfumbamuromo pakutonga. Vapristi vacho, vanotoda muripo, kuti vadzidzise. Vaporofita vacho, vanoda mari kuti vashopere, uku vachivimba naTenzi vachiti, “Handiti Tenzi ari pakati pedu here? Hakuna chakaipa chichatiwira.”

¹² Naizvozvo pamusana penyu, guta reZioni richarimwa somunda, Jerusaremu ichava murwi wamatongo, chikomo cheTemberi chichava chitunhu chemiti.